ମୁମ୍ବାଇ: ବଲିଉଡ୍ରେ କାଷ୍ଟିଂ କାଉଚ୍ କୌଣସି ନୂଆ କଥା ନୁହେଁ । ଅନେକ ଅଭିନେତ୍ରୀ କାଷ୍ଟିଂ କାଉଚ୍ର ଶିକାର ହୋଇଥିବା ପୂର୍ବରୁ ଅଭିଯୋଗ ଆଣି ସାରିଛନ୍ତି । ଆଉ ଏବେ ଏହି ତାଲିକାରେ ଅଭିନେତ୍ରୀ ରଶ୍ମୀ ଦେଶାଇଙ୍କ ନାଁ ବି ଆସିଯାଇଛି । ନିକଟରେ ସେ ଏହି କଥାର ଖୁଲାସା କରିଥିଲେ । ଅଭିନେତ୍ରୀ ରଶ୍ମୀ ଦେଶାଇ ଅନେକ ଟିଭି ସିରିଏଲରେ କାମ କରିସାରିଛନ୍ତି । ସେ ଟିଭି ଶୋ ଉତ୍ତରନରେ ତାପସ୍ୟା ଚରିତ୍ରରେ ଅଭିନୟ କରି ଅତୁଳନୀୟ ସଫଳତା ହାସଲ କରିଥିଲେ । ଏହି ସିରିଏଲ ରଶ୍ମୀଙ୍କୁ ଅଭିନୟ କ୍ୟାରିୟରକୁ ବହୁ ଉଚ୍ଚତାକୁ ନେଇ ଯାଇଥିଲା । କିନ୍ତୁ ଏହାପୂର୍ବରୁ ରଶ୍ମୀଙ୍କୁ ଅନେକ ପରୀକ୍ଷା ଦେବାକୁ ପଡିଛି । ସଫଳତା ପାଇଁ ତାଙ୍କୁ ଅନେକ ବର୍ଷ ସଂଘର୍ଷ କରିବାକୁ ପଡିଥିଲା ।
ରଶ୍ମୀ ମଧ୍ୟ ତାଙ୍କ କ୍ୟାରିୟରର ପ୍ରାରମ୍ଭରେ କାଷ୍ଟିଂ କାଉଚର ଶିକାର ହୋଇଥିଲେ ଏବଂ ସେ ନିଜେ ଏକ ସାକ୍ଷାତକାରରେ ଏହା କହିଥିଲେ । ରଶ୍ମୀ କହିଥିଲେ- ଯେତେବେଳେ ସେ ଏହି ଇଣ୍ଡଷ୍ଟ୍ରିରେ ନୂଆ କରି ପାଦ ଥାପିଥିଲେ, ଲୋକମାନେ ତାଙ୍କୁ କହିଥିଲେ ଯେ କାଷ୍ଟିଂ କାଉଚ୍ ବିନା ଏଠାରେ କୌଣସି କାମ ମିଳେ ନାହିଁ । ତେବେ ଦିନେ ଜଣେ ବ୍ୟକ୍ତି ତାଙ୍କୁ ଫୋନରେ ଅଡିସନ ପାଇଁ ଡାକିଥିଲେ । ସେ ମଧ୍ୟ ଅଡିସନକୁ ଯାଇଥିଲେ । ହେଲେ ସେଠାରେ ସେ ଏକା ହିଁ ଥିଲେ । ବ୍ୟକ୍ତିଜଣକ ତାଙ୍କୁ କିଛି ମଦ୍ୟପାନ ସହିତ ମିଶ୍ରିତ ପାନ ଦେଇ ଅସଦାଚରଣ କରିବାକୁ ଚେଷ୍ଟା କରିଥିଲେ । ଯାହା ସେ ବୁଝିପାରିଥିଲେ ଏବଂ ଅଢେଇ ଘଣ୍ଟା ଧରି ସଂଘର୍ଷ କରିବା ପରେ ସେ କୌଣସି ପ୍ରକାରେ ସେଠାରୁ ଖସି ଆସିବାରେ ସଫଳ ହୋଇଥିଲେ । ରିପୋର୍ଟ ଅନୁଯାୟୀ, ଘଟଣାର ପରଦିନ ରଶ୍ମୀଙ୍କ ମା’ ଉକ୍ତ ବ୍ୟକ୍ତିଙ୍କୁ ଧରିଥିଲେ ଏବଂ ଉତ୍ତମ ମଧ୍ୟମ ଦେଇଥିଲେ ।
