ଲକ୍ଷ୍ନୌ: ଉତ୍ତର ପ୍ରଦେଶର ରାଜଧାନୀ ଲକ୍ଷ୍ନୌରୁ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ହଜରତଗଞ୍ଜ ଅଞ୍ଚଳରେ ଜଣେ ଯୁବକ ନିଜ କାର ଭିତରେ ନିଜକୁ ଗୁଳି କରି ଆତ୍ମହତ୍ୟା କରିଛନ୍ତି। ଗୁଳି ଲାଗି ଯୁବକଙ୍କ ମୃତ୍ୟୁ ଘଟିଛି। ତାଙ୍କ ମୃତଦେହ କାର ଭିତରୁ ଉଦ୍ଧାର କରାଯାଇଛି। ପୋଲିସ ରବିବାର ଘଟଣା ସମ୍ପର୍କରେ ସୂଚନା ଦେଇଛି। ପୋଲିସ କହିଛି ଯେ ଯୁବକଙ୍କୁ କାରରୁ ବାହାର କରି କେଜିଏମୟୁ ନିଆଯାଇଥିଲା, ଯେଉଁଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ବର୍ତ୍ତମାନ ମୃତଦେହ ପୋଷ୍ଟମର୍ଟମ ପାଇଁ ପଠାଯାଇଛି। ଘଟଣାର ତଦନ୍ତ କରାଯାଉଛି। ପୋଲିସ ସୂଚନା ଅନୁଯାୟୀ, ମୃତକଙ୍କ ନାମ ଇଶାନ ଗର୍ଗ (୩୮), ସେ ତାଲ କଟୋରା ଥାନା ଅଞ୍ଚଳର ରାଜାଜୀପୁରମର ବାସିନ୍ଦା। ତାଙ୍କ ଲାଇସେନ୍ସପ୍ରାପ୍ତ ରିଭଲଭର ଏବଂ ଲାଇସେନ୍ସ କାରରୁ ଉଦ୍ଧାର କରାଯାଇଛି।
ସୂତ୍ର ଅନୁସାରେ, ଘଟଣାଟି ଶନିବାର ବିଳମ୍ବିତ ରାତିରେ ହରି ଓମ୍ ମନ୍ଦିର ନିକଟରେ ଘଟିଛି। ଖବରବ ପାଇ ପୋଲିସ ଦଳ ତୁରନ୍ତ ଘଟଣାସ୍ଥଳକୁ ଯାଇଥିଲେ। ପୋଲିସ ଘଟଣାସ୍ଥଳରେ ପହଞ୍ଚି ଏକ ଏସ୍ୟୁଭି ଚାଲୁଥିବା ଅବସ୍ଥାରେ ପାଇଲା। ଭିତରେ ଯାଞ୍ଚ କରିବା ପରେ, ସେମାନେ ଡ୍ରାଇଭର ସିଟରେ ବସିଥିବା ଜଣେ ଯୁବକଙ୍କୁ ତାଙ୍କ ମୁଣ୍ଡରେ ଗୁଳି ବାଜିଥିବାର ଦେଖିଲେ। ପୋଲିସ ତୁରନ୍ତ ଯୁବକଙ୍କୁ ଲକ୍ଷ୍ନୌର କିଙ୍ଗ ଜର୍ଜ ମେଡିକାଲ୍ ୟୁନିଭରସିଟିର ଟ୍ରମା ସେଣ୍ଟରକୁ ନେଇଯାଇଥିଲା, ଯେଉଁଠାରେ ଡାକ୍ତରଙ୍କ ଏକ ଦଳ ତାଙ୍କୁ ମୃତ ଘୋଷଣା କରିଥିଲେ। ପୋଲିସ ଯୁବକଙ୍କ ଡାହାଣ ହାତରୁ ଏକ ରିଭଲଭର, ନଅଟି କାର୍ଟ୍ରିଜ୍ ଏବଂ ଏକ ଖାଲି ସେଲ୍ ଜବତ କରିଛି। ମୃତଦେହକୁ ପୋଷ୍ଟମର୍ଟମ୍ ପାଇଁ ପଠାଇବା ସହ ଅଧିକ ତଦନ୍ତ ଚାଲିଛି।
