ଦୁବାଇ: ଭାରତର ଭେଟେରାନ୍ ଅଫ୍ସ୍ପିନର୍ ରବିଚନ୍ଦ୍ରନ୍ ଅଶ୍ୱିନ ବୁଧବାର ପ୍ରକାଶିତ ଆଇସିସି ଟେଷ୍ଟ ର୍ୟାଙ୍କିଙ୍ଗ୍ର ବୋଲିଂ ଓ ଅଲ୍ରାଉଣ୍ଡର୍ ବିଭାଗରେ ଦ୍ୱିତୀୟ ସ୍ଥାନ ବଜାୟ ରଖିଛନ୍ତି । ରବୀନ୍ଦ୍ର ଜାଡେଜା ଟେଷ୍ଟ ଅଲ୍ରାଉଣ୍ଡର୍ ତାଲିକାରେ ତୃତୀୟ ସ୍ଥାନରେ ସ୍ଥିର ରହିଛନ୍ତି । ରୋହିତ ଶର୍ମା ଓ ଅଧିନାୟକ ବିରାଟ କୋହଲି ମଧ୍ୟ ବ୍ୟାଟିଂ ତାଲିକାରେ ନିଜ ସ୍ଥାନ ବଜାୟ ରଖିଛନ୍ତି । ରୋହିତ ୭୯୭ ପଏଣ୍ଟ୍ ସହ ପଞ୍ଚମରେ ଏବଂ କୋହଲି ୭୫୬ ପଏଣ୍ଟ ସହ ସପ୍ତମ ସ୍ଥାନରେ ସ୍ଥିର ରହିଛନ୍ତି । ଅଷ୍ଟ୍ରେଲିଆର ମାର୍ନସ୍ ଲାବୁଶେନ୍ ୯୧୫ ପଏଣ୍ଟ ସହ ବ୍ୟାଟିଂ ତାଲିକାର ଶୀର୍ଷ ସ୍ଥାନ ବଜାୟ ରଖିଛନ୍ତି । ଇଂଲଣ୍ଡ ଅଧିନାୟକ ଜୋ ରୁଟ୍ ୯୦୦ ପଏଣ୍ଟ ସହ ଦ୍ୱିତୀୟ ସ୍ଥାନରେ ରହିଥିବା ବେଳେ ନ୍ୟୁଜିଲାଣ୍ଡ୍ ଅଧିନାୟକ କେନ୍ ୱିଲିୟମ୍ସନ୍ (୮୭୯) ତୃତୀୟ ସ୍ଥାନରୁ ଷ୍ଟିଭ୍ ସ୍ମିଥ୍ (୮୭୭)ଙ୍କୁ ହଟାଇ ଦେଇଛନ୍ତି ।
ରୋହିତ, ଡେଭିଡ୍ ୱାର୍ଣ୍ଣର୍, କୋହଲି, ଶ୍ରୀଲଙ୍କାର ଦିମୁଥ୍ କରୁଣାରତ୍ନେ, ପାକିସ୍ତାନର ବାବର ଆଜମ୍ ଓ ଅଷ୍ଟ୍ରେଲିଆର ଟ୍ରେଭିଡ୍ ହେଡ୍ ବ୍ୟାଟିଂ ତାଲିକାର ଶୀର୍ଷ ୧୦ରେ ସାମିଲ ଅଛନ୍ତି । ଟେଷ୍ଟ ବୋଲିଂରେ ଅଶ୍ୱିନ ଏକମାତ୍ର ଭାରତୀୟ ଭାବେ ଶୀର୍ଷ ୧୦ରେ ସାମିଲ ଅଛନ୍ତି। ତାଙ୍କ ରେଟିଂ ପଏଣ୍ଟ ୮୮୩ ରହିଛି । ଅଷ୍ଟ୍ରେଲୀୟ ଅଧିନାୟକ ପ୍ୟାଟ୍ କମିନ୍ସ ଏହି ତାଲିକାର ଶୀର୍ଷରେ ସ୍ଥିର ଥିବାବେଳେ ପାକିସ୍ତାନର ବାମହାତୀ ଫାଷ୍ଟ ବୋଲର୍ ଶାହିନ୍ ଶାହ ଆଫ୍ରିଦି ତୃତୀୟ ସ୍ଥାନରେ ରହିଛନ୍ତି । ତାଙ୍କ ପରେ ନ୍ୟୁଜିଲାଣ୍ଡର ଟିମ୍ ସାଉଦି ଓ ଇଂଲଣ୍ଡର ଜେମ୍ସ ଆଣ୍ଡରସନ୍ଙ୍କ ନମ୍ବର ରହିଛି । ଚଳିତ ଆଶେସ୍ ସିରିଜ୍ର ମେଲ୍ବର୍ଣ୍ଣ ଟେଷ୍ଟରେ ଅଷ୍ଟ୍ରେଲିଆ ପକ୍ଷରୁ ଡେବ୍ୟୁ କରିଥିବା ସ୍କଟ୍ ବୋଲାଣ୍ଡ୍ ନିଜର ଆକର୍ଷଣୀୟ ପ୍ରଦର୍ଶନ ପାଇଁ ପ୍ରଥମ ଥର ଆଇସିସି ଟେଷ୍ଟ ର୍ୟାଙ୍କିଙ୍ଗ୍ର ବୋଲିଂ ତାଲିକାରେ ସାମିଲ ହୋଇଛନ୍ତି ।
ମଙ୍ଗଳବାର ଇଂଲଣ୍ଡର ଦ୍ୱିତୀୟ ଇନିଂସ୍ରେ ୭ ରନ୍ ଦେଇ ୬ଟି ୱିକେଟ୍ ଅକ୍ତିଆର କରିଥିବା ଭିକ୍ଟୋରିଆର ଏହି ୩୨ ବର୍ଷୀୟ ଫାଷ୍ଟ ବୋଲର୍ ୨୭୧ ପଏଣ୍ଟ ସହ ୭୪ତମ ସ୍ଥାନରେ ହାସଲ କରିଛନ୍ତି । ଟେଷ୍ଟ ଅଲ୍ରାଉଣ୍ଡର୍ ତାଲିକା ଶୀର୍ଷରେ ୱେଷ୍ଟଇଣ୍ଡିଜ୍ର ଜେସନ୍ ହୋଲ୍ଡର୍ (୩୮୨) ରହିଛନ୍ତି । ବାଂଲାଦେଶର ଶାବିକ୍ ଅଲ୍ ହସନ୍ ଚତୁର୍ଥ ସ୍ଥାନରେ ଥିବା ବେଳେ ମିଚେଲ୍ ଷ୍ଟାର୍କ ପଞ୍ଚମ ଏବଂ ବେନ୍ ଷ୍ଟୋକ୍ସ ଷଷ୍ଠ ସ୍ଥାନରେ ଅଛନ୍ତି । ଟେଷ୍ଟ ଟିମ୍ ର୍ୟାଙ୍କିଙ୍ଗ୍ରେ ଭାରତ ୧୨୪ ପଏଣ୍ଟ ସହ ଶୀର୍ଷ ସ୍ଥାନରେ ଥିବାବେଳେ ନ୍ୟୁଜିଲାଣ୍ଡ ଓ ଅଷ୍ଟ୍ରେଲିଆ ଯଥାକ୍ରମେ ଦ୍ୱିତୀୟ ଓ ତୃତୀୟ ସ୍ଥାନ ହାସଲ କରିଛନ୍ତି । ପାକିସ୍ତାନ ଉପରେ ଇଂଲଣ୍ଡ ଚତୁର୍ଥ ସ୍ଥାନରେ ରହିଛି ।
