ଖର୍ଚ୍ଚ ପାଇଁ ସରକାରଙ୍କୁ ମିଳିଲା ଟ୍ରେଜେରୀ ଚାବିକାଠି
ମୁଖ୍ୟମନ୍ତ୍ରୀ କହିଲେ, ‘ବିକଶିତ ଓଡ଼ିଶା’ ଗଠନର ସ୍ୱପ୍ନକୁ ସାକାର ପାଇଁ ଦେଇଛୁ ଗୁରୁତ୍ୱ
ଭୁବନେଶ୍ୱର: ୨୦୨୪-୨୫ ଆର୍ଥିକ ବର୍ଷ ପାଇଁ ୨.୬୫ ଲକ୍ଷ କୋଟି ଟଙ୍କାର ପୂର୍ଣ୍ଣାଙ୍ଗ ବଜେଟ୍ର ବ୍ୟୟମଞ୍ଜୁରୀ ବିଲ୍ ଆଜି ବିଧାନସଭାରେ ପାରିତ ହୋଇଛି । ଫଳରେ ସରକାରଙ୍କୁ ମିଳିଛି ଟ୍ରେଜେରୀ ଚାବିକାଠି । ଏହି ବଜେଟ୍ ଅର୍ଥରୁ ଦରମା, ପେନ୍ସନ ଓ କାର୍ଯ୍ୟକ୍ଷମ ପ୍ରକଳ୍ପ ବାବଦକୁ ଖର୍ଚ୍ଚ ଚାଲୁରହିଛି । ବାକି ଅର୍ଥ ଆଗାମୀ ପ୍ରାୟ ପାଞ୍ଚ ମାସ ଭିତରେ ବ୍ୟୟ ହେବ । ଏହି ବଜେଟ୍ରେ ଆମ ‘ବିକଶିତ ଭାରତ’ ଗଠନରେ ଏକ ପ୍ରମୁଖ ଭୂମିକା ଗ୍ରହଣ କରିବା ସହିତ ୨୦୩୬ରେ ସ୍ୱତନ୍ତ୍ର ଓଡ଼ିଶା ପ୍ରଦେଶ ଗଠନର ଶହେ ବର୍ଷ ପୂର୍ତ୍ତୀ ପାଇଁ ମୂଳଦୁଆ ଉପସ୍ଥାପନ କରିଛୁ ବୋଲି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ପ୍ରକାଶ କରିଛନ୍ତି ।
ମଙ୍ଗଳବାର ଅର୍ଥମନ୍ତ୍ରୀ ଦାୟିତ୍ୱରେ ଥିବା ମୁଖ୍ୟମନ୍ତ୍ରୀ ବିଧାସଭାରେ ବ୍ୟୟମଞ୍ଜୁରୀ ଗୃହର ଅନୁମୋହନ ପାଇଁ ପୂର୍ଣ୍ଣାଙ୍ଗ ବଜେଟ୍ ୨୦୨୪-୨୫ର ବ୍ୟୟମଞ୍ଜୁରୀ ବିଲ୍ ଆଗତ କରିଥିଲେ । ଏହା ଉପରେ ଉଭୟ ଶାସକ ଓ ବିରୋଧୀ ସଭ୍ୟ ମତ ଦେଇଥିଲେ । ମୁଖ୍ୟମନ୍ତ୍ରୀ ଶ୍ରୀ ମାଝୀ କହିଛନ୍ତି ଯେ, ‘ବିକଶିତ ଓଡ଼ିଶା’ ଗଠନର ସ୍ୱପ୍ନକୁ ସାକାର କରିବା ପାଇଁ ଆମେ ପରିବର୍ତ୍ତନ, ବିକାଶ, ସୁଶାସନ ଏବଂ ଓଡିଆ ଅସ୍ମିତା ଉପରେ ଗୁରୁତ୍ୱ ଦେଇଛୁ । ରାଜ୍ୟର ବିକାଶ ହେବ ଜନମତକୁ ନେଇ, ଶାସକଙ୍କ ମତକୁ ନେଇ ନୁହେଁ । ଗତ ସରକାର ଅମଳରେ ଲୋକ ବିଶ୍ୱାସକୁ ନିଆଯାଉନଥିଲା । କିନ୍ତୁ ଏ ସରକାର ବଜେଟର ଆଭିମୁଖ୍ୟ କ\’ଣ ହେବ, ସେ ନେଇ ସାଧାରଣ ଜନତାଙ୍କ ଠାରୁ ପରାମର୍ଶ ମାଗିଥିଲେ ଏବଂ ଏଥିସହିତ ବିଭିନ୍ନ ବିଶେଷଜ୍ଞଙ୍କ ସହ ବିଚାର ବିମର୍ଶ କରିଥିଲେ । ଏହି ଅଭିଯାନରେ ୧୨ ହଜାର ସାଧାରଣ ଜନତାତାଙ୍କ ପରାମର୍ଶ ଦେଇଥିଲେ ଯାହାକି ଗତ ବର୍ଷ ତୁଳନାରେ ୬ ଗୁଣ ଅଧିକ । ଏତେସବୁ କସ୍ରତ ପରେ ୨୦୨୪-୨୫ ଆର୍ôଥକ ବର୍ଷ ପାଇଁ ଆମ ସରକାରଙ୍କ ପ୍ରଥମ ବଜେଟ୍କୁ ପ୍ରସ୍ତୁତ କରାଯାଇ ଏ ଗୃହରେ ଆଗତ କରଯାଇଥିଲା । ଏହି ବଜେଟ୍ ରାଜ୍ୟର ଜନସାଧାରଣଙ୍କ ଠାରେ ବହୁଳ ଭାବେ ପ୍ରଶଂସିତ ହୋଇଛି ।
ମୁଖ୍ୟମନ୍ତ୍ରୀ କହିଛନ୍ତି ଯେ, ଯେତେବେଳେ ବଜେଟ୍ କଥା ଆଲୋଚନା ହୁଏ ଦୁଇଟି ମୁଖ୍ୟ ବିଷୟ ଆଲୋଚ୍ୟ ହୋଇଥାଏ, ତାହା ହେଲା ବଜେଟର କଳେବର ଏବଂ ବିତ୍ତୀୟ ଅନୁଶାସନ । ଏହି ଦୁଇଟି ଯାକ ମାପଦଣ୍ଡରେ ୨୦୨୪-୨୫ର ବଜେଟ୍ ପ୍ରସ୍ତାବ ଶତ ପ୍ରତିଶତ ଉତ୍ତୀର୍ଣ୍ଣ ହୋଇଛି । ଆର୍ôଥକ ବର୍ଷ ୨୦୨୪-୨୫ ପାଇଁ ମୋଟ ୨ ଲକ୍ଷ ୬୫ ହଜାର କୋଟି ଟଙ୍କା ବଜେଟ୍ ଅଟକଳ ହୋଇଅଛି, ଯାହାକି ବିଗତ ବର୍ଷର ବଜେଟ୍ ଅଟକଳ ଠାରୁ ପ୍ରାୟ ୧୫ ପ୍ରତିଶତ ଅଧିକ । ଏଥିରେ କାର୍ଯ୍ୟକ୍ରମ ବ୍ୟୟ ୧ ଲକ୍ଷ ୫୫ ହଜାର କୋଟି ଟଙ୍କା ଆକଳନ କରାଯାଇଛି ଯାହାକି ୨୦୨୩-୨୪ ଆର୍ôଥକ ବର୍ଷ ତୁଳନାରେ ୨୪ ପ୍ରତିଶତ ଅଧିକ । ପୁଞ୍ଜି ବ୍ୟୟ ବାବଦକୁ ୫୮ ହଜାର ୧ ଶହ ୯୫ କୋଟି ଟଙ୍କା ଅଟକଳ ହୋଇଛି ଯାହାକି ସାମଗ୍ରିକ ରାଜ୍ୟ ଘରୋଇ ଉତ୍ପାଦର ୬.୩ ପ୍ରତିଶତ । ଏହା ଖର୍ଚ୍ଚର ଗୁଣବତ୍ତାରେ ଉନ୍ନତିକୁ ସୂଚାଉଛି । ବିତ୍ତୀୟ ନିଅଣ୍ଟ ହେଉଛି ବଜେଟ୍ର ଏକ ଗୁରୁତ୍ୱପୂର୍ଣ୍ଣ ମାପକାଠି । ୨୦୨୪-୨୫ ବିତ୍ତୀୟ ବର୍ଷ ପାଇଁ ଏହି ନିଅଣ୍ଟ ମାତ୍ର ୩୨,୪୦୩ କୋଟି ଟଙ୍କାରେ ରହିଛି, ଯାହା ରାଜ୍ୟ ସକଳ ଘରୋଇ ଉତ୍ପାଦର ୩.୫ ପ୍ରତିଶତ । ତାହା ଏକ ସୁସ୍ଥ ଅର୍ଥନୀତିର ସ୍ୱାକ୍ଷର ବହନ କରୁଛି ।
ମୁଖ୍ୟମନ୍ତ୍ରୀ କହିଥିଲେ, ଆସନ୍ତା ୧୭ରେ ପ୍ରଧାନମନ୍ତ୍ରୀଙ୍କ କରକମଳରେ ସୁଭଦ୍ରା ଯୋଜନାର ଶୁଭାରମ୍ଭ ହେବ । ରାଜ୍ୟର ଶେଷ ଯୋଗ୍ୟ ହିତାଧିକାରୀ ଯେମିତି ଏହି ଯୋଜନାରେ ସେମାନେ ତାଙ୍କ ପ୍ରାପ୍ୟ ଯଥାଶୀଘ୍ର ପାଇ ପାରିବେ । ତାହା ମୁଁ ବ୍ୟକ୍ତିଗତ ଭାବେ ତଦାରଖ କରିବି । ମୁଁ ରାଜ୍ୟର ମା\’ ମାନଙ୍କୁ ଏହି ଗୃହରୁ ଏ ପ୍ରତିଶୃତି ଦେଉଛି । ଆମ ରାଜ୍ୟ ଉଭୟ ଶିକ୍ଷା ଓ ସ୍ୱାସ୍ଥ୍ୟ କ୍ଷେତ୍ରରେ ପୂର୍ବ ଭାରତର ରାଜଧାନୀ ହେବାର ପର୍ଯ୍ୟାପ୍ତ ସୁଯୋଗ ରହିଛି । କିନ୍ତୁ, ବୋଧହୁଏ ପୂର୍ବ ସରକାର ଏହି ଦିଗରେ ଚିନ୍ତା କରିବା ପାଇଁ ସମୀଚୀନ ଭାବି ନ ଥିଲେ । ପ୍ରଥମେ ମୁଁ ଶିକ୍ଷା କଥା ଟିକେ ଆଲୋଚନା କରିବି । ଶିକ୍ଷାର ମୂଳଦୁଆ ଅର୍ଥାତ ପ୍ରାଥମିକ ଓ ମାଧ୍ୟମିକ ଶିକ୍ଷା ଉନ୍ନତ ନ ହେଲେ, ଉଚ୍ଚ ଶିକ୍ଷା କେବେ ବି ଉନ୍ନତ ହୋଇପାରିବ ନାହିଁ । କିନ୍ତୁ, ଗତ ପ୍ରାୟ ତିନି ବର୍ଷରେ୫ ଟି ନାଁରେ ଯେଉଁ ସ୍କୁଲ ରୂପାନ୍ତରଣ ନାଟକ ଚାଲିଲା ଆଉ ମିଡିଆରେ ଯେଉଁ ପ୍ରଚାର ପ୍ରସାର ଚାଲିଲା ତାକୁ ଆମେ ସମସ୍ତେ ଦେଖିଛୁ । କିନ୍ତୁ, ଏହି ସବୁ ସ୍କୁଲର ବାସ୍ତବ ଚିତ୍ର ଏବେ ଦେଖିବାକୁ ମିଳୁଛି । ମୋ ପାଖକୁ ଏ ବିଷୟରେ ଅନେକ ଅଭିଯୋଗ ଆସିଲାଣି, ସବୁ ହିସାବ କିତାବ ହେବ । ବିଗତ କିଛି ବର୍ଷରେ ଆମ ରାଜ୍ୟରେ ପ୍ରାଥମିକ ସ୍ତରରେ ଶିକ୍ଷାର ଗୁଣାତ୍ମକ ମାନରେ ଆହେତୁକ ଅବନତି ଘଟିଛି । ଅନେକ ସ୍ଥାନରେ ଦେଖା ଦେଉଛି ଯେ ଅଷ୍ଟମ କିମ୍ବା ନବମ ଶ୍ରେଣୀରେ ପଢୁଥିବା ଛାତ୍ର ଛାତ୍ରୀ ଦ୍ୱିତୀୟ କିମ୍ବା ତୃତୀୟ ଶ୍ରେଣୀର ପାଠ, ମାନସାଙ୍କ କିମ୍ବା ସରଳ ଗଣିତ ସମାଧାନ କରିବାରେ ଅସମର୍ଥ ହେଉଛନ୍ତି । ଏହାର ଗୋଟିଏ ମୁଖ୍ୟ କାରଣ ହେଉଛି ଆଧୁନିକ ଭିତ୍ତିଭୂମି ତଥା ପ୍ରଶିକ୍ଷିତ ଶିକ୍ଷକ ଶିକ୍ଷୟତ୍ରୀଙ୍କ ଘୋର ଅଭାବ । ଗତ ୨୪ ବର୍ଷ ମଧ୍ୟରେ ଗତ ସରକାର ଏଥିପ୍ରତି କୌଣସି ଧ୍ୟାନ ଦେଲେ ନାହିଁ । ଯଦି ବିଦ୍ୟାର୍ଥୀର ମୂଳଦୁଆ ଦୁର୍ବଳ ହୋଇଯିବ, ଭବିଷ୍ୟତରେ ଉଚ୍ଚ ଶିକ୍ଷା ତଥା ବୈଷୟିକ ଶିକ୍ଷା କ୍ଷେତ୍ରରେ ମଧ୍ୟ ଦୁର୍ବଳ ହେବା ସ୍ୱାଭାବିକ ।
ମୁଖ୍ୟମନ୍ତ୍ରୀ କହିଥିଲେ, ରାଜ୍ୟରେ ସୁଦୃଢ ସ୍ୱାସ୍ଥ୍ୟସେବା ଭିତ୍ତିଭୂମି ସ୍ଥାପନ କରିବା ସହ ସରକାରୀ ସ୍ତରରେ ସୁଲଭ ମୂଲ୍ୟରେ ଗୁଣାତ୍ମକ ସ୍ୱାସ୍ଥ୍ୟସେବାର ସାର୍ବଜନୀନ ଉପଲବ୍ଧି ସୁନିଶ୍ଚିତ କରାଇବା ନିମନ୍ତେ ଆମ ସରକାର ପ୍ରତିଶୃତିବଦ୍ଧ । ଜନସାଧାରଣଙ୍କ ସ୍ୱାସ୍ଥ୍ୟସେବାପାଇଁ ସମୁଦାୟ ୨୧ ହଜାର ୨ ଶହ କୋଟି ଟଙ୍କା ବ୍ୟୟବରାଦର ପ୍ରସ୍ତାବ ରହିଛି । ଏହା ବିଗତ ବର୍ଷର ବଜେଟ ଆକଳନ ତୁଳନାରେ ପ୍ରାୟ ୩୨ ପ୍ରତିଶତ ଅଧିକ ଅଟେ ଓ ସମୁଦାୟ ରାଜ୍ୟ ବଜେଟର ୮ ପ୍ରତିଶତ । ଏହା ଦ୍ୱାରା ସ୍ୱାସ୍ଥ୍ୟ କ୍ଷେତ୍ର ପାଇଁ ବଜେଟର ଆକାର ପଞ୍ଚଦଶ ଅର୍ଥ ଆୟୋଗ ସୁପାରିଶ ସ୍ତରରେ ପହଞ୍ଚି ପାରିଛି । ଭାରତ ସରକାରଙ୍କ ଆୟୁଷ୍ମାନ ଭାରତ ଯୋଜନା ବିଶ୍ୱର ସର୍ବବୃହତ ଜାତୀୟ ସ୍ୱାସ୍ଥ୍ୟ ସୁରକ୍ଷା ଯୋଜନା । କିନ୍ତୁ ପରିତାପର ବିଷୟ ହେଉଛି ଯେ ଆଜି ପର?୍ୟ୍ୟନ୍ତ ଓଡିଶାବାସୀଙ୍କୁ ଆୟୁଷ୍ମାନ ଭାରତ ଯୋଜନାରୁ ବଞ୍ଚିତ କରି ରଖାଯାଉଥିଲା । ଆମ ସରକାର ଆୟୁଷ୍ମାନ ଭାରତ-ପ୍ରଧାନମନ୍ତ୍ରୀ ଜନ ଆରୋଗ୍ୟ ଯୋଜନା ଓ ରାଜ୍ୟ ସରକାରଙ୍କ ନିଜସ୍ୱ ଯୋଜନା – ଗୋପବନ୍ଧୁ ଜନ ଆରୋଗ୍ୟ ଯୋଜନାର ସଂଯୋଜନ ମାଧ୍ୟମରେ ଯୋଗ୍ୟ ପରିବାରମାନଙ୍କୁ ସ୍ୱାସ୍ଥ୍ୟ ପ୍ରତିଷ୍ଠାନ ଗୁଡ଼ିକରେ ନଗଦ ବିହୀନ (କ୍ୟାଶ୍-ଲେସ) ସ୍ୱାସ୍ଥ୍ୟ ସେବା ପ୍ରଦାନ କରିବାପାଇଁ ବ୍ୟବସ୍ଥା କରାଯାଇଛି । ଏହି ପଦକ୍ଷେପ ଦ୍ୱାରା ଓଡ଼ିଶାବାସୀଙ୍କୁ ଆୟୁଷ୍ମାନ ଭାରତ ଯୋଜନାରେ ପଞ୍ଜୀକୃତ ଦେଶର ସମସ୍ତ ୨୭ ହଜାର ହସପିଟାଲରେ ଚିକିତ୍ସା ସୁବିଧା ମିଳିପାରିବ । ସେହିପରି କୃଷକମାନଙ୍କ ସଶକ୍ତିକରଣ ନିମନ୍ତେ ଅନେକଅଭିନବ ଯୋଜନା ମଧ୍ୟ କାର୍ଯ୍ୟକାରୀ ହେଉଛି । ଚଳିତ ବର୍ଷର କୃଷି ବଜେଟ୍ର କଳେବର ୩୩ ହଜାର ୯ ଶହ ୧୯ କୋଟି ଟଙ୍କା ଯାହା ଗତ ବର୍ଷ ତୁଳନାରେ ପ୍ରାୟ ୯ ହଜାର ୧୦୦ କୋଟି ଟଙ୍କା ଅଧିକ । ଜୀବନ ଜୀବିକାର ଆଉ ଏକ ମୁଖ୍ୟ ଧାରା ହେଉଛି ଉଦ୍ୟୋଗୀକରଣ । କିନ୍ତୁ ରାଜନୈତିକ ଇଛାଶକ୍ତି ତଥା ଦୁରଦୃଷ୍ଟିର ଅଭାବ ଯୋଗୁଁ ଆମ ରାଜ୍ୟରେ ଯେତେ ଔଦ୍ୟଗୀକରଣ ହେବା କଥା, ହୋଇପାରି ନାହିଁ । ଆମେ ୨୦୨୯ ସୁଦ୍ଧା ରାଜ୍ୟକୁ ୨ ଲକ୍ଷ ୫୦ ହଜାର କୋଟି ଟଙ୍କାରୁ ଅଧିକ ଘରୋଇ ପୁଞ୍ଜିନିବେଶ ଏବଂ ୨ ବିଲିୟନ ଡଲାରରୁ ଅଧିକ ପ୍ରତ୍ୟକ୍ଷ ବିଦେଶୀ ପୁଞ୍ଜି ନିବେଶ ଆଣିବା ପାଇଁ ଯୋଜନା କରୁଛୁ ବୋଲଇ ମୁଖ୍ୟମନ୍ତ୍ରୀ ଶ୍ରୀ ମାଝୀ ଗୃହରେ ଦୃଢ଼ତାର ସହ ପ୍ରକାଶ କରିଥିଲେ । ଶେଷରେ ବାଚନିକ ଭୋଟ୍ରେ ବାଚସ୍ପତି ସୁରମା ପାଢ଼ୀ ବ୍ୟୟମଞ୍ଜରୀ ବିଲକୁ ପାରିତ କରିଥିଲେ ।
୨.୬୫ ଲକ୍ଷ କୋଟିର ବ୍ୟୟମଞ୍ଜୁରୀ ବିଲ୍ ଗୃହୀତ
