କୋରେଇ: ଗତ ଗୁରୁବାର କୋରେଇ ବଜାରରେ ଗାଡି ଦୁର୍ଘଟଣାକୁ ନେଇ ଦୁଇ ଗୋଷ୍ଠୀ ମଧ୍ୟରେ ଘଟିଥିବା ଗଣ୍ଡଗୋଳକୁ ନେଇ ପୁଲିସ ଉଭୟ ଗୋଷ୍ଠୀରୁ ୭ ଜଣ ଲେଖାଏଁ ମୋଟ ୧୪ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି । ପ୍ରକାଶ ଯେ ଗୁରୁବାର ରାତି ସାଢ଼େ ୭ଟା ସମୟରେ ବଟିରା ଗ୍ରାମର ଜଣେ ଯୁବକ ଏକ ବୋଲେରୋରେ କୋରେଇ ବଜାରକୁ ଆସିବା ସମୟରେ ଦେବାନ ମହଲାଠାରେ ଏକ ଯୁବକଙ୍କୁ ଧକ୍କା ଦେଇଥିଲେ । ସ୍ଥାନୀୟ ଲୋକେ ଆହତ ଯୁବକଙ୍କୁ ମେଡିକାଲ ପଠାଇବା ସହ ଗାଡିକୁ ଅଟକ ରଖିଥିଲେ । ଏହି ସମୟରେ ଅନ୍ୟ ଏକ ଗୋଷ୍ଠୀ ସେଠାରେ ପହଞ୍ଚି ଉଦ୍ଧାର କରିଥିବା ଲୋକଙ୍କୁ ମାର୍ଧର କରିଥିଲେ । ଖବର ପ୍ରଚାରିତ ହେବା ପରେ ଅନ୍ୟ ଏକ ଗୋଷ୍ଠୀ ସେଠାରେ ପହଞ୍ଚିବାରୁ ଦୁଇ ଗୋଷ୍ଠୀ ମଧ୍ୟରେ ମୁହାଁମୁହିଁ ହୋଇଥିଲା । ଖବର ପାଇ କୋରେଇ ପୁଲିସ ଘଟଣା ସ୍ଥଳରେ ପହଞ୍ଚି ଘେରାବନ୍ଦୀ କରିବା ସହ ଏକ ବଡ଼ ଧରଣ ଗଣ୍ଡଗୋଳର ଆଶଙ୍କା କରି ୧୪୪ଧାରା ଘୋଷଣା କରିଥିଲା ।
ଯାଜପୁର ଏସପି, ଏସଡିପିଓ, ବ୍ୟାସନଗର ଅତିରିକ୍ତ ତହସିଲଦାର ଆଦି ଉପସ୍ଥିତ ରହି ଘଟଣା ଉପରେ ତୀକ୍ଷ୍ମ ନଜର ରଖିଥିଲେ । କୋରେଇରେ ଶାନ୍ତି ବଜାୟ ରଖିବା ସହ ପୁଲିସ ପକ୍ଷରୁ ଉଭୟ ପକ୍ଷର ମୁରବିମାନଙ୍କୁ ଡାକି ଏକ ଆପୋଷ ବୁଝାମଣା କରାଯିବା ସହ ତଦନ୍ତ କରାଯାଇ ଗଣ୍ଡଗୋଳରେ ଲିପ୍ତ ଥିବା ସମସ୍ତଙ୍କ ଉପରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସୂଚନା ଦିଆଯାଇଥିଲା । ତେବେ ଶୁକ୍ରବାର କୋରେଇ ପୁଲିସ ୨ ପକ୍ଷରୁ କେସ ନଂ ୨୪୫ ଓ ୨୪୬ରେ ୨ଟି ମାମଲା ରୁଜୁ କରି ଉଭୟ ପକ୍ଷରୁ ୭ ଜଣ ଲେଖାଏଁ ଗିରଫ କରି କୋର୍ଟ ଚାଲାଣ କରିଛି । ତେବେ ଘଟଣାରେ ଜଡ଼ିତ ଥିବା ଅନ୍ୟ ଅଭିଯୁକ୍ତମାନଙ୍କୁ ଖୁବ୍ ଶୀଘ୍ର ଗିରଫ କରାଯିବ ବୋଲି କୋରେଇ ଥାନା ପକ୍ଷରୁ ସୂଚନା ମିଳିଛି ।
