ବ୍ରିଜ ଉପରେ କାର୍ ରଖି ବ୍ୟବସାୟୀ ନିଖୋଜ; ଥାନାରେ ଏତଲା ଦେଲେ ପତ୍ନୀ

କଟକ: କାଠଯୋଡିର ନେତାଜୀ ସୁବାଷ ବ୍ରିଜ୍ ଉପରେ କାର ରଖି ଜଣେ ଗୁଜୁରାଟୀ ଅନଲାଇନ୍ ଟ୍ରେଡର୍ ନିଖୋଜ ହୋଇଯାଇଛନ୍ତି । ନିଖୋଜ ବ୍ୟବସାୟୀ ଜଣକ ହେଉଛନ୍ତି ତୁଷାର ଭଟ୍ଟ । ତାଙ୍କ ନିଖୋଜ ସଂକ୍ରାନ୍ତରେ ପତ୍ନୀ ବାରଙ୍ଗ ଥାନାରେ ଏତଲା ଦେଇଛନ୍ତି । ପୁଲିସ ଅଭିଯୋଗ ଆଧାରରେ ଛାନଭିନ୍ ଆରମ୍ଭ କରିଥିବା ବେଳେ ୨୪ ଘଣ୍ଟା ବିତିଯାଇଥିଲେ ମଧ୍ୟ ତାଙ୍କର ପତ୍ତା ମିଳିପାରି ନାହିଁ । ଅନଲାଇନ୍ ଟ୍ରେଡ୍‌ରେ ଆର୍ଥିକ କ୍ଷତି ସହିବାରୁ ସେ ନିଖୋଜ ହୋଇଯାଇଥିବା ଆଲୋଚନା ହେଉଛି । ସୂଚନା ମୁତାବକ, ତୁଷାର ଭଟ୍ଟ ପୁରୀରେ ଏଲିନା ଭଟ୍ଟଙ୍କୁ ବିବାହ କରିଥିଲେ । ବିବାହ ପରେ ଭୁବନେଶ୍ୱରରେ କିଟ୍ ନିକଟରେ ସେମାନେ ଘର ଭଡା ନେଇ ରହୁଥିଲେ । ତୁଷାର ଗ୍ରାଜୁଏସନ୍ ପରେ ଏକ ବ୍ୟାଙ୍କରେ ଚାକିରି କରିଥିଲେ । ପରେ ପରେ ଅନଲାଇନ୍ ଟ୍ରେଡିଂ ଆରମ୍ଭ କରିବାରୁ ବେଶ୍ ଭଲ ଲାଭ ହୋଇଥିଲା । ତେଣୁ ସେ ବ୍ୟାଙ୍କ ଚାକିରି ଛାଡି ଦେଇଥିଲେ । କିନ୍ତୁ ପରବର୍ତ୍ତୀ ସମୟରେ ବଡ ଧରଣର କ୍ଷତି ହେବାରୁ ସେ ମାନସିକ ଦୁଶ୍ଚିନ୍ତାରେ ଥିଲେ । ବୁଧବାର ଦିନ ପ୍ରାୟ ୨ଟା ବେଳେ ସେ କାରରେ ଘରୁ ବାହାରି ଯାଇଥିଲେ । ବୁଧବାର ସନ୍ଧ୍ୟା ବେଳେ ତାଙ୍କ କାର୍ ବାରଙ୍ଗ ପଟୁ ନେତାଜୀ ସେତୁ ନିକଟରେ ପାର୍କିଂ ହୋଇ ରହିଥିଲା । ଦୀର୍ଘ ସମୟ ଗାଡି ସେଠାରେ ପାର୍କିଂ ହୋଇ ରହିବାରୁ ସ୍ଥାନୀୟ ଲୋକେ ବାରଙ୍ଗ ଥାନା ପୁଲିସକୁ ସୂଚନା ଦେଇଥିଲେ । ପୁଲିସ ସେଠାରେ ପହଞ୍ଚିଥିବା ବେଳେ ଗାଡି ଲକ୍ ଥିବା ଜାଣିବାକୁ ପାଇଥିଲା । ଗାଡିଟିକୁ ପୁଲିସ ଥାନାକୁ ନେଇ ଯାଇଥିଲା । ଅନ୍ୟପଟେ ସେତୁର ପିଲର ନମ୍ବର ୮୭ ନିକଟରେ ତୁଷାରଙ୍କ ଚପଲ୍ ପଡି ରହିଥିଲା । ତୁଷାରଙ୍କ ପତ୍ନୀ ଏଲିନା କାର୍ ଓ ଚପଲକୁ ଚିହ୍ନଟ କରିଥିଲେ । ଅଗ୍ନିଶମ ବିଭାଗ କର୍ମଚାରୀ ଓ ପୁଲିସ ଖୋଜାଖୋଜି କରିଥିଲେ ହେଁ ଏଯାଏଁ ତୁଷାରଙ୍କ କୈାଣସି ଖୋଜ ଖବର ମିଳିପାରିନି । ଏଠାରେ ସୂଚନାଯୋଗ୍ୟ ଯେ, ଦରଘାବଜାର ଥାନା ଅନ୍ତର୍ଗତ ଓଡିଆ ବଜାର ଅଞ୍ଚଳରେ ରହୁଥିବା ସ୍କୁଲ ଶିକ୍ଷୟିତ୍ରୀ ମମତା ସାହୁ ମଙ୍ଗଳବାର ରାତିରୁ ଘରୁ ଆସି ନେତାଜୀ ସେତୁରେ ସ୍କୁଟି ରଖି ନିଖୋଜ ହୋଇଯାଇଛନ୍ତି । ଏପର୍ଯ୍ୟନ୍ତ ତାଙ୍କର ମଧ୍ୟ ପତ୍ତା ମିଳୁ ନାହିଁ ।