ବାରିପଦା : ଚଉଦବର୍ଷ ବୟସ୍କା ଜଣେ ହାଇସ୍କୁଲ ଛାତ୍ରୀଙ୍କୁ ଯୌନ ନିର୍ଯାତନା ଅଭିଯୋଗରେ ଘରୋଇ ଟିଉସନ୍ ଶିକ୍ଷକ ସୁଭାଶିଷ ସାମଲ(୨୦) ଏବଂ ଉତ୍ତୋଳିତ ଭିଡିଓଗୁଡ଼ିକୁ ପ୍ରଘଟ କରିବା ଅଭିଯୋଗରେ ହରିଶଙ୍କର ନାୟକ(୩୮)ଙ୍କୁ ସ୍ଥାନୀୟ ଟାଉନ ଥାନା ପୁଲିସ ଗିରଫ କରିଥିବା ଜଣାପଡିଛି । ଏ ସମ୍ପର୍କରେ ନାବାଳିକାଙ୍କ ଅଭିଭାବକଙ୍କ ଅଭିଯୋଗକ୍ରମେ ବିଭିନ୍ନ ଧାରାରେ ଏକ ମାମଲା ରୁଜୁ ହୋଇଛି। ଥାନାଧିକାରୀ ବୀରେନ୍ଦ୍ର ସେନାପତି ଘଟଣାର ତଦନ୍ତ କରୁଛନ୍ତି ।
ଗିରଫ ଦୁଇ ଅଭିଯୁକ୍ତଙ୍କ ଘର ବାରିପଦା ୨୫ନମ୍ବର ୱାର୍ଡ ଦେବେନ୍ଦ୍ରପୁର ଅଞ୍ଚଳରେ । କିନ୍ତୁ ମୁଖ୍ୟ ଅଭିଯୁକ୍ତି ସୁଭାଶିଷଙ୍କ ନିଜ ଗ୍ରାମ ବାଲେଶ୍ୱର ଜିଲ୍ଲା ଭୋଗରାଇ ଥାନା ଜୟରାମପୁର ଗ୍ରାମରେ ବୋଲି ଜଣାପଡ଼ିଛି । ଅଭିଯୋଗ ଅନୁଯାୟୀ ଘରେ କେହି ନଥିବା ସୁଯୋଗ ନେଇ ଅଭିଯୁକ୍ତ ଜଣକ ନାବାଳିକାଙ୍କୁ ଧମକଚମକ ଦେଇ ଯୌନ ନିର୍ଯାତନା ଦେଇ ଆସୁଥିଲେ । ଏଥିରେ ବିବ୍ରତ ହୋଇ ନାବାଳିକା ଜଣକ ଦୁଇଥର ଆତ୍ମହତ୍ୟା କରିବା ପାଇଁ ଉଦ୍ୟମ କରିଥିବା ପ୍ରକାଶ ।
