ଛାତ୍ରୀ ଅପହରଣ ଓ ଦୁଷ୍ମର୍ମ ମାମଲା: ଯୁବକ ଗିରଫ

ବ୍ରହ୍ମପୁର: ଜଣେ ନାବାଳିକାଙ୍କୁ ଅପହରଣ ସହ ଦୁଷ୍ମର୍ମ ମାମଲାରେ ଟାଉନଥାନା ପୁଲିସ ଆଜି ଜଣେ ଯୁବକଙ୍କୁ ଗିରଫ କରିଛି । ଅଭିଯୁକ୍ତ ଜଣଙ୍କ ଯାଜପୁର ଜିଲ୍ଲା ମଙ୍ଗଳପୁର ଥାନା ଅନ୍ତର୍ଗତ ଧନୀପୁର ଗ୍ରାମର ସଞ୍ଜୟ କୁମାର ବିଶ୍ୱାଳ(୨୮) ବୋଲି ପୁଲିସ କହିଛି । ପୁଲିସ ବ୍ରହ୍ମପୁର ରେଳଷ୍ଟେସନରୁ ଅପହୃତା ନାବାଳିକା ଛାତ୍ରୀଙ୍କୁ ଉଦ୍ଧାର କରିଛି । ଉଭୟ ଅଭିଯୁକ୍ତ ଓ ପିଡ଼ିତାଙ୍କ ଡାକ୍ତରୀ ମଇନା କରାଯାଇଥିବା ବେଳେ ଧାରା ୧୬୪ ଅନୁସାରେ କୋର୍ଟରେ ପିଡ଼ିତାଙ୍କ ବୟାନ ରେକର୍ଡ କରାଯାଇଛି । ପରେ କୋର୍ଟ ନିର୍ଦ୍ଦେଶ ଅନୁଯାୟୀ ସଞ୍ଜୟ ଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି ବୋଲି ପୁଲିସ କହିଛି । ସୂଚନାଯୋଗ୍ୟ ଯେ ଅଭିଯୁକ୍ତ ସଞ୍ଜୟ ବ୍ରହ୍ମପୁର ଟାଉନ ଥାନା ଅଞ୍ଚଳରେ ଥିବା ଏକ ହୋଟେଲରେ କାମ କରୁଥିଲେ । ସେ କୌଶଳକ୍ରମେ ଜଣେ ନାବାଳିକା ଛାତ୍ରୀଙ୍କ ସହ ପ୍ରେମ ସମ୍ପର୍କ ରଖିଥିଲେ । କିଛିଦିନ ତଳେ ସେ ଉକ୍ତ ଛତ୍ରୀଙ୍କୁ ଅପହରଣ କରି ନେଇଥିଲେ । ପରିବାର ଲୋକ ଏନେଇ ଟାଉନ ଥାନାରେ ଫେବୃୟାରୀ ୧୦ ତାରିଖରେ ଅଭିଯୋଗ କରିଥିଲେ । ଏହାକୁ କେନ୍ଦ୍ର କରି ପୁଲିସ ଏକ ମାମଲା ରୁଜୁ କରି ତଦନ୍ତ କରିଥିଲା । ଅଭିଯୁକ୍ତଙ୍କ ମୋବାଇଲ ଟ୍ରାକିଂ ବେଳେ ସେ ଛାତ୍ରୀଙ୍କୁ ନେଇ ସିକନ୍ଦରାବାଦ ଚାଲିଯାଇଥିବା ଜଣାପଡ଼ିଥିଲା । ସଞ୍ଜୟ ସମ୍ପୃକ୍ତ ଛାତ୍ରୀଙ୍କୁ ଧରି ମଙ୍ଗଳବାର ଟ୍ରେନ ଯୋଗେ ବ୍ରହ୍ମପୁର ଆସୁଥିବା ପୁଲିସ ଖବର ପାଇ ରେଳଷ୍ଟେସନରେ ଛକି ରହିଥିଲା । ସଞ୍ଜୟ ଟ୍ରେନରୁ ଓଲ୍ଲାଇବା ବେଳେ ପୁଲିସ ତାଙ୍କୁ କାବୁ କରିଥିଲା । ସେହିପରି ପୀଡ଼ିତାଙ୍କୁ ମଧ୍ୟ ସେଠାରୁ ଉଦ୍ଧାର କରିଥିବା ପୁଲିସ କହିଛି ।