ସିଙ୍ଗାପୁର: ବୁଧବାରଠାରୁ ଆରମ୍ଭ ହୋଇଥିବା ସିଙ୍ଗାପୁର ଓପନ୍ ସୁପର୍ ୫୦୦ ବ୍ୟାଡ୍ମିଣ୍ଟନ୍ ଟୁର୍ଣ୍ଣାମେଣ୍ଟ୍ର ପ୍ରଥମ ଦିନରେ ଭାରତୀୟ ଶଟ୍ଲର୍ଙ୍କୁ ମିଶ୍ରିତ ଫଳାଫଳ ମିଳିଛି । ଜୁଲାଇ ୧୭ ତାରିଖ ପର୍ଯ୍ୟନ୍ତ ଚାଲିବାକୁ ଥିବା ଟୁର୍ଣ୍ଣାମେଣ୍ଟ୍ରେ ପିଭି ସିନ୍ଧୁ, ସାଇନା ନେହ୍ୱାଲ୍, ଏଚ୍ଏସ୍ ପ୍ରଣୟ ପ୍ରମୁଖ ବିଜୟ ସହ ଅଭିଯାନ ଆରମ୍ଭ କରିଛନ୍ତି । ମିଥୁନ୍ ମଞ୍ଜୁନାଥ ପ୍ରଥମ ଦିନ ବିପର୍ଯ୍ୟୟ ସୃଷ୍ଟି କରି ନିଜ ଦେଶର ବିଶ୍ୱ ଚାମ୍ପିଅନ୍ଶିପ୍ ରୌପ୍ୟ ବିଜେତା କିଦାମ୍ବୀ ଶ୍ରୀକାନ୍ତ ବିପକ୍ଷରେ ଦମ୍ଦାର ବିଜୟ ରେକର୍ଡ କରି ଦ୍ୱିତୀୟ ରାଉଣ୍ଡ୍ରେ ପ୍ରବେଶ କରିଛନ୍ତି । ଚଳିତବର୍ଷ ଏପ୍ରିଲ୍ରେ ଓର୍ଲିଅନ୍ସ ମାଷ୍ଟର୍ସ ସୁପର୍ ୧୦୦ ଫାଇନାଲ୍ରେ ପହଞ୍ଚିଥିବା ମଞ୍ଜୁନାଥ ବିଶ୍ୱର ୧୧ ନମ୍ବର ଖେଳାଳି ଶ୍ରୀକାନ୍ତଙ୍କୁ ପୁରୁଷ ସିଙ୍ଗଲ୍ସର ଏକ ପ୍ରଥମ ରାଉଣ୍ଡ୍ ମ୍ୟାଚ୍ରେ ୨୧-୧୭, ୧୫-୨୧, ୨୧-୧୮ରେ ହରାଇ ଦେଇଛନ୍ତି । ଏହି ମ୍ୟାଚ୍ ଏକଘଣ୍ଟା ଚାଲିଥିଲା । ବିଶ୍ୱର ୭୭ ନମ୍ବର ଖେଳାଳି ମଞ୍ଜୁନାଥ ଦ୍ୱିତୀୟ ରାଉଣ୍ଡ୍ରେ ଆୟର୍ଲାଣ୍ଡର ଏନ୍ହାଟ୍ ଏନ୍ଗୁଏନ୍ଙ୍କୁ ଭେଟିବେ ।
୨୪ ବର୍ଷୀୟ ମଞ୍ଜୁନାଥ ଆକ୍ରମଣାତ୍ମକ ଆରମ୍ଭ କରି ୬-୨ରେ ଆଗୁଆ ରହି ସହଜରେ ପ୍ରଥମ ଗେମ୍ ଜିତିନେଇଥିଲେ । ଏହାପରେ ଦ୍ୱିତୀୟ ଗେମ୍ରେ ଆକର୍ଷଣୀୟ କୋର୍ଟ କଭରେଜ୍ ସହ ଶ୍ରୀକାନ୍ତ ପ୍ରତ୍ୟାବର୍ତ୍ତନ କରି ୧୧-୮ର ଅଗ୍ରଣୀ ଲାଭ କରିଥିଲେ । ଏହାପରେ ଗେମ୍ ଜିତି ମ୍ୟାଚ୍କୁ ବରାବର ସ୍ଥିତିକୁ ନେଇଆସିଥିଲେ । ନିର୍ଣ୍ଣାୟକ ଗେମ୍ରେ ଉଭୟ ଖେଳାଳିଙ୍କୁ ବହୁ ପରିଶ୍ରମ କରିବାକୁ ପଡ଼ିଥିଲା ଏବଂ ମଞ୍ଜୁନାଥ ଉନ୍ନତ ନିୟନ୍ତ୍ରଣ ସହ ବ୍ରେକ୍ ବେଳକୁ ୧୧-୧୦ର ସାମାନ୍ୟ ଅଗ୍ରଣୀ ହାସଲ କରିଥିଲେ । ମାତ୍ର ଶ୍ରୀକାନ୍ତ ସ୍କୋର୍କୁ ୧୬-୧୫ କରିଦେଇଥିଲେ। ୧୮-୧୮ ସ୍କୋର୍ ବେଳେ ମଞ୍ଜୁନାଥ ଲଗାତାର ତିନି ପଏଣ୍ଟ ହାସଲ କରି ମ୍ୟାଚ୍ ନିଜ ନାମରେ କରିଥିଲେ ।
ଏହା ପୂର୍ବରୁ ଏକ ଏକତରଫା ମହିଳା ସିଙ୍ଗଲ୍ସ ମ୍ୟାଚ୍ରେ ବିଶ୍ୱ ନଂ-୭ ସିନ୍ଧୁ ୩୬ ନଂ ଖେଳାଳି ବେଲ୍ଜିୟମ୍ର ଲିଆନେ ଟେନ୍ଙ୍କୁ ୨୧-୧୫, ୨୧-୧୧ ସିଧା ଗେମ୍ରେ ହରାଇ ଦେଇଥିଲେ । ପୂର୍ବତନ ବିଶ୍ୱ ଚାମ୍ପିଅନ୍ ଦ୍ୱିତୀୟ ରାଉଣ୍ଡ୍ ମ୍ୟାଚ୍ରେ ଭିଏତ୍ନାମ୍ର ଥୁଇ ଲିନ୍ ଏନ୍ଗୁଏନ୍ଙ୍କୁ ଭେଟିବେ । ମହିଳା ସିଙ୍ଗଲ୍ସର ଅନ୍ୟ ଏକ ମ୍ୟାଚ୍ରେ ଲଣ୍ଡନ ଅଲିମ୍ପିକ୍ସ ବ୍ରୋଞ୍ଜ୍ ବିଜୟିନୀ ସାଇନା ଇଣ୍ଡିଆ ଓପନ୍ ପରାଜୟର ପ୍ରତିଶୋଧ ନେଇ ନିଜ ଦେଶର ମାଳବିକା ବନ୍ସୋଡ୍ଙ୍କୁ ୨୧-୧୮, ୨୧-୧୪ରେ ହରାଇ ଦ୍ୱିତୀୟ ରାଉଣ୍ଡ୍ରେ ପ୍ରବେଶ କରିଛନ୍ତି । ସେହିପରି ଭାରତର ଅସ୍ମିତା ୨୧-୧୬, ୨୧-୧୧ରେ ହାନ୍ ୟିଙ୍କୁ ହରାଇ ଦେଇଛନ୍ତି । ଗତ ସପ୍ତାହରେ ମାଲେସିଆ ମାଷ୍ଟର୍ସ ସେମିଫାଇନାଲ୍ରେ ପ୍ରବେଶ କରିଥିବା ଏଚ୍ଏସ୍ ପ୍ରଣୟ ପୁରୁଷ ସିଙ୍ଗଲ୍ସ ଏକ ମ୍ୟାଚ୍ରେ ଥାଇଲାଣ୍ଡର ସିଥିକୋମ୍ ଥାମାସିନ୍ଙ୍କୁ ୨୧-୧୩, ୨୧-୧୬ରେ ହରାଇଛନ୍ତି । ଦ୍ୱିତୀୟ ରାଉଣ୍ଡ୍ରେ ସେ ତୃତୀୟ ସିଡ୍ କୋଓ ତିଏନ୍ ଚେନ୍ଙ୍କୁ ଭେଟିବେ ।
