ମୟୂରଭଞ୍ଜ: ମୟୂରଭଞ୍ଜ ଜିଲ୍ଲା କପ୍ତିପଦା ଥାନା ଅଞ୍ଚଳରେ ପୂର୍ବ ଶତ୍ରୁତାକୁ କେନ୍ଦ୍ର କରି ହତ୍ୟାକାଣ୍ଡ ଘଟିଛି । ଦୁର୍ବୃତ୍ତମାନେ ଜଣେ ବ୍ୟକ୍ତିଙ୍କୁ ହତ୍ୟା କରିବା ପରେ ତାଙ୍କ ଶବରେ ଏକ ପଥର ବାନ୍ଧି ସୋନନଦୀ ପଠାରେ ଫିଙ୍ଗି ଦେଇଥିଲେ । ଅଭିଯୋଗ ପରେ ପୁଲିସ୍ ଯାଞ୍ଚ କରିବା ସହ ନଦୀ ପଠାରୁ ଆଜି ମୃତଦେହ ଉଦ୍ଧାର କରିଛି । ମୃତ ବ୍ୟକ୍ତି ଜଣକ କପ୍ତିପଦା ଥାନା ଅଞ୍ଚଳର ଦେବାନବାହାଳୀ ଗ୍ରାମର ରାମାଏ ସିଂ ବୋଲି ଜଣାପଡ଼ିଛି । ଘଟଣାରେ ପୁଲିସ୍ ୪ ଜଣଙ୍କୁ ଥାନାରେ ଅଟକ ରଖି ତଦନ୍ତ ଚଳାଇଛି ।
ସୂଚନାନୁସାରେ ରାମାଏ ସିଂ ଗତ ସୋମବାର ନିକଟସ୍ଥ ଉପିସାହି ହାଟକୁ ଯାଇ ଆଉ ସେଠାରୁ ଫେରିନଥିଲେ । ଗତକାଲି ସୁନେଇ ଡ୍ୟାମରେ ତାଙ୍କର ମୃତଦେହ ଭାସୁଥିବା କିଛି ସ୍ଥାନୀୟ ଲୋକେ ଦେଖିବାକୁ ପାଇ ପୋଲିସକୁ ଖବର ଦେଇଥିଲେ । ପୋଲିସ ପହଞ୍ଚି ମୃତଦେହ ଉଦ୍ଧାର କରିବା ସହ ପୂର୍ବ ଶତ୍ରୁତାକୁ ନେଇ ଏହି ହତ୍ୟାକାଣ୍ଡ ହୋଇଥିବା ପ୍ରାଥମିକ ତଦନ୍ତରୁ ଜାଣିପାରିଛି । ରାମାଏଙ୍କ ପୁଅଙ୍କ ଅଭିଯୋଗ ଭିତ୍ତିରେ ପୋଲିସ୍ ଏକ ମାମଲା ରୁଜୁ କରିବା ସହ ଏଥିରେ ଜଡ଼ିତ ୪ଜଣଙ୍କୁ ଥାନାରେ ଅଟକ ରଖି ପଚରାଉଚରା ଚଳାଇଛି । ରାମାଏଙ୍କ ଭାଇଙ୍କ ସହିତ ପୂର୍ବରୁ ଗୁଣିଗାରେଡି ସନ୍ଦେହକୁ ନେଇ ବାଦ ହୋଇଥିଲା । ପରବର୍ତ୍ତୀ ସମୟରେ ଏହାର ସମାଧାନ ହୋଇଥିଲେ ମଧ୍ୟ ପୂର୍ବ ରାଗ ରଖି ସମ୍ପୃକ୍ତ ୪ଜଣ ତାଙ୍କ ବାପାଙ୍କୁ ହତ୍ୟା କରିଥିବା ରାମାଏଙ୍କ ପୁଅ ଏତଲାରେ ଦର୍ଶାଇଛନ୍ତି ।
ଗୁଣିଗାରେଡ଼ିରୁ ହତ୍ୟା, ଯୁବକଙ୍କ ଶବରେ ପଥର ବାନ୍ଧି ନଦୀକୁ ଫିଙ୍ଗିଲେ
