ଭୁବନେଶ୍ୱର: ରାଜ୍ୟରେ ଉଚ୍ଚଶିକ୍ଷା କ୍ଷେତ୍ରରେ ସଂସ୍କାର ଆଣିବାକୁ ବିଭାଗ ପକ୍ଷରୁ ବ୍ୟାପକ ବ୍ୟବସ୍ଥାର କରାଯାଇଛି । +୩ ପରୀକ୍ଷା ପରିଚାଳନାରେ ସଂସ୍କାର ଆଣିବାକୁ ପ୍ରୟାସ କରାଯାଉଥିବା ବେଳେ ପିଲାଙ୍କ ଉଜ୍ଜ୍ୱଳ ଭବିଷ୍ୟତକୁ ଗୁରୁତ୍ୱ ଦେଇ ଯେପରି ପରୀକ୍ଷା ଶେଷହେବାର ୪୫ଦିନ ମଧ୍ୟରେ ରେଜଲ୍ଟ ପ୍ରକାଶ ପାଇବ ସେଥିପାଇଁ ସ୍ୱତନ୍ତ୍ର ପଦକ୍ଷେପ ଗ୍ରହଣ କରିବାକୁ ନିର୍ଦ୍ଦେଶ ଦିଆଯାଇଛି ।
ରାଜ୍ୟରେ ପ୍ରତିବର୍ଷ +୩ କଳା, ବିଜ୍ଞାନ, ବାଣିଜ୍ୟ ଏବଂ କିଛି ନିର୍ଦ୍ଦଷ୍ଟ ବିଷୟରେ ସେଲ୍ଫେଫାଇନାନ୍ସ ପାଠ୍ୟକ୍ରମରେ ପ୍ରାୟ ଅଢ଼େଇ ଲକ୍ଷ ପିଲା ପରୀକ୍ଷା ଦେଉଛନ୍ତି । ତେବେ ଗତ କିଛି ବର୍ଷ ହେବ +୩ ରେଜଲ୍ଟ ପ୍ରକାଶରେ ବିଭିନ୍ନ ସମସ୍ୟା ସୃଷ୍ଟି ହେଉଥିବା ଅଭିଯୋଗ ହେବା ପରେ ଏହି ପରୀକ୍ଷାରେ ରେଜଲ୍ଟ ପ୍ରକାଶରେ ସଂସ୍କାର ଲାଗି ପଦକ୍ଷେପ ଗ୍ରହଣ କରାଯାଉଛି ।
ତେବେ ଏଣିକି ଏକାଡେମିକ କ୍ୟାଲେଣ୍ଡର ଅନୁଯାୟୀ, ମାର୍ଚ୍ଚରେ +୩ ପରୀକ୍ଷା ଶେଷ ହେବା ସହ ମେ’ ୧୫ ତାରିଖ ସୁଦ୍ଧା ରେଜଲ୍ଟ ପ୍ରକାଶ କରିବାକୁ ନିଷ୍ପତ୍ତି ହୋଇଛି । ଏପରିକି ପ୍ରତିବର୍ଷ ସର୍ବଭାରତୀୟସ୍ତରରେ ପିଜି ପ୍ରବେଶିକା ପରୀକ୍ଷା ପୂର୍ବରୁ ରେଜଲ୍ଟ ପ୍ରକାଶ କରିବା ସହ ରିଚେକିଂ ପ୍ରକ୍ରିୟା ମଧ୍ୟ ଶେଷ କରିବାକୁ କୁହାଯାଇଛି । ତେବେ ରିଚେକିଂ ପ୍ରକ୍ରିୟା ମାସକ ମଧ୍ୟରେ ସରିବ । ପୂର୍ବରୁ ଅନେକ ମେଧାବୀଙ୍କ ମୂଲ୍ୟାଙ୍କନରେ ତ୍ରୁଟି ରହିଥିବା ବେଳେ ଏହା ପରବର୍ତ୍ତୀ ସମୟରେ ରିଚେକିଂ ସମୟରେ ପରିବର୍ତ୍ତନ କରାଯାଇଥାଏ । ମାତ୍ର ସେତେବେଳକୁ ରାଜ୍ୟ ତଥା ଦେଶର ବିଭିନ୍ନ ବିଶ୍ୱବିଦ୍ୟାଳୟର ପିଜି ପ୍ରବେଶିକା ପରୀକ୍ଷା ଶେଷ ହୋଇ ରେଜଲ୍ଟ ପ୍ରକାଶ ପାଇସାରିଥିବାରୁ ପ୍ରତିବର୍ଷ ଅନେକ ମେଧାବୀ ଏପରି ସମସ୍ୟାର ସମ୍ମୁଖୀନ ହେଉଛନ୍ତି । ତେବେ ଯେପରି କୌଣସି ମେଧାବୀ ଛାତ୍ରଛାତ୍ରୀ ଉଚ୍ଚଶିକ୍ଷା କ୍ଷେତ୍ରରେ ପଢ଼ିବାରୁ ବଞ୍ôଚତ ନହୁଅନ୍ତି ସେଥିଲାଗି ସବୁ ବିଶ୍ୱବିଦ୍ୟାଳୟର କର୍ତ୍ତୃପକ୍ଷଙ୍କୁ ଅବଗତ କରାଯାଇଛି ।
ଉଚ୍ଚଶିକ୍ଷା ବିଭାଗ ପକ୍ଷରୁ ପ୍ରସ୍ତୁତ ହୋଇଥିବା ଏକାଡେମିକ କ୍ୟାଲେଣ୍ଡରକୁ କଡ଼ାକଡ଼ି ଭାବେ ପାଳନ କରିବାକୁ କୁହାଯାଇଛି । ନିର୍ଦ୍ଧାରିତ ସମୟ ମଧ୍ୟରେ ପରୀକ୍ଷା ଶେଷକରି ରେଜଲ୍ଟ ପ୍ରକାଶ କରିବା ସହ ରିଚେକିଂ ଏବଂ ବ୍ୟାକ୍ ରେଜଲ୍ଟକୁ ମଧ୍ୟ ସଠିକ ସମୟ ମଧ୍ୟରେ ପ୍ରକାଶ କରିବାକୁ ନିର୍ଦ୍ଦେଶ ଦିଆଯାଇଛି । ଏହି ବ୍ୟବସ୍ଥା ସମ୍ପର୍କରେ ଜଣେ ପ୍ରଫେସରଙ୍କୁ ପଚାରିବାକୁ ସେ କହିଛନ୍ତି ଯେ କିଛି କଲେଜରେ +୩ ପାଠପଢ଼ା ନିର୍ଦ୍ଧାରିତ ସମୟ ମଧ୍ୟରେ ଶେଷ ହେଉନଥିବାରୁ ପରୀକ୍ଷା ଲାଗି ବିଳମ୍ବ ହେଉଛି । ତଥାପି ୨ବର୍ଷ ହେବ ପରୀକ୍ଷା ପରିଚାଳନାରେ ସୁଧାର ଆସିଥିବା ବେଳେ କିଛି ସମସ୍ୟା ଲାଗି ରେଜଲ୍ଟ ପ୍ରକାଶରେ ସମାନ୍ୟ ବିଳମ୍ବ ହେଉଛି ।
ତେବେ ପରୀକ୍ଷା ଶେଷ ହେବା ପରେ ମୂଲ୍ୟାଙ୍କନ ଏବଂ ରେଜଲ୍ଟ ପ୍ରକାଶରେ ଏକ ଟାଇମ୍ ପିରିୟଡ଼ ରହିବା ଉଚିତ । ସେହି ସମୟସୀମା ମଧ୍ୟରେ ଖାତାଦେଖା ଶେଷ ହେବ ଏବଂ ରେଜଲ୍ଟ ପ୍ରକାଶ ପାଇବ । ଉଚ୍ଚଶିକ୍ଷା ବିଭାଗର ଜଣେ ଅଧିକାରୀଙ୍କ କହିବା ଅନୁଯାୟୀ, ଏଣିକି ରେଜଲ୍ଟ ପ୍ରକାଶ ପାଇବା ପରେ ପିଲାଙ୍କୁ ସେମାନଙ୍କର ଉତ୍ତରଖାତାର ନକଲ କପି ଦେବାର ବ୍ୟବସ୍ଥା କରାଯିବ । ନକଲ କପି ଯାଞ୍ଚ କରିବା ପରେ ଯଦି କିଛି ତ୍ରୁଟି ଥିବା ସମ୍ପୃକ୍ତ ଛାତ୍ରଛାତ୍ରୀ ଅଭିଯୋଗ କରନ୍ତି; ତେବେ ସେହି ଉତ୍ତରଖାତାକୁ ପୁଣି ଯାଞ୍ଚ କରାଯିବ । ତ୍ରୁଟି ଥିବା ଜଣାପଡ଼ିଲେ ସେହି ଖାତାକୁ ମୁଳ୍ୟାୟନ କରିଥିବା ଅଧ୍ୟାପକଙ୍କୁ କାରଣ ଦର୍ଶାଅ ନୋଟିସ ଜାରି କରାଯିବ ।
