କେରଳରେ ଦାଦନ ଶ୍ରମିକଙ୍କ ମୃତ୍ୟୁ

ଦାରିଙ୍ଗବାଡ଼ି : ପରିବାର ପ୍ରତିପୋଷଣ କରିବା ପାଇଁ କେରଳ ଯାଇଥିବା ଜଣେ ଦାଦନ ଶ୍ରମିକଙ୍କ ସେଠାରେ ମୃତ୍ୟୁ ଘଟିଛି । ଦାଦନ ଶ୍ରମିକ ଜଣକ ହେଲେ ଦାରିଙ୍ଗବାଡ଼ି ବ୍ଳକ ଗଦାପୁର ଗ୍ରାମର ସୁରେଶ ନାୟକ(୪୨) । ସୁରେଶ କିଛି ମାସ ହେବ ପରିବାର ପ୍ରତିପୋଷଣ କରିବା ପାଇଁ ଗଦାପୁର ଗ୍ରାମରୁ କେରଳ ଯାଇ ସେଠାରେ ଶ୍ରମିକ ଭାବେ କାମ କରୁଥିଲେ । ବୁଧବାର ସେ ଶୋଇଥିବା ବେଳେ ହଠାତ ତାଙ୍କର ମୃତ୍ୟୁ ହୋଇଥିବା ଖବର ପରିବାରର ଲୋକଙ୍କୁ ସେଠାରୁ ସୂଚନା ମିଳିଥିଲା । ମୃତ୍ୟୁର କାରଣ ଜଣା ପଡ଼ିନଥିବାରୁ ବ୍ୟବଚ୍ଛେଦ ରିପୋର୍ଟ ପରେ ଜଣାପଡ଼ିବ ବୋଲି କୁହାଯାଉଛି । ଗଦାପୁର ଗ୍ରାମରେ ସୁରେଶ ମୃତ୍ୟୁ ଖବର ପାଇ ପରିବାର ସହ ଗ୍ରାମ ତଥା ଅଞ୍ଚଳରେ ଶୋକର ଛାୟା ଖେଳିଯାଇଛି । କିପରି ଭାବରେ ତାଙ୍କ ମୃତ ଶରୀର ଗ୍ରାମକୁ ଆଣାଯିବ ସେ ନେଇ ପରିବାରର ଚିନ୍ତାରେ ଥିବା ବେଳେ ଏଥିପ୍ରତି ପ୍ରଶାସନ ଦୃଷ୍ଟି ଦେବା ସହ ସରକାରୀ ସହାୟତା ଯୋଗାଇ ଦେବାକୁ ପରିବାର ସମେତ ଅଂଚଳବାସୀ ଦାବି କରିଛନ୍ତି ।