ମୁମ୍ବାଇ : ତେଲୁଗୁ ଚଳଚ୍ଚିତ୍ର ‘ପୁଷ୍ପା’ର ଆଇଟମ୍ ଗୀତରୁ ଖୁବ୍ ଚର୍ଚ୍ଚାକୁ ଆସିଥିବା ଅଭିନେତ୍ରୀ ସମନ୍ଥାଙ୍କ ଫ୍ୟାନ୍ସଙ୍କ ପାଇଁ ଆସିଛି ଏକ ଚିନ୍ତାଜନକ ଖବର । ସମନ୍ଥା ବର୍ତ୍ତମାନ ଏକ ବିରଳ ରୋଗରେ ପୀଡିତ ଅଛନ୍ତି । ସମନ୍ଥା କହିଛନ୍ତି ଯେ, ତାଙ୍କୁ ମାୟୋସିଟିସ୍ ହୋଇଛି, ଯାହା ଏକ ବିରଳ ରୋଗ । ଇନଷ୍ଟାଗ୍ରାମରେ ହସ୍ପିଟାଲରୁ ନିଜର ଏକ ଫଟୋ ସେୟାର କରି ସମନ୍ଥା ଏହି ସୂଚନା ଦେଇଛନ୍ତି ।
ଇନଷ୍ଟାଗ୍ରାମରେ ଫଟୋ ସେୟାର କରି ସମନ୍ଥା ଲେଖିଛନ୍ତି ଯେ, ‘କିଛି ମାସ ପୂର୍ବରୁ ମାୟୋସିଟିସ୍ ନାମକ ଏକ ଅଟୋଇମ୍ୟୁନ ରୋଗରେ ଆକ୍ରାନ୍ତ ହୋଇଥିବା ଜଣାପଡିଲା । ଏଥିରୁ ସୁସ୍ଥ ହେବା ପରେ ମୁଁ ଏହି ସୂଚନା ଦେବାକୁ ଚିନ୍ତା କରୁଥିଲି । କିନ୍ତୁୁ ମୋର ଆଶା ଅପେକ୍ଷା ସୁସ୍ଥ ହେବାକୁ ଅଧିକ ସମୟ ଲାଗୁଛି । ଡାକ୍ତରମାନେ ନିଶ୍ଚିତ ଅଛନ୍ତି ଯେ ମୁଁ ଶୀଘ୍ର ସମ୍ପୂର୍ଣ୍ଣ ଆରୋଗ୍ୟ ହେବି । ମୋର ଭଲ ଦିନ ଏବଂ ଖରାପ ଦିନ ଅଛି । ଶାରୀରିକ ଏବଂ ଭାବନାତ୍ମକ ଭାବରେ ମୋତେ ଲାଗୁଛି ଯେ ମୁଁ ଗୋଟିଏ ବି ଦିନ ଆଉ ସମ୍ଭାଳିପାରିବି ନାହିଁ । କିନ୍ତୁ କୌଣସି ପ୍ରକାରେ ସେହି ମୁହୂର୍ତ୍ତଟି ଅତିବାହିତ ହୁଏ । ମୁଁ ଅନୁମାନ କରୁଛି ଏହାର ଅର୍ଥ କେବଳ ଗୋଟିଏ ହିଁ ହୋଇପାରେ ଯେ ମୁଁ ସୁସ୍ଥ ହେବାର ସମୟ ପାଖକୁ ଆସୁଛି’ ।
ମାୟୋସିଟିସ୍ ଏକ ଅଟୋଇମ୍ୟୁନ୍ ଅବସ୍ଥା । ବିଶେଷଜ୍ଞମାନେ କହିଛନ୍ତି ଯେ, ଆମ ଶରୀରରେ ମାଂସପେଶୀ କୋଷଗୁଡ଼ିକର ଫୁଲିବା ହେତୁ ମାୟୋସିଟିସ୍ ହୁଏ । ଏହା ମଧ୍ୟ କୁହାଯାଏ ଯେ ପୁରୁଷଙ୍କ ଅପେକ୍ଷା ମହିଳାମାନେ ଏହି ରୋଗରେ ଅଧିକ ଆକ୍ରାନ୍ତ ହୁଅନ୍ତି । ମାୟୋସିଟିସ୍ ହେଉଛି ଏକ ଅଟୋଇମ୍ୟୁନ୍ ଅବସ୍ଥା ଯାହା ଶରୀରର ମାଂସପେଶୀ କୋଷକୁ ପ୍ରଭାବିତ କରିଥାଏ ।
ସ୍ୱାସ୍ଥ୍ୟ ବିଶେଷଜ୍ଞଙ୍କ ଅନୁଯାୟୀ, ମାୟୋସିଟିସ୍ ପାଇଁ କୌଣସି ପ୍ରଭାବଶାଳୀ ଚିକିତ୍ସା ନାହିଁ । କିନ୍ତୁ ନିୟମିତ ଯାଞ୍ଚ, ବ୍ୟାୟାମ, ଯୋଗ ଏବଂ ଆଣ୍ଟିବାୟୋଟିକ୍ ଔଷଧ ଦ୍ୱାରା ଏହି ରୋଗ ଭଲ ହୋଇପାରିବ । ଏହା କଠିନ ମାଂସପେଶୀ କୋଷଗୁଡ଼ିକୁ ମୁକ୍ତ କରିବାରେ ସାହାଯ୍ୟ କରେ । ଏହା ମାଂସପେଶୀ କୋଷଗୁଡ଼ିକୁ ମଜବୁତ କରିବାରେ ମଧ୍ୟ ସାହାଯ୍ୟ କରେ । ଯଦି ଆପଣ ମାୟୋସିଟିସ୍ ରୋଗରେ ଆକ୍ରାନ୍ତ ତେବେ ଡାକ୍ତରଙ୍କ ସହିତ ପରାମର୍ଶ କରନ୍ତୁ । ଯଦି ଏହି ରୋଗର ଚିକିତ୍ସା ଠିକ୍ ସମୟରେ ଆରମ୍ଭ ହୁଏ, ତେବେ ସ୍ୱାସ୍ଥ୍ୟ ଉପରେ ଏହାର ନକାରାତ୍ମକ ପ୍ରଭାବ କମିଯାଏ ବୋଲି ବିଶେଷଜ୍ଞମାନେ କହିଛନ୍ତି ।
