ଏଟିପି ର‌୍ୟାଙ୍କିଙ୍ଗ୍‌: ଶୀର୍ଷରେ ଜୋକୋଭିଚ୍ କାଏମ୍‌

ପ୍ୟାରିସ୍ : ସୋମବାର ସଦ୍ୟ ଘୋଷିତ ଏଟିପି ର‌୍ୟାଙ୍କିଙ୍ଗ୍‌ରେ ସର୍ବିୟାର ନୋଭାକ୍ ଜୋକୋଭିଚ୍ ଏକ ନମ୍ବର ସ୍ଥାନରେ କାଏମ ରହିଛନ୍ତି । ସେହିପରି ରୁଷିଆର ଡାନଲ୍ ମେଡଭେଡେଭ୍ ଓ ଜର୍ମାନୀର ଆଲେକ୍‌ଜାଣ୍ଡର୍ ଜ୍ୱେରେଭ୍ ଯଥାକ୍ରମେ ଦ୍ୱିତୀୟ ଓ ତୃତୀୟ ସ୍ଥାନରେ ଅପରିବର୍ତ୍ତିତ ରହିଛନ୍ତି । ଶୀର୍ଷ ୧୦ରେ କୌଣସି ପରିବର୍ତ୍ତନ ହୋଇ ନ ଥିବା ବେଳେ ନବମ ସ୍ଥାନରେ ରହିଥିବା କାନାଡାର ଫେଲିକ୍ସ ଆଗର୍‌-ଆଲିସାଇମ୍ ଗତ ରବିବାର ରୋଟରଡାମ୍‌ଠାରେ ଏଟିପି ଟାଇଟଲ୍ ହାସଲ କରିବା ପରେ ଅଷ୍ଟମ ସ୍ଥାନ ନିକଟତର ହୋଇଛନ୍ତି । ସେହିପରି ଆମେରିକାର ଟେଲର୍ ଫ୍ରିଜ୍ ଡାଲାସ୍ ଓପନ୍‌ରେ କ୍ୱାର୍ଟର୍ ଫାଇନାଲ୍ ପର୍ଯ୍ୟନ୍ତ ଯିବା ଫଳରେ ଦୁଇଟି ସ୍ଥାନରେ ଉନ୍ନତି ଘଟାଇ ସପ୍ତଦଶ ସ୍ଥାନରେ ପହଞ୍ଚିଛନ୍ତି । ଏହି ଟୁର୍ଣ୍ଣାମେଣ୍ଟ୍ ଚାମ୍ପିଅନ୍ ରିଲି ଓପେଲ୍‌କା ୩ଟି ସ୍ଥାନ ଉପରକୁ ଉଠି ଶୀର୍ଷ ୨୦ ଖେଳାଳି ସୂଚୀରେ ପ୍ରବେଶ କରିଛନ୍ତି ।