କେନ୍ଦୁଝର: ନିଶାଗ୍ରସ୍ତ ପୁଅର ନିଶା ଛଡାଇ ଦେବେ । ଏପରିକି ଭଲକରି ପୁଣିଥରେ ଘରକୁ ଫେରାଇ ଆଣିବେ । ବାପା ମା’ଙ୍କ ମନରେ ଏପରି ବିଶ୍ୱାସ ଜନ୍ମାଇ ଆଖି ଆଗରୁ ପୁଅକୁ ନେଇଗଲେ ଦୁଇଜଣ ଯୁବକ । ଏହାପରେ ଆଉ ପୁଅର ପତ୍ତା ନପାଇବାରୁ ପରିବାର ଲୋକେ ଥାନାର ଦ୍ୱାରସ୍ଥ ହୋଇଥିବା ବେଳେ ଶେଷରେ ମିଳିଲା ପୁଅର ମୃତ୍ୟୁ ଖବର । ପୁଅକୁ ହତ୍ୟା କରି ଟାୟାର ସାହାଯ୍ୟରେ ନିଆଁ ଲଗାଇ ପୋଡି ଦିଆଯାଇଥିବା ବେଳେ ପୋଡ଼ା ମୃତଦେହକୁ ଜବତ କରିଛି ପୁଲିସ୍ ।
ଏପରି ଏକ ବିଭତ୍ସ ହତ୍ୟାକାଣ୍ଡ କେନ୍ଦୁଝର ଜିଲ୍ଲା ଟାଉନ୍ ଥାନା ଅଞ୍ଚଳରେ ଘଟିଛି । ମୃତକ ଜଣକ ହେଲେ ଟାଉନ୍ ଥାନା ଅନ୍ତର୍ଗତ ରାଙ୍କି ଗ୍ରାମର ସତ୍ୟବ୍ରତ ସ୍ୱାଇଁଙ୍କ ୨୨ବର୍ଷର ପୁଅ ଆଦିତ୍ୟ ନାରାୟଣ ସ୍ୱାଇଁ । ପରିବାର ଲୋକଙ୍କ ଅଭିଯୋଗ ଅନୁସାରେ ଆଦିତ୍ୟ କୁସଙ୍ଗରେ ପଡ଼ି ଅଧିକାଂଶ ସମୟରେ ନିଶା ସେବନ କରେ । ଯଶିପୁରସ୍ଥିତ ନିଶା ନିବାରଣ କେନ୍ଦ୍ରକୁ ନେଲେ ସେଠାରେ ପୁଅ ସମ୍ପୂର୍ଣ୍ଣ ନିଶାମୁକ୍ତ ହୋଇଯିବ ବୋଲି ସହରର ବବ୍ଲୁ ପାଢୀ ଓ ସ୍ୱରୂପ ନାମକ ଦୁଇଜଣ ଯୁବକ ସତ୍ୟବ୍ରତଙ୍କୁ କହିଥିଲେ । ସତ୍ୟବ୍ରତ ସେମାନଙ୍କ କଥାକୁ ବିଶ୍ୱାସକରି ପୁଅକୁ ଛାଡିଥିଲେ । ଏହାପରେ ସେମାନେ ଗତ ୨୨ତାରିଖରେ ବବଲୁ ଓ ସ୍ୱରୂପ ଏକ ଜିପ୍ରେ ଆଦିତ୍ୟଙ୍କୁ ତାଙ୍କ ଘରୁ ନେଇଥିଲେ । ବାଟରେ ଆଦିତ୍ୟଙ୍କର ବବଲୁ ଓ ସ୍ୱରୂପଙ୍କ ସହ ପ୍ରବଳ ଝଗଡ଼ା ହୋଇଥିଲା ।
ଏହାପରେ ଉଭୟ ବବଲୁ ଓ ସ୍ୱରୂପ ପ୍ରବଳ ମାଡ଼ମାରି ଆଦିତ୍ୟଙ୍କୁ ହତ୍ୟା କରିଥିବା ଜଣାପଡ଼ିଛି । ହତ୍ୟା ଘଟଣାକୁ ଲୁଚାଇବା ପାଇଁ ସାନଶିଆଳିନଈ ଗାଁ ନିକଟରେ ଥିବା ଏକ ବନ୍ଧ ହିଡ଼ ନିକଟରେ ନିଆଁ ଲଗାଇ ଅଭିଯୁକ୍ତମାନେ ମୃତଦେହକୁ ପୋଡ଼ି ଦେଇଥିଲେ । ଅପରପକ୍ଷେ ଆଦିତ୍ୟଙ୍କ ପରିବାର ଲୋକ ପୁଅର ନିଖୋଜ ନେଇ ଗତ ୨୭ ତାରିଖରେ ଟାଉନ୍ ଥାନାରେ ଅଭିଯୋଗ କରିବା ପରେ ପୁଲିସ୍ ଖୋଜାଖୋଜି ଆରମ୍ଭ କରିଥିଲା । ଗତକାଲି ଯଶିପୁର ପୁଲିସ ସହ ଟାଉନ୍ ଥାନା ପୁଲିସ ଯୋଗାଯୋଗ କରି ଉକ୍ତ ମୃତଦେହ ସମ୍ପର୍କରେ ସୂଚନା ପାଇଥିଲା । ତାହା ଆଦିତ୍ୟଙ୍କ ମୃତଦେହ ବୋଲି ସ୍ପଷ୍ଟ ହୋଇଛି । ମୟୂରଭଞ୍ଜ ପୁଲିସ୍ ଘଟଣାର ତଦନ୍ତକରି ୨ଜଣଙ୍କୁ ଗିରଫ କରିବା ସହ ବ୍ୟବହୃତ ଗାଡିକୁ ଜବତ କରିଛି । ତେବେ ଅଭିଯୁକ୍ତମାନେ କିପରି ହତ୍ୟା କଲେ ସେ ନେଇ ଆଜି କ୍ରାଇମ୍ ସିନ୍ ରିକ୍ରିଏସନ୍ କରାଯିବ । ଏଥିସହ ସାଇଣ୍ଟିଫିକ୍ ଟିମ୍ ଦ୍ୱାରା ତଦନ୍ତ କରାଯିବ ବୋଲି ଜଣାପଡିଛି ।
