ନୂଆଦିଲ୍ଲୀ: ଭାରତୀୟ କ୍ରିକେଟ ଦଳର ଉପ-ଅଧିନାୟକ ଶ୍ରେୟସ ଆୟରଙ୍କ ସ୍ୱାସ୍ଥ୍ୟାବସ୍ଥା ସମ୍ପର୍କରେ ଅପଡେଟ୍ ଦେଲେ ସୂର୍ଯ୍ୟକୁମାର ଯାଦବ। ଅଷ୍ଟ୍ରେଲିଆ ବିପକ୍ଷ ତୃତୀୟ ଏକଦିବସୀୟ ମ୍ୟାଚ୍ରେ ଆହତ ଶ୍ରେୟସ ଆୟରଙ୍କ ସ୍ୱାସ୍ଥ୍ୟବସ୍ଥାରେ ସୁଧାର ଆସୁଥିବା ସୂଚନା ମିଳିଛି। ମଙ୍ଗଳବାର ଦିନ ଏକ ସାମ୍ବାଦିକ ସମ୍ମିଳନୀରେ ଟିମ୍ ଇଣ୍ଡିଆର ଟି-୨୦ ଅଧିନାୟକ ସୂର୍ଯ୍ୟକୁମାର ଯାଦବ କହିଛନ୍ତି ଯେ ଆୟର ଏବେ ଫୋନ୍ର ଉତ୍ତର ଦେଉଛନ୍ତି ଏବଂ ଡାକ୍ତରଙ୍କ ତତ୍ତ୍ୱାବଧାନରେ ଧୀରେ ଧୀରେ ସୁସ୍ଥ ହେଉଛନ୍ତି। ସିଡନୀରେ ହସ୍ପିଟାଲରେ ଭର୍ତ୍ତି ହୋଇଥିବା ଶ୍ରେୟସ ଆୟରଙ୍କୁ ସୋମବାର ଦିନ ଆଇସିୟୁରୁ ବାହାରିକୁ ଅଣାଯାଇଛି। ତାଙ୍କ ସ୍ୱାସ୍ଥ୍ୟାବସ୍ଥାରେ ଉନ୍ନତି ହେଉଛି। ଏହି ଖବର ଦଳ ଏବଂ ପ୍ରଶଂସକମାନଙ୍କୁ ବହୁତ ଆଶ୍ୱସ୍ତି ଦେଇଛି।
ସୂର୍ଯ୍ୟକୁମାର ତାଙ୍କ ଆଘାତ ବିଷୟରେ ଏକ ଅପଡେଟ୍ ପ୍ରଦାନ କରି କହିଛନ୍ତି, “ପ୍ରଥମ ଦିନ ଯେତେବେଳେ ମୁଁ ଜାଣିଲି ଯେ ସେ ଆହତ ହୋଇଛନ୍ତି, ମୁଁ ତାଙ୍କୁ ଫୋନ୍ କରିଥିଲି, କିନ୍ତୁ ତାଙ୍କ ପାଖରେ ତାଙ୍କର ଫୋନ୍ ନଥିଲା। ତା’ପରେ ମୁଁ ତାଙ୍କ ଅବସ୍ଥା ବିଷୟରେ ଫିଜିଓ କମଲେଶ ଜୈନଙ୍କ ସହ କଥା ହୋଇଥିଲି। ମୁଁ ଗତ ଦୁଇ ଦିନ ଧରି ତାଙ୍କ ସହିତ କଥା ହେଉଛି। ସେ ନିଜେ ଫୋନ୍ରେ କଥା ହେଉଛନ୍ତି, ଯାହାର ଅର୍ଥ ହେଉଛି ସେ ଭଲ ଅଛନ୍ତି। ଡାକ୍ତରମାନେ ତାଙ୍କର ଦେଖାଶୁଣା କରୁଛନ୍ତି ଏବଂ ତାଙ୍କୁ କିଛି ଦିନ ପାଇଁ ପର୍ଯ୍ୟବେକ୍ଷଣରେ ରଖାଯିବ।”
ତୃତୀୟ ଦିନିକିଆରେ ଆଲେକ୍ସ କ୍ୟାରିଙ୍କ କ୍ୟାଚ୍ ନେବା ସମୟରେ ଶ୍ରେୟସ ଆୟରଙ୍କ ବାମ ପଞ୍ଜରାରେ ଗମ୍ଭୀର ଆଘାତ ଲାଗିଥିଲା। ସେ ଡାଇଭ୍ ମାରି ଏକ ଚମତ୍କାର କ୍ୟାଚ୍ ନେଇଥିଲେ କିନ୍ତୁ ତାଙ୍କ ପ୍ଳିହାରେ ଜୋରରେ ଆଘାତ ଲାଗିଥିଲା, ଯାହା ଫଳରେ ଆଭ୍ୟନ୍ତରୀଣ ରକ୍ତସ୍ରାବ ହୋଇଥିଲା। ପ୍ରଥମେ ତାଙ୍କୁ ଫିଜିଓ ପଡିଆରୁ ବାହାରକୁ ନେଇଯାଇଥିଲେ କିନ୍ତୁ ତା’ପରେ ହଠାତ୍ ତାଙ୍କ ଅବସ୍ଥା ଖରାପ ହୋଇଗଲା ଏବଂ ତାଙ୍କୁ ତୁରନ୍ତ ହସ୍ପିଟାଲକୁ ନେବାକୁ ପଡିଲା। ପରୀକ୍ଷା ପରେ ଆଭ୍ୟନ୍ତରୀଣ ରକ୍ତସ୍ରାବ ହୋଇଥିବା ଜଣାପଡ଼ିବାରୁ ତାଙ୍କୁ ତୁରନ୍ତ ଆଇସିୟୁରେ ଭର୍ତ୍ତି କରାଯାଇଥିଲା। ଏବେ ଡାକ୍ତରଙ୍କ ତତ୍ତ୍ବାବଧାନରେ ତାଙ୍କର ଚିକିତ୍ସା ଜାରି ରହିଛି। ସୁସ୍ଥ ହେବା ପରେ ସେ ଭାରତ ଫେରିବେ।
ବିସିସିଆଇ ଡାକ୍ତରୀ ଦଳ ଘଟଣାସ୍ଥଳରେ ତୁରନ୍ତ ପହଞ୍ଚି ପରିସ୍ଥିତିକୁ ନିୟନ୍ତ୍ରଣକୁ ଆଣିଥିଲେ। ବୋର୍ଡର ଡାକ୍ତରୀ ମୁଖ୍ୟ ଡାକ୍ତର ଦିନଶା ପାରଦିୱାଲା ରିପୋର୍ଟରେ ଲେଖିଛନ୍ତି ଯେ କ୍ଷେତ୍ରସ୍ଥ ଡାକ୍ତରୀ କର୍ମଚାରୀଙ୍କ ତୁରନ୍ତ ପ୍ରତିକ୍ରିୟା ଏକ ଗମ୍ଭୀର ପରିସ୍ଥିତିକୁ ସମ୍ଭାବ୍ୟ ଜୀବନ ପ୍ରତି ବିପଦପୂର୍ଣ୍ଣ ପରିସ୍ଥିତିରେ ପରିଣତ ହେବାରୁ ରୋକିପାରିଛି। ସୂତ୍ର ଅନୁସାରେ, ଶ୍ରେୟସ ଆୟରଙ୍କ ପରିବାର ସଦସ୍ୟମାନେ ମଧ୍ୟ ତାଙ୍କ ସହିତ ରହିବା ପାଇଁ ଖୁବ୍ ଶୀଘ୍ର ସିଡନୀରେ ପହଞ୍ଚିବେ। ଆୟର ବର୍ତ୍ତମାନ ଡାକ୍ତରଙ୍କ ତତ୍ତ୍ୱାବଧାନରେ ଅଛନ୍ତି, ଏବଂ ଡାକ୍ତରମାନେ କହିଛନ୍ତି ଯେ କିଛି ଦିନ ମଧ୍ୟରେ ତାଙ୍କର ସୁସ୍ଥତାରେ ଉନ୍ନତି ହେବ।
