ଗୁଜରାଟ: ଅପରେସନ ସିନ୍ଦୂର ପରେ ପ୍ରଥମ ଥର ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗୁଜରାଟ ଗସ୍ତରେ ଅଛନ୍ତି । ସେ ମଙ୍ଗଳବାର ସକାଳେ ଗାନ୍ଧୀ ନଗରରେ ପହଞ୍ଚିଥିଲେ। ପ୍ରଧାନମନ୍ତ୍ରୀ ସେଠାରେ ଏକ ରୋଡ୍ ଶୋ କରିଥିଲେ ଏବଂ ତା’ପରେ ଜନସାଧାରଣଙ୍କୁ ସମ୍ବୋଧିତ କରିଥିଲେ। ସେଠାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଥିଲେ ଯେ, ୧୯୪୭ ମସିହାରେ କାଶ୍ମୀରରେ ଆତଙ୍କବାଦୀଙ୍କ ସହିତ ପ୍ରଭାବଶାଳୀ ଭାବରେ ମୁକାବିଲା କରାଯିବା ଉଚିତ ଥିଲା, ଯେତେବେଳେ ବିଭାଜନ ପରେ ପ୍ରଥମ ଆତଙ୍କବାଦୀ ଆକ୍ରମଣ ହୋଇଥିଲା ଏବଂ ଆଜି ଭାରତ ଯାହା ଅନୁଭବ କରୁଛି ତାହା ସେହି ଆତଙ୍କର ଏକ ବିକୃତ ରୂପ ଯାହା ଦଶନ୍ଧି ଧରି ଦେଶକୁ କଷ୍ଟ ଦେଇଆସିଛି। ପ୍ରଧାନମନ୍ତ୍ରୀ ଦର୍ଶାଇଥିଲେ ଯେ ଭାରତର ପ୍ରଥମ ଗୃହମନ୍ତ୍ରୀ ସର୍ଦ୍ଦାର ବଲ୍ଲଭଭାଇ ପଟେଲ ଯୁକ୍ତି ଦେଇଥିଲେ ଯେ ୧୯୪୭ ମସିହାରେ ପାକିସ୍ତାନ-ଅଧିକୃତ କାଶ୍ମୀରକୁ ପୁନରୁଦ୍ଧାର ନକରି ପାକିସ୍ତାନ ବିରୁଦ୍ଧରେ ସେନା ଆକ୍ରମଣ ଆଗକୁ ବଢ଼ିବା ଉଚିତ୍ ନୁହେଁ, କିନ୍ତୁ ତତ୍କାଳୀନ କଂଗ୍ରେସ ସରକାର ତାଙ୍କ ପରାମର୍ଶକୁ ଅଣଦେଖା କରିଥିଲେ।
“୧୯୪୭ ମସିହାରେ, ଯେତେବେଳେ ଭାରତ ମାତାକୁ ତିନୋଟି ଭାଗରେ ବିଭକ୍ତ କରାଯାଇଥିଲା… ସେହି ରାତିରେ, କାଶ୍ମୀର ମାଟିରେ ପ୍ରଥମ ଆତଙ୍କବାଦୀ ଆକ୍ରମଣ ହୋଇଥିଲା। ଭାରତ ମାତାର ଗୋଟିଏ ଅଂଶକୁ ପାକିସ୍ତାନ ‘ମୁଜାହିଦ୍ଦିନ’ ନାମରେ ବଳପୂର୍ବକ ଦଖଲ କରିଥିଲା। ସେହି ଦିନ, ସେହି ତଥାକଥିତ ମୁଜାହିଦ୍ଦିନମାନଙ୍କୁ ମୃତ୍ୟୁ ଗର୍ତ୍ତରେ ଫିଙ୍ଗି ଦିଆଯିବା ଉଚିତ ଥିଲା ଏବଂ ସର୍ଦ୍ଦାର ପଟେଲଙ୍କ ଇଚ୍ଛା ଥିଲା ଯେ ଯେପର୍ଯ୍ୟନ୍ତ ପିଓକେ ଫେରାଇ ନନିଆଯାଏ, ସେପର୍ଯ୍ୟନ୍ତ ସେନା ବନ୍ଦ ନହେବା ଉଚିତ୍। କିନ୍ତୁ ସର୍ଦ୍ଦାର ସାହେବଙ୍କ କଥା ପାଳନ କରାଯାଇ ନଥିଲା,” ପ୍ରଧାନମନ୍ତ୍ରୀ କହିଥିଲେ ।
ସେ ଆହୁରି ଜୋର ଦେଇ କହିଥିଲେ, ” ଏହି ମୁଜାହିଦ୍ଦିନମାନଙ୍କ ଦ୍ୱାରା ଗତ ୭୫ ବର୍ଷ ଧରି ରକ୍ତପାତ ଜାରି ରହିଛି। ପହଲଗାଓଁରେ ଯାହା ଘଟିଥିଲା ତାହା କେବଳ ଏହାର ଏକ ବିକୃତ ରୂପ ଥିଲା। ଭାରତୀୟ ସେନା ପ୍ରତ୍ୟେକ ଥର ପାକିସ୍ତାନକୁ ପରାସ୍ତ କରିଛି। ପାକିସ୍ତାନ ବୁଝିପାରିଲା ଯେ ସେ ଭାରତଠାରୁ ଜିତିପାରିବ ନାହିଁ”। ପ୍ରଧାନମନ୍ତ୍ରୀ ଆହୁରି କହିଛନ୍ତି ଯେ ଭାରତ ବିରୁଦ୍ଧରେ ଆତଙ୍କବାଦୀ କାର୍ଯ୍ୟକଳାପ ଅଣ-ରାଷ୍ଟ୍ରୀୟ ବ୍ୟକ୍ତିଙ୍କ ଦ୍ୱାରା କରାଯାଇଥିବା “ପ୍ରକ୍ସି ଯୁଦ୍ଧ ନୁହେଁ”, ବରଂ “ପାକିସ୍ତାନ ଦ୍ୱାରା ଏକ ସୁଚିନ୍ତିତ ଯୁଦ୍ଧ”। “ଆତଙ୍କବାଦ ପ୍ରକ୍ସି ଯୁଦ୍ଧ ନୁହେଁ, ଏହା ତୁମର ଯୁଦ୍ଧ ରଣନୀତି। ତୁମେ ଆମ ବିରୁଦ୍ଧରେ ଯୁଦ୍ଧ କରୁଛ,” ସେ ସୀମାପାର ଆତଙ୍କବାଦକୁ ଉଲ୍ଲେଖ କରି କହିଥିଲେ।
