ଗାନ୍ଧିନଗର: ଗୁଜୁରାଟର ଗାନ୍ଧିନଗରରେ ଏକ ସ୍ପୋର୍ଟ୍ସ କ୍ୟାମ୍ପରେ ଭାଗ ନେବାକୁ ଯାଇଥିବା ସୁରଟର ନାବାଳିକାଙ୍କୁ ଦୁଷ୍କର୍ମ ଅଭିଯୋଗ । ପରିବାର ଲୋକଙ୍କ ଅଭିଯୋଗ ଅନୁସାରେ ଗତବର୍ଷ ସେପ୍ଟେମ୍ବର ମାସରେ ନାବାଳିକା ଦୁଷ୍କର୍ମର ଶିକାର ହୋଇଥିଲେ । ତେବେ ୧୭ ବର୍ଷୀୟା ନାବାଳିକା ଗର୍ଭବତୀ ଥିବା ଜାଣିବା ପରେ ଶୁକ୍ରବାର ଗୋଦଦରା ଥାନାରେ ଲିଖିତ ଅଭିଯୋଗ କରିଛନ୍ତି ପୀଡ଼ିତାଙ୍କ ପରିବାର ଲୋକେ । ସୂଚନା ଅନୁସାରେ ଅଭିଯୁକ୍ତ ମେହସାନାର ବାସିନ୍ଦା ଅଟେ । ପୀଡ଼ିତାଙ୍କ ପରିବାରର ଅଭିଯୋଗ କ୍ରମେ ଅଭିଯୁକ୍ତ ବିରୋଧରେ ଦୁଷ୍କର୍ମ ଓ ଅସଦାଚାରଣ ଏବଂ ପୋକ୍ସୋ ଅଧିନରେ ମାମଲା ରୁଜୁ କରାଯାଇଛି ।
ତେବେ ପୀଡ଼ିତାଙ୍କଠାରୁ ପୋଲିସକୁ ମିଳିଥିବା ସୂଚନା ଅନୁସାରେ, ପୀଡ଼ିତା ସ୍ପୋର୍ଟ୍ସ କ୍ୟାମ୍ପରେ ଅଭିଯୁକ୍ତ ସହ ମିଶିଥିଲେ ଏବଂ ସେଠାରେ ହିଁ ଉଭୟଙ୍କ ମଧ୍ୟରେ ଶାରିରୀକ ସମ୍ପର୍କ ଗଢ଼ି ଉଠିଥିଲା । ତେବେ ପୀଡ଼ିତାଙ୍କ ଅବସ୍ଥା ଭଲ ନଥିବାରୁ ତାଙ୍କ ନିକଟରୁ ଅଧିକ କିଛି ସୂଚନା ମିଳିପାରି ନଥିବା ପୋଲିସ ସୂଚନା ଦେଇଛି । ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ, ଯୁକ୍ତ ୨ରେ ପଢ଼ୁଥିବା ନାବାଳିକା ଛାତ୍ରୀ ଜଣକ ଅନ୍ୟ ସାଙ୍ଗସାଥିଙ୍କ ସହ ଜାତୀୟ କ୍ରୀଡ଼ା ଶିବିରରେ ଯୋଗ ଦେବାପାଇଁ ଗାନ୍ଧିନଗର ଯାଇଥିଲେ । ସେଠାରେ ରହିବା ଭିତରେ ସେ ଅଭିଯୁକ୍ତ ସହ ବନ୍ଧୁତା ସ୍ଥାପନ କରିଥିଲେ । ତେବେ ନିକଟରେ ତାଙ୍କ ପେଟରେ ଯନ୍ତ୍ରଣା ଅନୁଭବ ହେବାରୁ ତାଙ୍କୁ ମେଡିକାଲ ଚିକିତ୍ସା ପାଇଁ ନିଆଯାଇଥିଲା । ସେଠାରେ ସେ ଗର୍ଭବତୀ ଥିବା ପୀଡ଼ିତାଙ୍କ ପରିବାର ପୋଲିସକୁ ଜଣାଇଛନ୍ତି । ଏନେଇ ମାମଲା ରୁଜୁ ହୋଇ ତଦନ୍ତ ଆରମ୍ଭ ହୋଇଥିବା ସ୍ଥାନୀୟ ଡିସିପି ଭାଗୀରଥ ସିଂହ ଗାଦ୍ଭି ସୂଚନା ଦେଇଛନ୍ତି।
