ନିଜ ବାପାଙ୍କୁ ହତ୍ୟା କରି ମରଶରୀରକୁ ଜଗିଲା ପୁଅ

ନୂଆଦିଲ୍ଲୀ:  ନିଜ ବାପାଙ୍କୁ ହତ୍ୟା କଲା ନିଜ ରକ୍ତର ପୁଅ । ନୋଏଡା ସେକ୍ଟର -୧୧୩ ଥାନା ଅଞ୍ଚଳର ସରଫାବାଦ  ଗାଁରେ ଘଟିଛି ଏଭଳି ଲୋମଟାଙ୍କୁରା ଘଟଣା ।  ରବିବାର ବିଳମ୍ବିତ ରାତିରେ ୧୯ ବର୍ଷର ପୁଅ ନିଜ ବାପାଙ୍କୁ ଇଟାରେ ଛେଚି ହତ୍ୟା କରିଛି ।  ପୋଲିସ ଘଟଣାସ୍ଥଳରେ ପହଞ୍ଚି  ମୃତଦେହକୁ ଜବତ କରି ପୋଷ୍ଟମର୍ଟମ ପାଇଁ ପଠାଇଛି ।ସୂଚନା ଅନୁସାରେ  ଶନିବାର ରାତିରେ  ବାପା ଏବଂ ପୁଅଙ୍କ ମଧ୍ୟରେ କୌଣସି କଥାକୁ ନେଇ ଝଗଡା ହୋଇଥିଲା । ପୁଅ ନିଶାଗ୍ରସ୍ତ ଅବସ୍ଥାରେ  ଇଟାରେ ତାଙ୍କ ବାପଙ୍କୁ ଆକ୍ରମଣ କରିଥିଲେ । ଘଟଣାସ୍ଥଳରେ ବାପାଙ୍କ ମୃତ୍ୟୁ ହୋଇଥିଲା । ପରେ ସାରା ରାତି ରକ୍ତ ଜୁଡୁବୁଡୁ ଅବସ୍ଥାରେ ବାପାଙ୍କ ମୃତଦେହକୁ ଜଗିଥିଲା ଅଭିଯୁକ୍ତ । ଏଭଳି ଅମାନୁଷିକ କାଣ୍ଡ ଘଟାଇ  ଅଭିଯୁକ୍ତ ଜଣଙ୍କ ତାଙ୍କ ମାମୁ ଘରକୁ ଯାଇ  ବାପାଙ୍କୁ ହତ୍ୟା କରିଥିବା କଥା ବଖାଣିଥିଲେ । ହେଲେ  ମାମୁ ଅଭିଯୁକ୍ତର କଥାକୁ ବିଶ୍ୱାସ କରିନଥିଲେ । ନିଶାଗ୍ରସ୍ଥ ଅବସ୍ଥାରେ କହୁଥିବାରୁ ଏହାକୁ ଏଡାଇ ଦେଇଥିଲେ । ଗାଁ ଲୋକେ ମୃତ ବାପାଙ୍କୁ ରକ୍ତ ଜୁଡୁବୁଡୁ ଅବସ୍ଥାରେ ଦେଖି  ତାଙ୍କୁ କେହି ହତ୍ୟା କରିଛନ୍ତି ବୋଲି ସନ୍ଦେହ କରିଥିଲେ । ଗାଁ ଲୋକେ ପୋଲିସକୁ ଖବର ଦେଇଥିଲେ । ପୋଲିସ ଘଟଣାସ୍ଥଳରେ ପହଞ୍ଚି  ମରଶରୀରକୁ ଜବତ କରି ଶବ ବ୍ୟବଚ୍ଚେଦ ପାଇଁ ପଠାଇଛି । ଘଟଣାସ୍ଥଳରୁ ହତ୍ୟାରେ ବ୍ୟବହୃତ ହୋଇଥିବା ଇଟାକୁ ଜବତ କରିଥିଲା ।  ଅଭିଯୁକ୍ତକୁ   ପଚରାଉଚାରା କରି ଗିରଫ କରିଥିଲେ । ପରେ ପୋଲିସ ପାଖରେ ଅଭିଯୁକ୍ତ  ନିଜେ କାଣ୍ଡ ଘଟାଇଛି ବୋଲି ସ୍ୱୀକାର କରିଥିଲା ।