ଲକ୍ଷ୍ନୌ: ଉତ୍ତରପ୍ରଦେଶର କାନପୁରେ ଘଟିଛି ଏକ ଅଭାବନୀୟ ଘଟଣା । ଜଣେ ଯୁବକଙ୍କୁ ତାଙ୍କ ବିବାହର ୩ ଦିନ ପୂର୍ବରୁ ହତ୍ୟା କରାଯାଇଛି । ଅଭିଯୁକ୍ତ ଯୁବକଙ୍କ ଗୁପ୍ତାଙ୍ଗକୁ କାଟି ହତ୍ୟା କରିଥିବା ସୂଚନା ରହିଛି । ମୃତ ଯୁବକଙ୍କ ଶରୀର ଏକ ବିଲରେ ପଡ଼ିଥିବାର ଦେଖିବା ପରେ ସ୍ଥାନୀୟ ଲୋକ ପୋଲିସକୁ ଖବର ଦେଇଥିଲେ । ପୋଲିସ ଆସି ଘଟଣାସ୍ଥଳରେ ପହଞ୍ଚି ଶରୀର ଜବତ କରିବା ସହ ତଦନ୍ତ ଆରମ୍ଭ କରିିଛି । ତେବେ ମୃତଦେହ ନିକଟରୁ ଏକ ମଦ ପ୍ୟାକେଟ୍ ଓ ଦୁଇଟା ଖାଲି ଗ୍ଲାସ୍ ବି ଜବତ ହୋଇଛି ।
ସୂଚନା ଅନୁଯାୟୀ, ବୁଧବାର କିଛି ଗାଁ ଲୋକ ମିଶି ନଦୀ ଆଡ଼େ ଯାଉଥିଲେ । ସେହି ସମୟରେ ଗ୍ରାମର ନିଲମ ଯାଦବଙ୍କ ବିଲରେ ଏକ ମୃତଦେହ ଦେଖିବାକୁ ମିଳିଥିଲା । ତା’ପରେ ଏହି କଥା ପୂରା ଗାଁରେ ପ୍ରଘଟ ହୋଇଗଲା । ଘଟଣା ଜାଣିବା ପରେ ଗାଁ ଲୋକ ମିଶି ପୂରା ମାମଲା ବିଷୟରେ ପୋଲିସକୁ ଜଣାଇଥିଲେ । ତା’ପରେ ଏସିପି ଦିନେଶ ଶୁକ୍ଳା ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ କରିଥିଲେ । ଯୁବକ ଜଣକ ଧଳା ପ୍ୟାଣ୍ଟ୍ ଓ ସାର୍ଟ ପିନ୍ଧିଥିଲେ । ତାଙ୍କ ବୟସ ପ୍ରାୟ ୨୭ ବର୍ଷ ହୋଇଥିବା ଜଣାପଡ଼ିଛି । ପ୍ରାଥମିକ ତଦନ୍ତରୁ ଏହା ଏକ ହତ୍ୟା ମାମଲା ବୋଲି ଅନୁମାନ କରାଯାଉଛି । ଅତି ନୃଶଂସ ଭାବେ ତାଙ୍କ ଗୁପ୍ତାଙ୍ଗକୁ କାଟି ଦିଆଯାଇଥିବା ଦେଖିବାକୁ ମିଳିଛି । ମୃତ ଯୁବକଙ୍କ ନାମ ଧର୍ମେନ୍ଦ୍ର ବୋଲି ଜଣାପଡ଼ିଛି । ବୁଧବାର ଦିନ ନିଜ ବିବାହର ହଳଦୀ ରୀତି ପୂରା କରି ସେ ବାହାରକୁ ଯାଇଥିବା ବେଳେ ଏପରି ଘଟିଛି । ଜୁନ୍ ୧୧ ତାରିଖରେ ତାଙ୍କର ବିବାହ ଥିଲା ।
