ନୂଆଦିଲ୍ଲୀ: ଗାଡି ଉପରୁ ନିୟନ୍ତ୍ରଣ ହରାଇବାରୁ ରାଜଧାନୀରେ ଘଟିଯାଇଛି ଏକ ହୃଦୟ ବିଦାରକ ଦୁର୍ଘଟଣା । ଦୁର୍ଘଟଣାର ଶିକାର ହୋଇଛନ୍ତି ୩ ଜଣ ଶିଶୁ । ଏବେ ଏହି ଘଟଣାର ଏକ ସିସିଟିଭି ଫୁଟେଜ ମଧ୍ୟ ସାମନାକୁ ଆସିଛି । ତେବେ ଏହି ଘଟଣା ଉତ୍ତର ଦିଲ୍ଲୀର ଗୁଲାବିବାଗ ଅଞ୍ଚଳରେ ହୋଇଥିବା ଜାଣିବାକୁ ମିଳିଛି ।
ସୂଚନା ଅନୁସାରେ, ଗୁଲାବିବାଗ ଅଞ୍ଚଳର ଏକ ସ୍କୁଲ ନିକଟରେ ଏହି ଦୁର୍ଘଟଣା ଘଟିଯାଇଛି । ଫୁଟପାଥରେ ଠିଆ ହୋଇଥିବା ୩ ଜଣ ଶିଶୁଙ୍କ ଉପରେ କାରଟି ମାଡି ଯାଇଥିବା ସିସିଟିଭି ଭିଡିଓରୁ ଦେଖିବାକୁ ମିଳିଛି । ପ୍ରତାପନଗରର ଗଜେନ୍ଦର ନାମକ ଜଣେ ବ୍ୟକ୍ତି ଦ୍ରୁତ ଗତିରେ ଗାଡି ଚଳାଉଥିବା ବେଳେ ନିୟନ୍ତ୍ରଣ ହରାଇ ଫୁଟପାଥ ଆଡକୁ ମାଡି ଯାଇଥିଲା । ଫଳରେ ରାସ୍ତାକଡରେ ଠିଆ ହୋଇଥିବା ଲୀଲାୱତି ସ୍କୁଲର ୩ ଜଣ ଶିଶୁଙ୍କ ଉପରକୁ ମାଡି ଯାଇଛି । ତେବେ ପାଖରେ ଲାଗିଥିବା ଏକ ସିସିଟିଭି କ୍ୟାମେରାରେ ଏହି ଘଟଣାର ସମସ୍ତ ଦୃଶ୍ୟ କଏଦ ହୋଇଛି ।
ସ୍ଥାନୀୟ ଲୋକେ ଆହତ ପିଲାମାନଙ୍କୁ ଉଦ୍ଧାର କରି ହସ୍ପିଟାଲକୁ ପଠାଇଥିବା ବେଳେ ଗଜେନ୍ଦରକୁ ଜବତ କରି ନିର୍ଧୂମ ମାଡ ମାରିଥିବା ମଧ୍ୟ ଭିଡିଓରେ ଦେଖାଯାଇଛି । ଏହାପରେ ପୋଲିସ ଅଭିଯୁକ୍ତକୁ ଗିରଫ କରିଥିବା ସୂଚନା ମିଳିଛି । ସେପଟେ ଆହତ ପିଲାମାନଙ୍କ ମଧ୍ୟରୁ ୨ ଜଣଙ୍କ ଅବସ୍ଥା ବିପଦମୁକ୍ତ ଥିବା ବେଳେ ୬ ବର୍ଷର ଜଣେ ଶିଶୁ ଗୁରୁତର ଥିବା ହସ୍ପିଟାଲ ପକ୍ଷରୁ ଜଣାଯାଇଛି ।
