ଅଷ୍ଟମ ଶ୍ରେଣୀ ଛାତ୍ରୀଙ୍କୁ ବିବାହ କଲେ ୪୦ ବର୍ଷୀୟ ବ୍ୟକ୍ତି

ହାଇଦ୍ରାବାଦ: ତେଲଙ୍ଗାନାରେ ଜଣେ ୧୩ ବର୍ଷୀୟା ଅଷ୍ଟମ ଶ୍ରେଣୀ ଛାତ୍ରୀଙ୍କୁ ଏକ ୪୦ ବର୍ଷୀୟ ବିବାହିତ ବ୍ୟକ୍ତିଙ୍କ ସହ ବିବାହ କରାଇଥିବା ଘଟଣା ସାମ୍ନାକୁ ଆସିଛି। ଏହି ଅବୈଧ ଘଟଣାକୁ ନେଇ ସମାଜସେବୀ ଓ ଅଭିଭାବକମାନେ ତୀବ୍ର ନିନ୍ଦା କରିଛନ୍ତି। ଛାତ୍ରୀଙ୍କ ସ୍କୁଲର ଜଣେ ଶିକ୍ଷକ ଏହି ଘଟଣା ସମ୍ପର୍କରେ ପୋଲିସକୁ ସୂଚନା ଦେଇଥିଲେ। ପୋଲିସ ଅଭିଯୁକ୍ତ ବ୍ୟକ୍ତି, ତାଙ୍କ ସ୍ତ୍ରୀ, ବିବାହ କାର୍ଯ୍ୟକ୍ରମରେ ପୂଜା କରାଇଥିବା ପୁରୋହିତ ଏବଂ ଏହି ଅବୈଧ ବିବାହ ଆୟୋଜନରେ ସହାୟତା କରିଥିବା ଜଣେ ମଧ୍ୟସ୍ଥଙ୍କ ବିରୋଧରେ ମାମଲା ରୁଜୁ କରିଛି। ଘଟଣାଟି ହାଇଦ୍ରାବାଦଠାରୁ ୫୫ କିମି ଦୂରରେ ଥିବା ନନ୍ଦିଗାମାରେ ଘଟିଥିଲା। ପୋଲିସକୁ ପ୍ରଦାନ କରାଯାଇଥିବା ଭିଡିଓ ଫୁଟେଜରେ ଅଷ୍ଟମ ଶ୍ରେଣୀର ଛାତ୍ରୀ ଜଣଙ୍କ ମାଲା ଧରି ୪୦ ବର୍ଷୀୟ ବ୍ୟକ୍ତିଙ୍କ ସାମ୍ନାରେ ଠିଆ ହୋଇଥିବା ଦେଖାଯାଇଛି। ସେମାନଙ୍କ ପାଖରେ ଅଭିଯୁକ୍ତଙ୍କ ସ୍ତ୍ରୀ ଓ ପୁରୋହିତ ମଧ୍ୟ ଉପସ୍ଥିତ ଥିଲେ। କୈଳାସ ସତ୍ୟାର୍ଥି ଚିଲଡ୍ରେନ୍ସ ଫାଉଣ୍ଡେସନର ରିପୋର୍ଟ ଅନୁଯାୟୀ, ଭାରତରେ ବାଲ୍ୟ ବିବାହ ଶିଶୁଙ୍କ ବିରୋଧରେ ହେଉଥିବା ଏକ ଗୁରୁତର ଅପରାଧ। ୨୦୦୬ ମସିହାରେ ପ୍ରଣୟନ ହୋଇଥିବା ‘ବାଲ୍ୟ ବିବାହ ନିଷେଧ ଆଇନ’ ସତ୍ତ୍ୱେ କିଛି ରାଜ୍ୟରେ ଏହା ଏବେ ମଧ୍ୟ ଚାଲିଛି। ବାଲ୍ୟ ବିବାହ ଶିଶୁଙ୍କ ଶୈଶବ ଶେଷ କରିଦେଇ ସେମାନଙ୍କୁ ହିଂସା, ଶୋଷଣ ଓ ନିର୍ଯାତନାର ଶିକାର କରୁଛି। ଏହା ସେମାନଙ୍କର ଶିକ୍ଷା, ସ୍ୱାସ୍ଥ୍ୟ ଓ ସୁରକ୍ଷା ଅଧିକାରକୁ ମଧ୍ୟ କ୍ଷତିଗ୍ରସ୍ତ କରୁଛି। ଇଣ୍ଡିଆ ଚାଇଲ୍ଡ ପ୍ରୋଟେକ୍ସନର ଜୁଲାଇ ୨୦୨୪ ରିପୋର୍ଟ ଅନୁଯାୟୀ, ଆସାମରେ ବାଲ୍ୟ ବିବାହ ବିରୋଧୀ ଅଭିଯାନ ଅତ୍ୟନ୍ତ ସଫଳ ହୋଇଛି। ୨୦୨୧-୨୨ରୁ ୨୦୨୩-୨୪ ମଧ୍ୟରେ ଆସାମର ୨୦ଟି ଜିଲାରେ ବାଲ୍ୟ ବିବାହରେ ୮୧ ପ୍ରତିଶତ ହ୍ରାସ ପାଇଛି।