ଟେକ୍ସାସ୍ : ଆମେରିକାର ଟେକ୍ସାସ୍ ରାଜ୍ୟରେ ଏକ ଡାଏରୀ ଫାର୍ମରେ ଭୟଙ୍କର ବିସ୍ଫୋରଣ ଘଟି ୧୮ ହଜାର ଗାଈ ପ୍ରାଣ ହରାଇଛନ୍ତି । ଆମେରିକାର କୌଣସି ରାଜ୍ୟରେ ଏକକାଳୀନ ଏତେ ସଂଖ୍ୟକଙ୍କ ଗାଈଙ୍କ ମୃତ୍ୟୁ ହେବା ଏହା ପ୍ରଥମ ଘଟଣା । ଡିମିଟି ସହରରେ ଥିବା ସାଉଥ୍ ଫୋର୍କ ଡାଏରୀରେ ମେସିନ୍ରେ ତ୍ରୁଟି ଦେଖାଦେବା କାରଣରୁ ଏହି ବିସ୍ଫୋରଣ ଘଟିଥିବା କୁହାଯାଉଛି । ବିସ୍ଫୋରଣ ଫଳରେ ସେଠାରେ ନିଆଁ ଲାଗି ଯାଇଥିଲା । ଦୁର୍ଘଟଣାରେ ଜଣେ ବ୍ୟକ୍ତି ମଧ୍ୟ ଗୁରୁବାର ଭାବେ ଆହତ ହୋଇଛନ୍ତି ।
କେଷ୍ଟ୍ରୋ କାଉଣ୍ଟି ପୁଲିସ ଅନୁସାରେ ଏହି ଦୁର୍ଘଟଣା ଏପ୍ରିଲ୍ ୧୧ ତାରିଖରେ ହୋଇଥିଲା । ପୁଲିସ୍କୁ ସକାଳ ପ୍ରାୟ ୭ଟା ବେଳେ ଏହାର ସୂଚନା ମିଳିଥିଲା । ଫାୟର୍ ବ୍ରିଗେଡ୍ ଟିମ୍ ବହୁ ପରିଶ୍ରମ ପରେ ନିଆଁକୁ କାବୁ କରିଥିଲେ । ଏହାପରେ ଫାର୍ମରେ ଫସିଥିବା ବ୍ୟକ୍ତିଙ୍କୁ ଉଦ୍ଧାର କରି ହସ୍ପିଟାଲ୍ ନିଆଯାଇଥିଲା । ଦୁର୍ଘଟଣା ପରେ ଫାର୍ମରେ ଥିବା କେତେକ ଗାଈଙ୍କୁ ମଧ୍ୟ ଉଦ୍ଧାର କରାଯାଇଥିଲା । ବିସ୍ଫୋରଣ ସମୟରେ କ୍ଷୀର ସଂଗ୍ରହ ପାଇଁ ଗାଈମାନଙ୍କୁ ଏକ ଗୁହାଳରେ ବନ୍ଧା ଯାଇଥିଲା ।
