ବସ୍ ଧକ୍କାରେ ୨ ଗୁରୁତର

ଯାଜପୁର: ଯାଜପୁର ଜିଲ୍ଲାର କୁଜହାଲା ଛକ ନିକଟରେ ସଡକ ଦୁର୍ଘଟଣା। କୁଜହାଲା ଛକ ନିକଟରେ ୪ ଜଣଙ୍କୁ ଧକ୍କା ଦେଇଛି ବସ୍। ବସ୍ ଧକ୍କାରେ ୨ ଜଣ ଗୁତୁରତ ଆହତ ହୋଇଥିବା ବେଳେ ଅନ୍ୟ ୨ ଜଣ ସାମାନ୍ୟ ଆହତ ହୋଇଥିବା ନେଇ ସୂଚନା ମିଳିଛି। ରାସ୍ତା କଡରେ ମର୍ଣ୍ଣିଂ ୱାକ୍ କରିବା ବେଳେ ମାଡିଗଲା ବସ୍। ଆହତମାନଙ୍କୁ ଗାଁର ସ୍ଥାନୀୟ ବାସିନ୍ଦା ମୁନୁ ଜେନା, ବାଦଲ ଜେନା, ଚିଣ୍ଟୁ ଜେନା ଏବଂ ରାକେଶ ଜେନା ବୋଲି ଚିହ୍ନଟ କରାଯାଇଛି। ରିପୋର୍ଟ ଅନୁଯାୟୀ, ଯାଜପୁର ସଦର ପୋଲିସ ସୀମା ଅନ୍ତର୍ଗତ କୁଜହାଲା ଛକ ନିକଟରେ ରାସ୍ତାରେ ଚାରି ଜଣ ଯୁବକ ମର୍ଣ୍ଣିଂ ୱାକ୍ କରୁଥିଲେ, ସେହି ସମୟରେ ବାରୀରୁ କଟକ ଅଭିମୁଖେ ଯାଉଥିବା ଏକ ଘରୋଇ ବସ୍ ନିୟନ୍ତ୍ରଣ ହରାଇ ସେମାନଙ୍କ ଉପରେ ଚଢ଼ି ଦ୍ରୁତ ଗତିରେ ଚାଲିଗଲା। ଏହା ଦେଖି ସ୍ଥାନୀୟ ବାସିନ୍ଦା ଆହତ ଯୁବକମାନଙ୍କୁ ତୁରନ୍ତ ଚିକିତ୍ସା ପାଇଁ ଯାଜପୁର ମେଡିକାଲକୁ ପଠାଇଥିଲେ। ଆହତ ଚାରି ଜଣଙ୍କ ମଧ୍ୟରୁ ଦୁଇଜଣ ଗୁରୁତର ଆହତ ହୋଇଥିବାରୁ ସେମାନଙ୍କୁ ପରେ କଟକର ଏସସିବି ମେଡିକାଲ କଲେଜ ଏବଂ ହସ୍ପିଟାଲକୁ ପଠାଯାଇଥିଲା। ଦୁର୍ଘଟଣା ପରେ ଉତ୍ତେଜନା ପ୍ରକାଶ ପାଇଥିଲା, ଗ୍ରାମର ସ୍ଥାନୀୟ ଲୋକମାନେ କାର୍ଯ୍ୟାନୁଷ୍ଠାନ ଏବଂ କ୍ଷତିପୂରଣ ଦାବିରେ ଟାୟାର ଜାଳି ରାସ୍ତା ଅବରୋଧ କରି ପ୍ରତିବାଦ କରିଥିଲେ। ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ପରିସ୍ଥିତିକୁ ନିୟନ୍ତ୍ରଣ କରିବା ସହ ତଦନ୍ତ ଆରମ୍ଭ କରିଛି।