ମଦ ପାଇଁ ଯୁବକଙ୍କ ଅଭାବନୀୟ କାଣ୍ଡ : ପୋଲିସ ମୁଣ୍ଡରେ ଲଗାଇଲେ ବନ୍ଧୁକ

ଭୁବନେଶ୍ୱର : ପୂର୍ବରୁ ପୁଲିସ ନାଁ ଶୁଣିଲେ ଅପରାଧୀଙ୍କ କଥା ଛାଡ଼ ସାଧାରଣ ଜନତା ଭୟରେ ଥରୁଥିଲେ । କିନ୍ତୁ ବର୍ତ୍ତମାନ ଅପରାଧୀମାନେ ପୁଲିସକୁ ଭୟ କରିବା ଦୂରର କଥା ସେମାନଙ୍କୁ ନାଲି ଆଖି ଦେଖାଇବାକୁ ପଛଉ ନାହାନ୍ତି । ଅନେକ ସ୍ଥାନରେ ପୁଲିସକୁ ସଂଘବଦ୍ଧ ଆକ୍ରମଣ କରାଯାଉଥିବା ମଧ୍ୟ ବାରମ୍ବାର ଦେଖିବାକୁ ମିଳୁଛି । କିନ୍ତୁ ଜଣେ ଯୁବକ ମଦ ପିଇବା ପାଇଁ ଶେଷରେ ପୁଲିସ ମୁଣ୍ଡରେ ବିଚ୍ ରାସ୍ତାରେ ବନ୍ଧୁକ ଲଗାଇ ଟଙ୍କା ମାଗିବା ସ୍ଥାନୀୟ ଅଞ୍ଚଳରେ ଆଲୋଡ଼ନର ବିଷୟ ପାଲଟିଛି । ପୁଲିସ ଶେଷରେ ସମ୍ପୃକ୍ତ ଯୁବକଙ୍କୁ କାବୁ କରି ଜେଲ୍ ହାଜତକୁ ପଠାଇସହ ଏକ ଖେଳନା ବନ୍ଧୁକ ଜବତ କରିଛି । ସୂଚନା ଅନୁଯାୟୀ ଚନ୍ଦ୍ରଶେଖରପୁର ଥାନା ଅନ୍ତର୍ଗତ ଶ୍ରୀବିହାରରେ ରହୁଥିବା ଶାଶ୍ୱତ ନାୟକ ନାମକ ଜଣେ ଯୁବକ ଶନିବାର ରାତ୍ର ପ୍ରାୟ ୧୦ଟା ସମୟରେ ଡମଣା ଛକ ନିକଟରେ ଛିଡ଼ାହୋଇଥିବା ଦୁଇ ଜଣ କିନ୍ନରଙ୍କ ନିକଟକୁ ଯାଇଥିଲେ । ପରେ ହଠାତ୍ ସେମାନଙ୍କୁ ଏକ ବନ୍ଧୁକ ଦେଖାଇ ଟଙ୍କା ମାଗିଥିଲେ । ଜଣେ କିନ୍ନର କୌଶଳ କ୍ରମେ ପିସିଆରକୁ କଲ୍ କରିବାରୁ କିଛି ସମୟ ମଧ୍ୟରେ ଘଟଣା ସ୍ଥଳରେ ପିସିଆର ପହଞ୍ଚିଥିଲା । ତେବେ ଶାଶ୍ୱତ ଘଟଣା ସ୍ଥଳକୁ ଆସିଥିବା ପିସିଆର କର୍ମଚାରୀଙ୍କ ମୁଣ୍ଡରେ ବନ୍ଧୁକ ଲଗାଇ ଦେଇଥିଲେ । ଏପରିକି ପୁଲିସ କର୍ମଚାରୀଙ୍କୁ ସେ ମଦ ପିଇବା ପାଇଁ ଟଙ୍କା ଦେବାକୁ ବାଧ୍ୟ କରିଥିଲେ । ଟଙ୍କା ନଦେଲେ ଜୀବନ ନେଇଯିବାକୁ ମଧ୍ୟ ଧମକ ଦେଇଥିଲେ । ପିସିଆର କର୍ମଚାରୀମାନେ କୌଶଳ କ୍ରମେ ଶାଶ୍ୱତଙ୍କୁ କାବୁ କରି ଥାନାକୁ ଆଣିଥିଲେ । ତେବେ ରବିବାର ତାଙ୍କୁ ଗିରଫ କରାଯିବା ସହ ତା ନିକଟରୁ ଏକ ଖେଳଣା ବନ୍ଧୁକ ଜବତ କରାଯାଇଥିବା ପୁଲିସ ସୂତ୍ରରୁ ପ୍ରକାଶ ।