ପୋଖରୀରେ ବୁଡି ଚାଲିଗଲା ଆଈ ଓ ନାତୁଣୀର ଜୀବନ

ବାଂଶପାଳ : ପୋଖରୀ ରେ ବୁଡି ଆଈ ଓ ନାତୁଣୀ ମୃତ । ଏଭଳି ଦୁଃଖଦ ଘଟଣା ଦେଖିବାକୁ ମିଳିଛି କେନ୍ଦୁଝର ଜିଲ୍ଲା ବାଂଶପାଳ ବ୍ଲକ ନୟାକୋଟ ଥାନା ଅନ୍ତର୍ଗତ ଭେଜିଡିହି ଗ୍ରାମରେ । ଆଜି ଗ୍ରାମର ଅମିନ ଡାଙ୍ଗୁଆଙ୍କ ମା’ ଅମୃତି ଡାଙ୍ଗୁଆ (୬୨) ଓ ଝିଅ ପୂଜା ଡାଙ୍ଗୁଆ (୧୦) ଆଜି ଅପରାହ୍ଣରେ ଘର ପାଖ ପୋଖରିକୁ ସାଙ୍ଗ ହୋଇ ଗାଧୋଇବାକୁ ଯାଇଥିଲେ । ପୋଖରୀରେ ଗାଧୋଇବା ସମୟରେ ଗୋଡ଼ ଖସି ଯିବାରୁ ପୋଖରୀରେ ବୁଡି ଯାଇଥିଲେ ଆଈ ନାତୁଣୀ । ପରିବାର ଲୋକେ ବହୁ ସମୟ ଖୋଜା ଖୋଜି କରି ନ ପାଇବାରୁ ପୋଖରୀ ଭିତରେ ଖୋଜାଖୋଜି କରିଥିଲେ । ପରେ ଉଭୟଙ୍କୁ ପୋଖରୀ ଭିତରୁ ଉଦ୍ଧାର କରିଥିଲେ । ପୁଲିସକୁ ଖବର ଦେଇଥିଲେ । ନୟାକୋଟ ପୋଲିସ ଘଟଣା ସ୍ଥଳରେ ପହଞ୍ଚି ଉଭୟଙ୍କ ମୃତଦେହ ଜବତ କରିବା ସହ ବ୍ୟବଛେଦ ପାଇଁ ମେଡିକାଲକୁ ପଠାଇଛି । ଆଈ ନାତୁଣୀଙ୍କ ମୃତ୍ୟୁକୁ ନେଇ ପରିବାର ଲୋକେ ଦୁଃଖରେ ଭାଙ୍ଗି ପଡିଛନ୍ତି । ଗ୍ରାମରେ ଶୋକାକୁଳ ପରିବେଶ ସୃଷ୍ଟି ହୋଇଛି । ସରକାରୀ ସହାୟତା ପ୍ରଦାନ କରିବାକୁ ଗ୍ରାମବାସୀ ଦାବି କରିଛନ୍ତି ।