ଭୁବନେଶ୍ୱର: ପ୍ରେମ ସପ୍ତାହ ଚାଲିଛି । ଚାରିଆଡେ ପ୍ରେମମୟ ହୋଇଯାଇଛି । ପାର୍କ, ମଲ୍, ସିନେମା ହଲ୍ ସବୁଠି ଭିଡ ଲାଗିଛି । ଏହାରି ଭିତରେ ସହିଦନଗର ଥାନାରେ ଏକ ଧୋକ୍କା ପ୍ରେମ କାହାଣୀ ଆସି ପହଞ୍ଚିଛି । ବିବାହ କରିବାର ପ୍ରତିଶ୍ରୁତି ଦେଇ ପ୍ରେମିକ ପ୍ରତାରଣା କରିଥିବା ଜଣେ ଯୁବତୀ ଅଭିଯୋଗ କରିଥିଲେ । ଅଭିଯୋଗ ଆଧାରରେ ପୁଲିସ ତଦନ୍ତ କରି ପ୍ରେମିକଙ୍କୁ ଗିରଫ କରିଛି । ଗିରଫ ଅଭିଯୁକ୍ତ ଜଣକ ହେଲେ ଢ଼େଙ୍କାନାଳର ସିତେଶ କୁମାର ପ୍ରଧାନ । ଏନେଇ ପୁଲିସ ଆଇପିସି ଧାରା ୨୯୪, ୩୨୩, ୩୪୧, ୩୫୪, ୩୫୪ (ଡି) ଓ ୫୦୬ରେ ମାମଲା ରୁଜୁ କରି ସିତେଶଙ୍କୁ ଗୁରୁବାର କୋର୍ଟ ଚାଲାଣ କରିଛି । ସୂଚନା ଅନୁଯାୟୀ, ସହିଦନଗର ଥାନା ଅନ୍ତର୍ଗତ ଆଚାର୍ଯ୍ୟବିହାର ଅଞ୍ଚଳରେ ଥିବା ଏକ ହଷ୍ଟେଲରେ ତାଳଚେରର ରୂପା(ଛଦ୍ମନାମ) ରୁହନ୍ତି ।
୨୦୨୦ ମସିହାରେ ରୂପାଙ୍କୁ ସୋସିଆଲ ମିଡିଆରେ ସିତେଶ୍ ପ୍ରେମ ନିବେଦନ କରିଥିଲେ । କିନ୍ତୁ ପ୍ରଥମ ନିବେଦନରେ ସିତେଶଙ୍କ ପ୍ରସ୍ତାବକୁ ରୂପା ଏଡ଼ାଇ ଦେଇଥିଲେ । ପରେ ସିତେଶ ତାଙ୍କ ପଛରେ ମହୁମାଛି ଭଳି ପଡ଼ି ଯାଇଥିଲେ । ପ୍ରତ୍ୟେକଦିନ ହଷ୍ଟେଲ ସାମ୍ନାରେ ଛିଡା ହୋଇ ପ୍ରେମ ନିବେଦନ କଲେ । ଶେଷରେ ରୂପା ତାଙ୍କୁ ପସନ୍ଦ କରିବାକୁ ଲାଗିଲେ । କିଛିଦିନ ପରେ ତାଙ୍କୁ ପ୍ରେମ ନିବେଦନକୁ ଗ୍ରହଣ କଲେ । ଏହାପରେ ଉଭୟଙ୍କ ପାଇଁ ପ୍ରେମ ଋତୁ ଆରମ୍ଭ ହୋଇଥିଲା । ସିତେଶ ବିବାହର ପ୍ରତିଶ୍ରୁତି ଦେଇ ବାରମ୍ବାର ରୂପାଙ୍କ ସହ ଶାରୀରିକ ସମ୍ପର୍କ ରଖିଥିଲେ । ହେଲେ କିଛିଦିନ ପରେ ଉଭୟଙ୍କ ପ୍ରେମସମ୍ପର୍କରେ କଳାବାଦଲ ଆସିଗଲା । ସିତେଶଙ୍କ ଅସଲି ଚେହେରା ସାମ୍ନାକୁ ଆସିଥିଲା । ରୂପାଙ୍କ କହିବାନୁସାର, ସିତେଶଙ୍କ ଏକାଧିକ ଝିଅଙ୍କ ସହ ପ୍ରେମସମ୍ପର୍କ ଥିଲା ।
ସେ ସମସ୍ତଙ୍କ ନମ୍ବର ପୁଅ ପିଲାଙ୍କ ନାଁରେ ମୋବାଇଲ୍ରେ ସେଭ୍ କରି ରଖିଥିଲେ । ତାଙ୍କ ଗତିବିଧିରେ ସନ୍ଦେହ ହେବାରୁ ତାଙ୍କ ବିଷୟରେ ଜାଣିବାକୁ ଚେଷ୍ଟା କଲି । ପରେ ଜାଣିବାକୁ ପାଇଲି ଯେ ସିତେଶ ପୂର୍ବରୁ ବିବାହିତ । ଏମିତିକି ଦିନେ ଜଣେ ମହିଳା ଫୋନ୍ କରି ତାଙ୍କ ପ୍ରଥମ ସ୍ତ୍ରୀ’ ବୋଲି ଦାବି କରିଥିଲେ । ଏନେଇ ସିତେଶଙ୍କୁ ପଚାରିବାରୁ ସେ ତାଙ୍କ ସହ ଛାଡ଼ପତ୍ର ହୋଇଯାଇଥିବା କହିଥିଲେ। କିନ୍ତୁ ତାଙ୍କ ପ୍ରଥମ ସ୍ତ୍ରୀ’ଙ୍କ ଠାରୁ ସବୁ ଜାଣିବା ପରେ ରୂପା ଗତ ୬ ମାସ ତଳେ ସବୁ ସମ୍ପର୍କ ତୁଟାଇ ଦେଇଥିଲେ । ଯାହାକୁ ନେଇ ସିତେଶ ପାଗଳ ହୋଇଯାଇଥିଲେ । ରୂପାକୁ ପାଇବା ପାଇଁ ବାୟାଭଳି ହେଉଥିଲେ ।
ବେଳେବେଳେ ରୂପାଙ୍କ ହଷ୍ଟେଲ ଆଗକୁ ଯାଇ ଧମକ ଦେଉଥିଲେ । ଶେଷରେ ଉଭୟଙ୍କ ଅନ୍ତରଙ୍ଗ ମୁହୂର୍ତ୍ତର ଫଟୋ ଓ ଭିଡ଼ିଓକୁ ସିତେଶ ରୂପାଙ୍କ ଘରଲୋକଙ୍କୁ ପଠାଇ ଦେଇଥିଲେ । ଏତିକିରେ ତାଙ୍କର ପାଗଳାମି ସରିନଥିଲା । ଗତ ସପ୍ତାହରେ ସେ ଏକ ନକଲି ଫେସ୍ବୁକ୍ ଆକାଉଣ୍ଟ ଖୋଲିଥିଲେ । ସେଥିରେ ରୂପା ଓ ତାଙ୍କର କେତେକ ଅନ୍ତରଙ୍ଗ ମୁହୂର୍ତ୍ତର ଭିଡ଼ିଓ ପୋଷ୍ଟ କରିଥିଲେ । ଏସମ୍ପର୍କରେ ଜାଣିବା ପରେ ରୂପା ଥାନାରେ ଅଭିଯୋଗ କରିଥିଲେ । ଅଭିଯୋଗ ପରେ ପୁଲିସ ମାମଲା ରୁଜୁ କରି ପ୍ରେମିକ ସିତେଶଙ୍କୁ ଗିରଫ କରିଥିଲା ।
