ନ୍ୟୁୟର୍କ : ଚଳିତ ୟୁଏସ୍ ଓପନ୍ କ୍ୱାର୍ଟର୍ରେ ପ୍ରବେଶ କରିଛନ୍ତି ଅଷ୍ଟ୍ରେଲିଆର ବିବାଦୀୟ ପୁରୁଷ ସିଙ୍ଗଲ୍ସ ଖେଳାଳି ନିକ୍ କିର୍ଗିଓସ୍ ଓ ଟ୍ୟୁନିସିଆର ଓନ୍ସ ଜାବିଉର୍ । ଗୋଟିଏ ପଟେ ୨୩ତମ ସିଡେଡ୍ ଖେଳାଳି କିର୍ଗିଓସ୍ ବିଶ୍ୱର ଏକ ନମ୍ବର ଖେଳାଳି ରୁଷିଆର ଡାନିଲ୍ ମେଡଭେଡେଭ୍ଙ୍କୁ ୭-୬(୧୩/୧୧), ୩-୬,୬-୩, ୬-୨ରେ ପରାସ୍ତ କରିଥିବା ବେଳେ ପଞ୍ଚମ ସିଡେଡ୍ ଜାବିଉର୍ ଅନ୍ୟତମ ରୁଷୀୟ ଖେଳାଳି ଭେରୋନିକା କୁଡେର୍ମେଟୋଭାଙ୍କୁ ୭-୬(୭/୧. ୬-୪ରେ ପରାସ୍ତ କରିଛନ୍ତି । ପ୍ରଥମ ଥର ପାଇଁ କ୍ୱାର୍ଟର୍କୁ ଉନ୍ନୀତ ହୋଇଥିବା ଜାବିଉର୍ ଅନ୍ତିମ ୪ ଖେଳାଳିଙ୍କ ମଧ୍ୟରେ ସାମିଲ୍ ହେବା ସକାଶେ ଅଷ୍ଟ୍ରେଲିଆର ଆଜ୍ଲା ଟୋମଲିଜାନୋଭିକ୍ଙ୍କୁ ଭେଟିବେ ।
କାରଣ ଟୋମଲିଜାନୋଭିକ୍ ପ୍ରିକ୍ୱାର୍ଟର୍ ମ୍ୟାଚ୍ରେ ରୁଷିଆର ଲୁଡ୍ମିଲା ସାମ୍ସୋନୋଭାଙ୍କୁ ୭-୬(୧୦/୬),୬-୧ରେ ହରାଇଛନ୍ତି । ଏହାଛଡ଼ା ସୋମବାର ପୁରୁଷ ସିଙ୍ଗଲ୍ସର ଆଉ ଏକ ପ୍ରିକ୍ୱାର୍ଟର୍ ଫାଇନାଲ୍ ମ୍ୟାଚ୍ରେ ୨୭ତମ ସିଡେଡ୍ ଖେଳାଳି ରୁଷିଆର କାରେନ୍ ଖାଚାନୋଭ୍ ଦ୍ୱାଦଶ ସିଡ୍ ସ୍ପେନୀୟ ଖେଳାଳି ପାବ୍ଲୋ କାରେନୋ ବୁଷ୍ଟାଙ୍କୁ ୪-୬,୬-୩,୬-୧, ୪-୬,୬-୩ରେ ପରାସ୍ତ କରିଛନ୍ତି । କ୍ୱାର୍ଟର୍ ଫାଇନାଲ୍ ପର୍ଯ୍ୟାୟରେ ସେ ମଙ୍ଗଳବାର କିର୍ଗିଓସ୍ଙ୍କୁ ଭେଟିବେ । ଅନ୍ୟପକ୍ଷରେ ମହିଳା ସିଙ୍ଗଲ୍ସରେ ସୋମବାର ଦ୍ୱାଦଶ ସିଡ୍ ଆମେରିକାର କୋକୋ ଗଫ୍ ୭-୫, ୭-୫ରେ ଚୀନ୍ର ଝାଙ୍ଗ୍ ସୁଆଇଙ୍କୁ ହରାଇ କ୍ୱାର୍ଟର୍କୁ ଉନ୍ନୀତ ହୋଇଛନ୍ତି । ସେ ଏହି ରାଉଣ୍ଡ୍ରେ ସପ୍ତଦଶ ସିଡ୍ ଫ୍ରେଞ୍ଚ୍ ଖେଳାଳି କ୍ୟାରୋଲିନ୍ ଗାର୍ସିଆଙ୍କୁ ଭେଟିବେ । କାରଣ ଗାର୍ସିଆ ତାଙ୍କ ପ୍ରିକ୍ୱାର୍ଟର୍ ମୁକାବିଲାରେ ଆମେରିକାର ଆଲିସନ୍ ରିସ୍କେ-ଅମ୍ରିତରାଜଙ୍କୁ ୬-୪,୬-୧ରେ ହରାଇଛନ୍ତି ।
