ନୂଆଦିଲ୍ଲୀ : ଆମ ଦେଶରେ ଜନସଂଖ୍ୟା ବୃଦ୍ଧି ବଡ଼ ସମସ୍ୟା ହୋଇଥିବାବେଳେ ପଡ଼ୋଶୀ ଚୀନ୍ରେ ବୟସ୍କଙ୍କ ଜନସଂଖ୍ୟା ବୃଦ୍ଧି ଓ ଯୁବବର୍ଗଙ୍କ ସଂଖ୍ୟା ହ୍ରାସ ଦେଶର ଚିନ୍ତା ବଢ଼ାଇଛି । ଏହି ସ୍ଥିତିରେ ସେଠାରେ ସରକାର ଏବେ ୩ୟ ସନ୍ତାନ ନୀତି ଆପଣେଇଛନ୍ତି । ଏହି ନୀତି ଅନ୍ତର୍ଗତ ଚୀନ୍ରେ ଏବେ ୩ୟ ସନ୍ତାନ ଜନ୍ମ ପାଇଁ ଲୋକଙ୍କୁ ପ୍ରୋତ୍ସାହିତ କରାଯାଉଛି ।
ସୂଚନାଯୋଗ୍ୟ, ପୂର୍ବରୁ ଜନସଂଖ୍ୟା ବୃଦ୍ଧି ଯୋଗୁ ଚୀନ୍ରେ ଗୋଟିଏ ସନ୍ତାନ ନୀତି ଲାଗୁ କରାଯାଇଥିଲା । ଏହା ଦ୍ୱାରା ଜନସଂଖ୍ୟା ହ୍ରାସ ପାଇଲା ସତ, କିନ୍ତୁ ଅର୍ଥବ୍ୟବସ୍ଥା ଉପରେ ପ୍ରଭାବ ପଡ଼ିବା ଆରମ୍ଭ ହେଲା । ଏବେ ଏହି ନୀତି ବନ୍ଦ କରି ଦେଶର ଯୁବ ପରିବାରଙ୍କୁ ୨ ଓ ୩ ସନ୍ତାନ ଜନ୍ମ ପାଇଁ ପ୍ରୋତ୍ସାହିତ କରାଯାଉଛି । ଚଳିତ ମାସରୁ ଏଠାରେ ୩ୟ ସନ୍ତାନ ନୀତି ଲାଗୁ ହୋଇଛି । ଏବେ ଏଠାକାର କମ୍ପାନିଗୁଡ଼ିକ ମଧ୍ୟ ନିଜ କର୍ମଚାରୀଙ୍କୁ ୩ୟ ସନ୍ତାନ ଜନ୍ମରେ ବୋନସ୍ ଏବଂ ମହିଳା କର୍ମଚାରୀଙ୍କୁ ୧ ବର୍ଷ ଛୁଟି ଅଫର୍ ଦେଉଛନ୍ତି ।
ବେଜିଂ ଡାବିନଙ୍ଗ ଟେକ୍ନୋଲୋଜି ଗ୍ରୁପ୍ ନାମକ କମ୍ପାନି ତା’ର କର୍ମଚାରୀଙ୍କୁ ୩ ସନ୍ତାନ ଜନ୍ମ ଦେଲେ, ସାଢ଼େ ୧୧ ଲକ୍ଷ ଟଙ୍କାର ବୋନସ୍ ଅଫର୍ ଦେଇଛି । ସେତିକି ନୁହେଁ, ଯଦି ଜଣେ ମହିଳା କର୍ମଚାରୀ ୩ୟ ସନ୍ତାନ ଜନ୍ମ ଦେଉଥାନ୍ତି³ ତେବେ ତାଙ୍କୁ ୧ ବର୍ଷ ଛୁଟି ମିଳିବ । ଅନ୍ୟପକ୍ଷେ, ଶିଶୁକୁ ସମ୍ଭାଳିବା ପାଇଁ ପୁରୁଷ କର୍ମଚାରୀଙ୍କୁ ୯ ମାସ ଛୁଟି ମିଳିବ । ଯେଉଁ କର୍ମଚାରୀ ୨ୟ ସନ୍ତାନ ଜନ୍ମ କରୁଛନ୍ତି, ସେମାନଙ୍କୁ ମଧ୍ୟ ୭ ଲକ୍ଷ ଟଙ୍କାର ବୋନସ୍ ମିଳିବ । ପ୍ରଥମ ସନ୍ତାନ ଜନ୍ମ ଦେଉଥିବା କର୍ମଚାରୀଙ୍କୁ ୩.୫ ଲକ୍ଷ ଟଙ୍କାର ବୋନସ୍ ପ୍ରଦାନ କରାଯିବ ।
