ହିଜାବ ସହ ଶିଖ୍ ପଗଡ଼ିର ତୁଳନା କଲେ ସୋନମ୍ କପୁର, ସୋସିଆଲ ମିଡିଆରେ ଚାଲିଛି ପ୍ରବଳ ଝଡ଼

ମୁମ୍ବାଇ : କର୍ଣ୍ଣାଟକରୁ ଆରମ୍ଭ ହୋଇଥିବା ହିଜାବ ବିବାଦକୁ ନେଇ ସାରା ଦେଶରେ ଏବେ ବିବାଦୀୟ ସ୍ଥିତି ଲାଗି ରହିଛି । କିଛି ଲୋକ ଏହାକୁ ସମର୍ଥନ କରୁଥିବା ବେଳେ ଆଉ କିଛି ବିରୋଧ କରୁଛନ୍ତି । ଇତି ମଧ୍ୟରେ ବଲିଉଡ୍ ଅଭିନେତ୍ରୀ ସୋନମ୍ କପୁର ସୋସିଆଲ ମିଡିଆ ଜରିଆରେ ଏହି ମାମଲାରେ ନିଜ ରାୟ ରଖିଛନ୍ତି । ଏଭଳି ମାମଲାରେ ସୋନମ୍ ସବୁବେଳେ ନିଜ ବେପରୱା ରାୟ ପାଇଁ ଜଣାଶୁଣା । ସୋନମ୍ କପୁର ନିଜ ଇନ୍‌ଷ୍ଟାଗ୍ରାମ୍‌ରେ ଏକ ଷ୍ଟୋରୀ ସେୟାର କରିଛନ୍ତି । ଏହି ଫଟୋରେ ଗୋଟେ ପଟେ ଶିଖ୍ ଯୁବକ ପଗଡ଼ି ପିନ୍ଧିଥିବା ବେଳେ ଅନ୍ୟପଟେ ଜଣେ ମହିଳା ହିଜାବ ପିନ୍ଧିଛନ୍ତି । ଏହି ଫଟୋ ଉପରେ ଏକ ପ୍ରଶ୍ନ ଲେଖାଅଛି ଯେ ଶିଖ୍ ଯୁବକ ନିଜ ଇଚ୍ଛାରେ ପଗଡ଼ି ପିନ୍ଧିପାରିବେ । କିନ୍ତୁ ମୁସ୍‌ଲିମ୍ ମହିଳା କାହିଁକି ନୁହେଁ ଏହି ପୋଷ୍ଟରେ ସୋନମ୍ କପୁର ପଗଡ଼ିର ତୁଳନା ହିଜାବ ସହ କରିଛନ୍ତି । ସୋସିଆଲ ମିଡିଆରେ ସୋନମ୍ କପୁରଙ୍କ ଏହି ପୋଷ୍ଟକୁ ନେଇ ବିବାଦୀୟ ସ୍ଥିତି ଉପୁଜିଛି । ଏ ନେଇ ଲୋକମାନେ ନିଜ ପ୍ରତିକ୍ରିୟା ଦେଉଛନ୍ତି । କିଛି ଲୋକ ଏହାକୁ ଭୁଲ ବୋଲି କହୁଥିବା ବେଳେ ଆଉ କିଛି ସମର୍ଥନ କରୁଛନ୍ତି । ସୂଚନାଯୋଗ୍ୟ, କର୍ଣ୍ଣାଟକର ଉଡ୍ଡୁପୀ ସହରର ଏକ କଲେଜରେ ମୁସ୍‌ଲିମ୍ ଛାତ୍ରୀଙ୍କ ହିଜାବ ପିନ୍ଧିବାକୁ ନେଇ ବିବାଦ ଉପୁଜିଥିଲା । କିଛି ଲୋକ ଏହାକୁ ପ୍ରବଳ ବିରୋଧ ବି କରିଛନ୍ତି । ଫଳରେ ମାମଲା ଏବେ କୋର୍ଟରେ ପହଞ୍ଚିଛି । ଏ ନେଇ ରାଜନୈତିକ ବୟାନବାଜି ବି ଜାରି ରହିଛି ।