କୋରାପୁଟ ଜିଲ୍ଲା ଜୟପୁର ବ୍ରାହ୍ମଣୀ ଗ୍ରାମରେ ବନ୍ଧୁକ ମୁନରେ ଗଣଦୁଷ୍କର୍ମ ଘଟଣା ପ୍ରସଙ୍ଗ
ଘଟଣା ଅବର୍ଣ୍ଣନୀୟ ଏବଂ ଅତ୍ୟନ୍ତ ଲଜ୍ଜାଜନକ
ଅଭିଯୁକ୍ତମାନେ ନିର୍ଭୟରେ ବାହାରେ ବୁଲୁଛନ୍ତି, କିନ୍ତୁ ପୋଲିସ ଖାଲି ହାତରେ
‘କ୍ରିମିନାଲାଇଜେସନ୍ ଇନ୍ ପଲିଟିକ୍ସ୍’କୁ ବନ୍ଦ ନକରିବା ଯାଏଁ ରାଜ୍ୟରେ ମହିଳାମାନେ ଅସୁରକ୍ଷିତ
ଭୁବନେଶ୍ୱର, : ରାଜ୍ୟ ସରକାରଙ୍କ ନାରୀ ସୁରକ୍ଷା କେବଳ ସ୍ଲୋଗାନରେ ସୀମିତ । ବିଜେଡି ଶାସନରେ ‘କ୍ରିମିନାଲାଇଜେସନ୍ ଇନ୍ ପଲିଟିକ୍ସ୍’ ର୍କମାଗତ ଭାବେ ବୃଦ୍ଧି ପାଇଚାଲିଛି । ଏହାର ସଦ୍ୟତମ ଉଦାହରଣ କୋରାପୁଟ ଜିଲ୍ଲା ଜୟପୁର ବ୍ରାହ୍ମଣୀ ଗ୍ରାମରେ ବନ୍ଧୁକ ମୁନରେ ଗଣଦୁଷ୍କର୍ମ ଘଟଣା ଏବଂ ଅପରାଧୀଙ୍କୁ ସୁରକ୍ଷା ଦେଉଥିବାର ରାଜ୍ୟ ସରକାର ପ୍ରମାଣିତ କରିଛନ୍ତି ବୋଲି ମହିଳା ମୋର୍ଚ୍ଚା ରାଷ୍ଟ୍ରୀୟ ସଂପାଦିକା ଡ.ଐଶ୍ୱର୍ଯ୍ୟା ବିଶ୍ୱାଳ କହିଛନ୍ତି ।
ବାସ୍ତବ ସ୍ଥିତି ଅନୁଧ୍ୟାନ କରି ସବିଶେଷ ସତ୍ୟାସତ୍ୟ ଜାଣିବା ପାଇଁ ଡ.ବିଶ୍ୱାଳଙ୍କ ନେତୃତ୍ୱରେ ବିଜେପି ମହିଳା ମୋର୍ଚ୍ଚାର ଏକ ପ୍ରତିନିଧି ଦଳ କୋରାପୁଟ ଜିଲ୍ଲା ବ୍ରାହ୍ମଣୀ ଗାଁକୁ ଗତ ଡିସେମ୍ବର ୩୧ ତାରିଖରେ ଗସ୍ତ କରିଥିଲେ । ଏହି ପ୍ରତିନିଧି ଦଳରେ କଳାହାଣ୍ଡି ଜିଲ୍ଲା ପରିଷଦ ଅଧ୍ୟକ୍ଷା ନମିତାରାଣୀ ସାହୁ, ରାଜ୍ୟ ସଂପାଦିକା ରଶ୍ମୀରେଖା ଦାସ ଏବଂ ବ୍ଲକ ଅଧ୍ୟକ୍ଷା ସରୋଜିନୀ ଦାସ ସାମିଲ ଥିଲେ ।
ଆଜି ରାଜ୍ୟ କାର୍ଯ୍ୟାଳୟଠାରେ ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ଡ.ବିଶ୍ୱାଳ କହିଛନ୍ତି ଯେ, ଏହି ଦୁଷ୍କର୍ମ ଘଟଣା ସ୍ଥାନୀୟ ଲୋକଙ୍କୁ ଆତଙ୍କିତ କରିଛି । ଗତ ଡିସେମ୍ବର ମାସ ୨୪ ତାରିଖରେ ବନ୍ଧୁକ ମୁନରେ ଭୟଭୀତ କରାଯାଇ ମହିଳାଙ୍କ ସହ ଯେଉଁ ଭଳି ଭାବେ ଗଣଦୁଷ୍କର୍ମ କରାଯାଇଛି, ତାହା ଅବର୍ଣ୍ଣନୀୟ ଏବଂ ଅତ୍ୟନ୍ତ ଲଜ୍ଜାଜନକ । ମହିଳାଙ୍କ ପରିବାର ତରଫରୁ ରୁଜୁ ହୋଇଥିବା ମାମଲା ଅନୁଯାୟୀ ମୁଖ୍ୟ ଅଭିଯୁକ୍ତ ଲାଲ୍ ବାହାଦୁର ଦର୍ଜୀ ଏବଂ ମୀନ ବାରିକଙ୍କୁ ଶାସକ ଦଳର ସୁରକ୍ଷା କାରଣରୁ ବର୍ତମାନ ସୁଦ୍ଧା ଗିରଫ କରାଯାଇ ନାହିଁ ଏବଂ ସେମାନେ ନିର୍ଭୟରେ ବାହାରେ ବୁଲୁଛନ୍ତି । ଏଭଳି ଅମାନବୀୟ ଘଟଣା ଘଟିବାର ୧୧ ଦିନ ବିତିଯାଇଥିଲେ ସୁଦ୍ଧା ପୋଲିସର ହାତ ଖାଲି ରହିବା ଅତ୍ୟନ୍ତ ଚିନ୍ତାଜନକ ପ୍ରସଙ୍ଗ ବୋଲି ଡ.ବିଶ୍ୱାଳ କହିଛନ୍ତି ।
ଜୟପୁର ବ୍ରାହ୍ମଣୀ ଗାଁ ମହିଳା ଗଣଦୁଷ୍କର୍ମ ଘଟଣାରେ ରାଜ୍ୟ ସରକାରଙ୍କ ମହିଳା ସୁରକ୍ଷା ନୀତିର ମିଛ ବାହାସ୍ପୋଟ ଆଜି ପୁଣି ପଦାରେ ପଡିଛି । ବିଜେଡି ଶାସନରେ, ମହିଳା ଓ ଶିଶୁ ବିପଦରେ । ପ୍ରତ୍ୟେକ ଦିନ ରାଜ୍ୟରେ ହାରାହାରି ୪ ଦୁଷ୍କର୍ମ ଓ ୬ ଅପହରଣ ଘଟଣା ଘଟୁଛି । ରାଜ୍ୟରେ ମହିଳା ହିଂସା ଓ ଦୁଷ୍କର୍ମ କ୍ରମାଗତ ଭାବେ ବୃଦ୍ଧି ପାଇଚାଲିଛି । ୨୦୧୯-୨୦୨୦ ବର୍ଷରେ ମହିଳା ହିଂସା ୯.୯୫ ପ୍ରତିଶତ ବୃଦ୍ଧି ପାଇଛି । ଗତ ୫ ବର୍ଷରେ ୨୭ ହଜାର ଶିଶୁ ନିଖୋଜ ଅଛନ୍ତି । ୨୦୨୦ ମସିହା ସୁଦ୍ଧା ପାଖାପାଖି ୧ ଲକ୍ଷ ୩୫ ହଜାର ମହିଳା ହିଂସା ଓ ନିର୍ଯ୍ୟାତନା ମାମଲା ବିଚାରଧିନ ସ୍ଥିତିରେ ଅଛି ବୋଲି ତଥ୍ୟ ପ୍ରକାଶ ପାଇଛି । ବିଭିନ୍ନ ଅପରାଧିକ ମାମଲରେ ସଂପୃକ୍ତ ଥିବା ଶାସକ ବିଜେଡିର ମନ୍ତ୍ରୀ ଓ ନେତାଙ୍କୁ ମୁଖ୍ୟମନ୍ତ୍ରୀ ସୁରକ୍ଷା ପ୍ରଦାନ କରୁଛନ୍ତି । ‘କ୍ରିମିନାଲାଇଜେସନ୍ ଇନ୍ ପଲିଟିକ୍ସ୍’କୁ ବନ୍ଦ ନକରିବା ଯାଏଁ ରାଜ୍ୟରେ ମହିଳାମାନେ ଅସୁରକ୍ଷିତ ବୋଲି ଡ.ବିଶ୍ୱାଳ କ୍ଷୋଭ ପ୍ରକାଶ କରି କହିଛନ୍ତି ।
ଜୟପୁର ବ୍ରାହ୍ମଣୀ ଗାଁ ପ୍ରସଙ୍ଗକୁ ନେଇ ବିଜେପି ଜୟପୁରରେ ରାଜରାସ୍ତାକୁ ଓହ୍ଲାଇଛି । ଅପରାଧୀମାନେ ତୁରନ୍ତ ଗିରଫ କରାଯିବା ସହିତ ଜୟପୁର ପୀଡିତାକୁ ତୁରନ୍ତ ନ୍ୟାୟ ମିଳୁ । ନଚେତ୍ ଆଗାମୀ ଦିନରେ ଏହି ଲଢେଇକୁ ରାଜ୍ୟବ୍ୟାପୀ ଆହୁରି ଶାଣିତ କରାଯିବ ବୋଲି ଡ.ବିଶ୍ୱାଳ କହିଛନ୍ତି ।
ଏହି ସାମ୍ବାଦିକ ସମ୍ମିଳନୀରେ ମହିଳା ମୋର୍ଚ୍ଚା ରାଜ୍ୟ ସମ୍ପାଦିକା ରଶ୍ମିରେଖା ଦାସ୍ ଉପସ୍ଥିତ ଥିଲେ ।
