ଭୋପାଳ: ମଧ୍ୟପ୍ରଦେଶର ଦମୋହରେ ଭୟଙ୍କର ସଡ଼କ ଦୁର୍ଘଟଣା । ଦମୋହ ତମନ୍ନା ତିରାହେ ନିକଟରେ ଏକ ଟ୍ରକ୍ ଅଟୋକୁ ଜୋର୍ରେ ଧକ୍କା ଦେଇଛି । ଏହି ଦୁର୍ଘଟଣାରେ ୭ ଜଣଙ୍କର ମୃତ୍ୟୁ ହୋଇଥିବା ବେଳେ ୪ ଜଣ ଆହତ ହୋଇଥିବା ସୂଚନା ରହିଛି । ସମସ୍ତ ଆହତଙ୍କୁ ଚିକିତ୍ସା ପାଇଁ ଜିଲ୍ଲା ଡାକ୍ତରଖାନାରେ ଭର୍ତ୍ତି କରାଯାଇଛି । ମିଳିଥିବା ସୂଚନା ଅନୁସାରେ, ଦ୍ରୁତ ଗତିରେ ଆସୁଥିବା ଏକ ଟ୍ରକ୍ ଏଠାରେ ଏକ ଅଟୋକୁ ଜୋର୍ରେ ଧକ୍କା ଦେଇଥିଲା । ଫଳରେ ଘଟଣାସ୍ଥଳରେ ହିଁ ଅଟୋରେ ବସିଥିବା ୭ ଜଣଙ୍କର ମୃତ୍ୟୁ ଘଟିଥିଲା ।
ଏଥିରେ ୪ ଜଣ ଆହତ ହୋଇଥିବା ବେଳେ ସମସ୍ତଙ୍କର ଜିଲ୍ଲା ଡାକ୍ତରଖାନାରେ ଚିକିତ୍ସା ଚାଲିଛି । ଦୁର୍ଘଟଣା ଏତେ ଭୟଙ୍କର ଥିଲା ଯେ ଟ୍ରକ୍ ତଳକୁ ଅଟୋଟି ଚାଲିଆସିଥିଲା, ଯାହାଫଳରେ ଅଟୋରେ ଥିବା ଯାତ୍ରୀମାନେ ଏହା ତଳେ ଚାପି ହୋଇଯାଇଥିଲେ । କଟନି ରାସ୍ତାରେ ଏହି ଦୁର୍ଘଟଣା ଘଟିଛି । ଖବର ପାଇ ଜିଲ୍ଲାପାଳ, ଏସ୍ପିଙ୍କ ସମେତ ବରିଷ୍ଠ ଅଧିକାରୀମାନେ ଘଟଣାସ୍ଥଳରେ ପହଞ୍ଚିଛନ୍ତି । ଜେସିବି ସହାୟତାରେ ଉଦ୍ଧାର କାର୍ଯ୍ୟ ଚାଲିଛି । ପୋଲିସ ମୁତାବକ, ଏହି ଦୁର୍ଘଟଣାରେ ଟ୍ରକ୍ ଚାଳକ ମଧ୍ୟ ଆହତ ହୋଇଛନ୍ତି । ତାଙ୍କର ହସ୍ପିଟାଲରେ ଚିକିତ୍ସା ଚାଲିଛି । ତେବେ ଟ୍ରକ୍ ଚାଳକ ନିଶାରେ ଥିଲେ କି ନାହିଁ, ତାହା ଜଣାପଡ଼ିନାହିଁ । ଆହତମାନଙ୍କର ମଧ୍ୟ ପରିଚୟ ମିଳିପାରି ନାହିଁ । ଦୁର୍ଘଟଣା ସମ୍ପର୍କରେ ମୃତକ ଏବଂ ଆହତମାନଙ୍କ ପରିବାର ଲୋକଙ୍କୁ ଖବର ଦିଆଯାଇଛି ।
