ମସ୍କୋ : ରୁଷ୍ ରାଷ୍ଟ୍ରପତି ଭ୍ଲାଦିମିର ପୁଟିନ ରହୁଥିବା ସ୍ଥାନଠାରୁ ମାତ୍ର କିଛି କିଲୋମିଟର ଦୂରରେ ଜଣେ ବ୍ୟକ୍ତିଙ୍କ ମୃତଦେହ ମିଳିବା ପରେ ହଇଚଇ ସୃଷ୍ଟି ହୋଇଛି। ଗୁରୁତ୍ବପୂର୍ଣ୍ଣ କଥା ହେଉଛି ମୃତ ବ୍ୟକ୍ତି ହେଉଛନ୍ତି ପୁଟିନଙ୍କ ଜଣେ ଘନିଷ୍ଠ ଲୋକ ଓ ଜଣେ କ୍ଷେପଣାସ୍ତ୍ର ଡିଜାଇନର । ସୂଚନା ଅନୁସାରେ ମାର୍ସ ଡିଜାଇନ ବ୍ୟୁରୋର ସଫ୍ଟୱେର ବିଭାଗର ମୁଖ୍ୟ ତଥା ଡେପୁଟି ଜେନେରାଲ ଡିଜାଇନର ମିଖାଇଲ ଶଟସ୍କିଙ୍କୁ ହତ୍ୟା କରାଯାଇଛି। ଏହି କମ୍ପାନୀ ଋଷର କ୍ଷେପଣାସ୍ତ୍ର ବିକଶିତ କରିଥାଏ, ଯାହା ୟୁକ୍ରେନ ସହ ଯୁଦ୍ଧରେ ବ୍ୟବହୃତ ହୁଏ ।
କିଭ୍ ଇଣ୍ଡିପେଣ୍ଡେଣ୍ଟ ପକ୍ଷରୁ ଏହି ସୂଚନା ଦିଆଯାଇଛି। କ୍ରେମଲିନଠାରୁ ଆଠ ମାଇଲ ଦକ୍ଷିଣ-ପୂର୍ବରେ ମସ୍କୋ ଅଞ୍ଚଳରେ ଅବସ୍ଥିତ କୋଟେଲନିକିର କୁଜମିନସ୍କି ଫରେଷ୍ଟ ପାର୍କରେ ଜଣେ ଅଜ୍ଞାତ ଆକ୍ରମଣକାରୀ ଶଟସ୍କିଙ୍କୁ ଗୁଳି କରି ହତ୍ୟା କରିଥିଲା। ଆଷ୍ଟ୍ରା ଟେଲିଗ୍ରାମ ଚ୍ୟାନେଲ ଏବଂ ଅନ୍ୟ ଋଷୀୟ ଏବଂ ୟୁକ୍ରେନ୍ ସୂତ୍ରରୁ ଏହି ସୂଚନା ଦିଆଯାଇଛି। ଶଟସ୍କିଙ୍କ ସଂସ୍ଥା ରୁଷୀୟ ମହାକାଶ ଏବଂ ସାମରିକ ଉଦ୍ୟୋଗ ପାଇଁ ଅନବୋର୍ଡ ଗାଇଡେନ୍ସ ସିଷ୍ଟମ ତିଆରି ଏବଂ ଉତ୍ପାଦନ କରେ । କମ୍ପାନୀ ଡିସେମ୍ବର ୨୦୧୭ରୁ ଷ୍ଟେଟ୍ କର୍ପୋରେସନ ରୋସାଟମ୍ ବିଭାଗର ଏକ ଅଂଶ ଅଟେ । ଶଟସ୍କି ମଧ୍ୟ ଜଣେ ପ୍ରଫେସର ଥିଲେ ଏବଂ ରୁଷୀୟ କେଏଚ୍ -୫୯ କ୍ରୁଜ୍ କ୍ଷେପଣାସ୍ତ୍ରକୁ କେଏଚ୍ -୬୯ ସ୍ତରକୁ ଉନ୍ନତ କରିବା ପାଇଁ ସକ୍ରିୟ ଭାବରେ କାର୍ଯ୍ୟ କରୁଥିଲେ, ଯାହାକୁ ରୁଷୀୟ ସୈନିକମାନେ ୟୁକ୍ରେନ୍ ଉପରେ ଆକ୍ରମଣ କରିବା ପାଇଁ ବ୍ୟବହାର କରନ୍ତି ।
