ଖଲ୍ଲିକୋଟ: ଓମାନର ମସ୍କଟ ସହରରୁ ଗାଆଁକୁ ଫେରୁଥିବା ଜଣେ ଓଡ଼ିଆ ଶ୍ରମିକ ମୁମ୍ବାଇରୁ ଗତ ଏକ ସପ୍ତାହ ତଳେ ନିଖୋଜ ହୋଇ ଯାଇଛନ୍ତି । ତେବେ ପରିବାର ଲୋକେ ତାଙ୍କୁ ଅପହରଣ କରାଯାଇଥିବା ସନ୍ଦେହ କରୁଛନ୍ତି । ଖଲ୍ଲିକୋଟ ଥାନା ଅନ୍ତର୍ଗତ କନକା ପଞ୍ଚାୟତ କୁମ୍ଭୀଢ଼ିପ ଗ୍ରାମର ଏକାଦଶୀ ଜେନା ପରିବାର ପ୍ରତିପୋଷଣ ପାଇଁ ଗତ ତିନି ମାସ ତଳେ ଜଣେ ଠିକାଦାରଙ୍କ ମାଧ୍ୟମରେ ଓମାନ ଯାଇଥିଲେ । ଓମାନର ମସ୍କଟ ସହରରେ ଏକ ଘରୋଇ କମ୍ପାନୀରେ ଶ୍ରମିକ ଭାବେ କାର୍ଯ୍ୟ କରୁଥିଲେ । ସ୍ୱାସ୍ଥ୍ୟ ଅବସ୍ଥା ବିଗିଡ଼ିବାରୁ କମ୍ପାନୀ ଟିକେଟ କରି ଗତ ମାସ ୨୭ ରେ ଏକାଦଶୀଙ୍କୁ ଗାଁକୁ ପଠେଇଥିଲା ।
ମୁମ୍ବାଇ ବିମାନ ବନ୍ଦରରେ ଏକାଦଶୀ ସକାଳ ୫ ଟାରେ ଓହ୍ଲାଇଥିବା ବେଳେ ତାଙ୍କ ଜ୍ୱାଇଁ ସକାଳ ୬ଟାରେ ବିମାନ ବନ୍ଦରରେ ପହଞ୍ôଚଥିଲେ । ସେତେବେଳକୁ ଏକାଦଶୀ ବିମାନ ବନ୍ଦରରୁ ବାହାରି ଯିବାର ସିସିଟିଭି ଫୁଟେଜରୁ ଜଣାପଡ଼ିଛି । ତେବେ ବହୁ ସମୟ ଧରି ଖୋଜାଖୋଜି କରି ମଧ୍ୟ ଶ୍ୱଶୁରଙ୍କୁ ନ ପାଇ ବାଧ୍ୟ ହୋଇ ସେଠାକାର ଥାନାରେ ଅଭିଯୋଗ କରିଥିଲେ ଜ୍ୱାଇଁ । ଇତି ମଧ୍ୟରେ ଏକାଦଶୀ ନିଖୋଜ ହେବାର ୮ ଦିନ ବିତି ଯାଇଥିଲେ ମଧ୍ୟ ଏଯାଏଁ ତାଙ୍କର କୌଣସି ପତ୍ତା ମିଳି ନାହିଁ ।
ମସ୍କଟ କମ୍ପାନୀର ମୁମ୍ବାଇରେ ଶାଖା କାର୍ଯ୍ୟାଳୟ ଥିବାରୁ ଏକାଦଶୀ ମୁମ୍ବାଇରେ ପହଞ୍ôଚବା ପରେ ତାଙ୍କୁ ଅପହରଣ କରାଯାଇ ଥାଇପାରେ ବୋଲି ସନ୍ଦେହ କରାଯାଉଛି । ଏକାଦଶୀଙ୍କ ଦୁଇଟି ଝିଅ ଓ ଗୋଟିଏ ପୁଅ ଅଛନ୍ତି । ଝିଅ ଦୁଇଟି ବିବାହ କରିଥିବା ବେଳେ ପୁଅଟି ପାଠ ପଢୁଛି । ଏକାଦଶୀ ପରିବାରର ଏକମାତ୍ର ରୋଜଗାରିଆ ବ୍ୟକ୍ତି ଥିବାରୁ ତାଙ୍କର ନିଖୋଜ ହେବା ଘଟଣା ପରିବାରର ଭବିଷ୍ୟତକୁ ଅନ୍ଧାର ମଧ୍ୟକୁ ଠେଲି ଦେଇଛି । ଏକାଦଶୀଙ୍କୁ ଫେରାଇ ଆଣିବାରେ ପ୍ରଶାସନ ସହଯୋଗ କରିବାକୁ ପରିବାର ଲୋକେ ଅନୁରୋଧ କରିଛନ୍ତି ।
