ଭୁବନେଶ୍ୱର: ବ୍ରାଉନ ସୁଗର ବିକ୍ରି ବେଳେ ୫ ଜଣଙ୍କୁ ଗିରଫ କରିଛି ଲକ୍ଷ୍ମୀସାଗର ଥାନା ପୁଲିସ । ଗିରଫ ବ୍ୟକ୍ତିମାନେ ହେଲେ କେନ୍ଦ୍ରାପଡ଼ା ଜିଲ୍ଲାର ଅବଦୁଲ ଅବଜିଜ୍ ଖାନ(୨୫) ଓ ଚନ୍ଦନ କୁମାର ପରିଡା(୨୦) ସେହି ଭଳି ଭୁବନେଶ୍ୱର ଲକ୍ଷ୍ମୀସାଗର ଥାନା ଅନ୍ତର୍ଗତ ମାଧବ ରାଓ(୧୯) ଓ ସୋଭନ ଦାସ(୧୮) ଏବଂ ନୟାଗଡ଼ ଜିଲ୍ଲାର ବିଭୁ ପ୍ରଶାଦ ନାୟକ(୨୪) ବୋଲି ଜଣାପଡିଛନ୍ତି । ସୂଚନ ମୁତବାତ ଚିନ୍ତାମଣିଶ୍ୱର ପୋଖରୀ ଅନ୍ତର୍ଗତ ଲେନ-୩ ନିକଟରେ କିଛି ଯୁବକ ବ୍ରାଉନ ସୁଗର ବିକ୍ରି କରୁଥିବାର ଖବର ପାଇଥିଲେ ଲକ୍ଷ୍ମୀସାଗର ଥାନାଧିକାରୀ ।
ସୂଚନା ଆଧାରରେ ଥାନାର ଏକ ସ୍ପେଶାଲ ଟିମ ଉକ୍ତ ସ୍ଥାନରେ ସଦଳବଳେ ଅତର୍କିତ ଚଢଉ କରିଥିଲେ । ଫଳରେ ସେଠାରେ ବ୍ରାଉନ ସୁଗାର ବିକ୍ରି କରିବାକୁ ଉଦ୍ୟମ କରୁଥିବା ପାଞ୍ଚଜଣଙ୍କୁ କାବୁ କରିବାରେ ସକ୍ଷମ ହୋଇଥିଲା ପୁଲିସ । ସେଠାରେ ଛାନଭିନ ସମୟରେ ପୁଲିସ ଯୁବକମାନଙ୍କ ନିକଟରୁ ମୋଟ ୧୯ ଗ୍ରାମ ଓଜନର ବ୍ରାଉନ ସୁଗାର, ଦୁଇଟି ଦୁଇଚକିଆ ଗାଡି ଏବଂ ୭୫୦ ଟଙ୍କା ଜବତ କରିଥିଲେ ।
ପଚରାଉଚରା ବେଳେ ସେମାନେ ବଲେଶ୍ୱର ଅଞ୍ଚଳରୁ ବ୍ରାଉନ ସୁଗର ଆଣି ଏଠାରେ ବିକ୍ରି କରୁଥିବାର ମିନିଥିଲେ ।ଏହି ଘଟଣାକୁ କେନ୍ଦ୍ରକରି ଲକ୍ଷ୍ମୀସାଗର ଥାନା ପୁଲିସ ଏକ ବେଆଇନ ବ୍ରାଉନସୁଗାର ବିକ୍ରି ଜନିତ ମାମଲା ରୁଜୁ କରି ସମସ୍ତଙ୍କୁ କୋର୍ଟ ଚାଲାଣ କରିଛନ୍ତି ।
