ଭୁବନେଶ୍ୱର: ଭୁବନେଶ୍ୱର ଉପକଣ୍ଠ ତଥା ସ୍ଥାନୀୟ ଶିଶୁପାଳଗଡ଼ ଇନ୍ଦିରାକଲୋନୀ ଅଞ୍ଚଳରେ ଶନିବାର ଜଣେ ୧୭ ବର୍ଷୀୟ ନାବାଳିକାଙ୍କୁ ଅପହରଣ କରାଯାଇଥିବା ଅଭିଯୋଗ ହୋଇଛି । ନାବାଳିକାର ବାପା ଏସମ୍ପର୍କରେ ଧଉଳି ଥାନାରେ ଲିଖିତ ଅଭିଯୋଗ କରିଛନ୍ତି । ଅଭିଯୋଗ ପାଇ ପୋଲିସ ଘଟଣାର ତଦନ୍ତ ଆରମ୍ଭ କରିଛି । ଘଟଣାସ୍ଥଳରେ ପହଞ୍ଚି ଆଖପାଖ ଅଞ୍ଚଳରେ ସିସି କ୍ୟାମେରା ଫୁଟେଜକୁ ଯାଞ୍ଚ କରିଛି । ସୂଚନା ଅନୁଯାୟୀ, ପଶ୍ଚିମବଙ୍ଗ ମେଦିନିପୁର ଅଞ୍ଚଳର ଜଣେ ବ୍ୟକ୍ତି ଇନ୍ଦିରା କଲୋନି ଅଞ୍ଚଳରେ ଏକ ବସ୍ତିରେ ରହି ଟ୍ରଳି ଚଳାନ୍ତି । ସେ ଟ୍ରଲି ଚଳାଇବାକୁ ପଳାଇ ଯାଇଥିବା ବେଳେ ମା’ କୌଣସି କାମରେ ବାହାରକୁ ଯାଇଥିଲେ ।
ଏହାର ସୁଯୋଗ ନେଇ ଦୁଇଜଣ ଯୁବକ ନାଲିରଙ୍ଗର କାର ଲଗାଇ ନାବାଳିକାଙ୍କୁ ଅପହରଣ କରି ନେଇଥିଲେ । ଶନିବାର ନୂଆବର୍ଷ ଥିବାରୁ ପାଖ ପଡ଼ୋଶୀ ଭାବିଲେ ବନ୍ଧୁ ଘରକୁ ଯାଉଥିବା । ଏକଥା ଭାବି କିଛି ସନ୍ଦେହ କରିନଥିଲେ । ହେଲେ କିଛି ସମୟ ପରେ ବାପା-ମା’ ଘରକୁ ଫେରିବା ପରେ ନାବାଳିକାକୁ ଅପହରଣ କରାଯାଇଥିବା ଜଣାପଡ଼ିଥିଲା । ଏହାପରେ ପଡ଼ୋଶୀଙ୍କ ସହ ତାଙ୍କ ବାପା ଥାନାକୁ ଆସି ଅଭିଯୋଗ କରିଥିଲେ ।
