ଭୋପାଳ: ଦିନକୁ ଦିନ ନାରୀ ମାନଙ୍କୁ ନିର୍ୟାତନା ଦେବା ସହ ହତ୍ୟା କରାଯିବା ଭଳି ଘଟଣା ଦିନକୁ ଦିନ ବଢି ଚାଲିଛି । ସେପଟେ ପୁରୀ ଦୁଷ୍କର୍ମ ଏବଂ ହାଇଦ୍ରାବାଦ ଭେଟେନାରୀ ଛାତ୍ରୀଙ୍କୁ ଦୁଷ୍କର୍ମ ପରେ ପୋଡି ଦେବା ଭଳି ଘଟଣା ମନରୁ ନ ଲିଭୁଣୁ ପୁଣି ଏକ ଭୟଙ୍କର ଘଟଣା ସାମ୍ନାକୁ ଆସିଛି । ତେବେ ଏଭଳି ଭୟଙ୍କର ଲୋମହର୍ଷଣକାରୀ ଘଟଣା ଭୋପାଳରେ ଦେଖିବାକୁ ମିଳିଛି । ଜଣେ ଅସହାୟ ୪ବର୍ଷୀୟ ଶିଶୁକନ୍ୟାକୁ ଦୁଷ୍କର୍ମ କରାଯିବା ପରେ ହତ୍ୟା କରାଯାଇଛି । ଏହି ଘଟଣା ମଧ୍ୟପ୍ରଦେଶର ମହୱଠାରେ ହୋଇଥିବା ସୂଚନା ମିଳିଛି ।
ସୂଚନା ଅନୁସାରେ, ଘର ଦ୍ୱାର ନଥିବା ଜଣେ ୪ ବର୍ଷୀୟ ଶିଶୁକନ୍ୟାର ଅସହାୟତାର ଫାଇଦା ଉଠାଇ ତାଙ୍କୁ ଦୁଷ୍କର୍ମ ପରେ ହତ୍ୟା ଭଳି କାଣ୍ଡ ଭିଆଇଛି ଜଣେ ଡିଜେ । ଘଟିଥିବା ଏହି ଘଟଣାରେ ପୁଲିସ୍ ସଂପୃକ୍ତ ଡିଜେକୁ ଗିରଫ କରିଛି। ପୁଲିସ୍ ସ୍ଥାନୀୟ ଅଞ୍ଚଳରେ ଲାଗିଥିବା ୫୦ଟି ସିସିଟିଭି ଫୁଟେଜକୁ ଯାଞ୍ଚ କରିବା ପରେ ଡିଜେଙ୍କ କୁକର୍ମ ସମ୍ପର୍କରେ ତଥ୍ୟ ହାସଲ କରିପାରି ଥିଲା । ଡିଜେ ବିବାହିତ ହୋଇଥିବା ବେଳେ ତାଙ୍କ ପତ୍ନୀ ଗର୍ଭବତୀ ଅଛନ୍ତି।
ଅଭିଯୁକ୍ତ ଜଣଙ୍କ ପ୍ରଥମେ ଶ୍ରମିକ ଭାବେ କାମ କରୁଥିବା ଓ ଖୋଲା ଆକାଶ ତଳେ ରାତି କାଟୁଥିବା ଶିଶୁଟିର ପରିବାର ଲୋକଙ୍କ ପାଖରେ ପହଞ୍ଚିଥିଲା। ଏହି ସମୟରେ ଶିଶୁକନ୍ୟାଟି ତାଙ୍କ ବାପାମା’ଙ୍କ ସହ ଶୋଇଥିଲେ । ରାତି ପ୍ରାୟ ୨.୧୫ରେ ଅଭିଯୁକ୍ତ ଜଣଙ୍କ ରାସ୍ତାରେ ବୁଲୁଥିବାରୁ କୁକୁରମାନେ ମଧ୍ୟ ତା’କୁ ଭୋକିଥିଲେ। ହେଲେ ସେ ସେମାନଙ୍କୁ ପଥର ମାରି ବିଦା କରିଦେଇଥିଲା। ଏହାପରେ ସେ ବାପାମା’ଙ୍କ ପାଖରେ ଶୋଇଥିବା ୪ ବର୍ଷର ଶିଶୁ କନ୍ୟାକୁ ଅପହରଣ କରିବା ସହ ନିକଟସ୍ଥ ଏକ ପରିତ୍ୟକ୍ତ କୋଠାରେ ଦୁଷ୍କର୍ମ କରିଥିଲା । ଶିଶୁଟି କାନ୍ଦିବାରୁ ସେ ତା’ର ତଣ୍ଟି ଚିପି ହତ୍ୟା କରିଥିଲା। ସିସିଟିଭିକୁ ବିସ୍ତୃତ ଭାବେ ତର୍ଜମା କରିବା ପରେ ଅଭିଯୁକ୍ତ ଜଣଙ୍କ ଚିହ୍ନଟ ହୋଇଥିଲା ଏବଂ ଆମେ ତାକୁ ଗିରଫ କରିଛୁ ବୋଲି ପୁଲିସ୍ କହିଛି। ଅନ୍ୟପକ୍ଷରେ ବାହାଘରରେ ମ୍ୟୁଜିକ ବଜାଉଥିବା ଏହି ବ୍ୟକ୍ତି ଜଣଙ୍କ ଗତବର୍ଷ ଏକ ରେଳ ଷ୍ଟେସନ ନିକଟରେ ଜଣେ ୭୦ ବର୍ଷୀୟ ବୃଦ୍ଧାଙ୍କୁ ମଧ୍ୟ ଦୁଷ୍କର୍ମ କରିବାକୁ ଉଦ୍ୟମ କରିଥିଲା। ହେଲେ କୌଣସି ପୁଲିସ୍ ଅଭିଯୋଗ ନ ହେବାରୁ ସେ ଖସି ଯାଇଥିଲା।
୪ବର୍ଷର ଶିଶୁକନ୍ୟାକୁ ଦୁଷ୍କର୍ମ ପରେ ହତ୍ୟା
