ନୂଆଦିଲ୍ଲୀ: ଜାତୀୟ ସଙ୍ଗୀତ “ବନ୍ଦେ ମାତରମ୍’ର ୧୫୦ତମ ବାର୍ଷିକୀ ପାଳନ ପରିପ୍ରେକ୍ଷୀରେ ଶୁକ୍ରବାର ନୂଆଦିଲ୍ଲୀସ୍ଥିତ ରେଳ ଭବନରେ ଏକ ସ୍ୱତନ୍ତ୍ର କାର୍ଯ୍ୟକ୍ରମ ଆୟୋଜନ କରାଯାଇଥିଲା। ଏହି କାର୍ଯ୍ୟକ୍ରମ ସଂସ୍କୃତି ମନ୍ତ୍ରଣାଳୟର ନିର୍ଦ୍ଦେଶକ୍ରମେ ଆୟୋଜିତ ହୋଇଥିଲା। ରେଳ, ସୂଚନା ଏବଂ ପ୍ରସାରଣ, ଏବଂ ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ମନ୍ତ୍ର ଅଶ୍ୱିନୀ ବୈଷ୍ଣବ ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବରେ ଯୋଗଦେଇଥିବା ବେଳେ ସଦସ୍ୟ (ଟ୍ରାକ୍ସନ୍ ଏବଂ ରୋଲିଂ ଷ୍ଟକ୍) ଆର. ରାଜଗୋପାଳ, ରେଲୱେ ବୋର୍ଡ ସଚିବ ଅରୁଣା ନାୟାର ଏବଂ ଅନ୍ୟାନ୍ୟ ବରିଷ୍ଠ ଅଧିକାରୀମାନେ ମଧ୍ୟ ଉପସ୍ଥିତ ଥିଲେ। ଏହି କାର୍ଯ୍ୟକ୍ରମରେ “ବନ୍ଦେ ମାତରମ୍” ସମୂହ ଗାନ କରାଯାଇଥିଲା, ଯାହା ସଂସ୍କୃତି ମନ୍ତ୍ରଣାଳୟ ଦ୍ୱାରା ଆୟୋଜିତ ମୁଖ୍ୟ କାର୍ଯ୍ୟକ୍ରମର ସିଧା ପ୍ରସାରଣ ସହିତ ସମନ୍ୱିତ ହୋଇଥିଲା। ଏହି ଅବସରରେ ଅଶ୍ୱିନୀ ବୈଷ୍ଣବ “ବନ୍ଦେ ମାତରମ୍’କୁ ଗତ ୧୫୦ ବର୍ଷ ଧରି ଭାରତର ଚେତନାର ଘୋଷଣା ଭାବରେ ବର୍ଣ୍ଣନା କରିଥିଲେ।
ଅନ୍ୟାନ୍ୟ ରେଳ ଜୋନ୍ ଏବଂ ଡିଭିଜନରେ ସମାନ ସ୍ମାରକୀ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଛତ୍ରପତି ଶିବାଜୀ ମହାରାଜ ଟର୍ମିନସରେ ଏକ ମହାନ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା, ଯେଉଁଥିରେ ମହାପ୍ରବନ୍ଧକ ବିଜୟ କୁମାର ଯୋଗ ଦେଇଥିଲେ। ହାଇଦ୍ରାବାଦର ରେଳ ନିଳୟମ୍ ରେ ମଧ୍ୟ “ବନ୍ଦେ ମାତରମ୍’ ପ୍ରତିଧ୍ୱନିତ ହୋଇଥିଲା, ଯେଉଁଠାରେ ଦକ୍ଷିଣ କେନ୍ଦ୍ରୀୟ ରେଳ ମହାପ୍ରବନ୍ଧକ ସଞ୍ଜୟ କୁମାର ଶ୍ରୀବାସ୍ତବ, ଅତିରିକ୍ତ ମହାପ୍ରବନ୍ଧକ, ବରିଷ୍ଠ ଅଧିକାରୀ ଏବଂ କର୍ମଚାରୀମାନେ ଜାତୀୟ ସଙ୍ଗୀତ ଗାନରେ ଯୋଗ ଦେଇଥିଲେ। ଉତ୍ତର ରେଳବାଇର ମୁଖ୍ୟ ଜନସମ୍ପର୍କ ଅଧିକାରୀଙ୍କ କାର୍ଯ୍ୟାଳୟ ମଧ୍ୟ “ବନ୍ଦେ ମାତରମ୍’ର ୧୫୦ତମ ବାର୍ଷିକୀ ପାଳନ ପାଇଁ ଏକ କାର୍ଯ୍ୟକ୍ରମ ଆୟୋଜନ କରିଥିଲା, ଯେଉଁଠାରେ ଅଧିକାରୀ ଏବଂ କର୍ମଚାରୀମାନେ ସାମୂହିକ ଭାବରେ “ବନ୍ଦେ ମାତରମ୍” ଗାନ କରିଥିଲେ।
