ଭୋପାଳ: ମଧ୍ୟପ୍ରଦେଶର ଦେବାସ ଜିଲ୍ଲାରେ ଥବା ଏକ ଘରେ ଭୟଙ୍କର ଅଗ୍ନିକାଣ୍ଡ ହୋଇ ପରିବାରର ୪ଜଣଙ୍କ ଜୀବନ ଚାଲିଯାଇଛି । ଘରେ ନିଆଁ ଲାଗିବା ଯୋଗୁଁ ସ୍ୱାମୀ-ସ୍ତ୍ରୀଙ୍କ ସହିତ ଦୁଇ ପିଲା ମଧ୍ୟ ମୃତ୍ୟୁ ହୋଇଛି । ଖବର ପାଇ ଅଗ୍ନିଶମ ବାହିନୀ ଟିମ୍ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଛି । ରିପୋର୍ଟ ଅନୁଯାୟୀ, ମଧ୍ୟପ୍ରଦେଶର ଦେବାସ ସହରର ନୟାପୁର ଅଞ୍ଚଳର ଏକ ଘରେ ଭୟଙ୍କର ଅଗ୍ନିକାଣ୍ଡ ଘଟିଛି । ଏଥିରେ ଗୋଟିଏ ପରିବାରର ୪ ଜଣଙ୍କ ମୃତ୍ୟୁ ହୋଇଛି । ମୃତକଙ୍କ ମଧ୍ୟରେ ସ୍ୱାମୀ-ସ୍ତ୍ରୀ ଓ ସେମାନଙ୍କ ଦୁଇ ପିଲା ଅଛନ୍ତି। ଯେଉଁ ଘରେ ଅଗ୍ନିକାଣ୍ଡ ଘଟିଛି ତା’ର ତଳ ମହଲାରେ ଏକ କ୍ଷୀର ଫ୍ୟାକ୍ଟ୍ରି ଥିଲା । ପ୍ରଥମେ ଏହି ଫ୍ୟାକ୍ଟ୍ରିରେ ହିଁ ନିଆଁ ଲାଗିଥିଲା । ପରେ ଏହି ନିଆଁ ପୂରା ବିଲ୍ଡିଂକୁ ବ୍ୟାପି ଯାଇଥିଲା । ଫଳରେ ଦ୍ୱିତୀୟ ମହଲାରେ ରହୁଥିବା ସ୍ୱାମୀ-ସ୍ତ୍ରୀ ଓ ଦୁଇ ପିଲାଙ୍କ ମୃତ୍ୟୁ ହୋଇଛି ।
ମୃତକମାନେ ହେଲେ ଦିନେଶ, ତାଙ୍କ ପତ୍ନୀ ଗାୟତ୍ରୀ, ଝିଅ ଇସିକା ଓ ପୁଅ ଚିରାଗ । ଦିନେଶ ପେସାରେ ଜଣେ କାରପେଣ୍ଟର ଥିଲେ । ଏଥିସହ ଘରର ତଳ ମହଲାରେ କ୍ଷୀର ଫ୍ୟାକ୍ଟ୍ରି ଚଳାଉଥିଲେ । ତେବେ କେଉଁ କାରଣରୁ ତାଙ୍କ ପ୍ୟାକ୍ଟ୍ରିରେ ନିଆଁ ଲାଗିଲା ସେ ନେଇ କିଛି ସୂଚନା ମିଳିନାହିଁ । ପୋଲିସ ଘଟଣାର ତଦନ୍ତ କରୁଛି । ପୋଲିସ କହିବା ମୁତାବକ, ଯେଉଁ ଘରେ ନିଆଁ ଲାଗିଛି, ତାହା ମଦନ ସୋଲାଙ୍କୀର ବୋଲି ଜଣାପଡିଛି । ଆଜି ଭୋର ୪.୩୦ ସମୟରେ ଏହି ନିଆଁ ଲାଗିଛି । ମୃତକଙ୍କୁ ବ୍ୟବଚ୍ଛେଦ ପାଇଁ ପଠାଯାଇଛି । ତେବେ ପ୍ରାରମ୍ଭିକ ଯାଞ୍ଚ ଅନୁଯାୟୀ ସର୍ଟ ସର୍କିଟ ଯୋଗୁଁ ନିଆଁ ଲାଗିଥିବା ଜଣାଯାଇଛି । ସୂଚନାଯୋଗ୍ୟ, ମଧ୍ୟପ୍ରଦେଶ ହରଦା ଜିଲ୍ଲାରେ ଥିବା ବାଣ କାରଖାନାରେ ବିସ୍ଫୋରଣରେ ଅତିକମରେ ୧୧ ଜଣଙ୍କର ମୃତ୍ୟୁ ହୋଇଥିଲା ଏବଂ ୧୦୦ରୁ ଅଧିକ ଆହତ ହୋଇଥିଲେ । ବିସ୍ଫୋରଣ ଏତେ ଜୋରରେ ଥିଲା ଯେ, ଫ୍ୟାକ୍ଟ୍ରି ପାଖରେ ଥିବା ୫୦ରୁ ଅଧିକ ଘରକୁ ବ୍ୟାପି ଯାଇଥିଲା ।
