ଡିଜିଟାଲ କଣ୍ଟେଣ୍ଟ୍ କ୍ରିଏଟର୍ସ ବା ବିଭିନ୍ନ ଡିଜିଟାଲ କାର୍ଯ୍ୟକ୍ରମ ନିର୍ମାତାମାନଙ୍କୁ ସ୍ୱୀକୃତି ଓ ପ୍ରୋତ୍ସାହନ ଦେବା ଲାଗି ପ୍ରଧାନମନ୍ତ୍ରୀଙ୍କ ଦୃଷ୍ଟିକୋଣ ଅନୁରୂପ ପ୍ରସାର ଭାରତୀ ପକ୍ଷରୁ ଆଜି ନୂଆଦିଲ୍ଲୀରେ ‘‘କ୍ରିଏଟର୍ସ କର୍ଣ୍ଣର୍’’ କାର୍ଯ୍ୟକ୍ରମର ଶୁଭାରମ୍ଭ କରାଯାଇଛି। ଡିଡି ନ୍ୟୁଜରେ ପ୍ରସାରିତ ହେବାକୁ ଥିବା ଏହି ସ୍ୱତନ୍ତ୍ର କାର୍ଯ୍ୟକ୍ରମରେ ସାରା ଦେଶରେ ଡିଜିଟାଲ କ୍ରିଏଟର୍ସମାନଙ୍କ ଦ୍ୱାରା ପ୍ରସ୍ତୁତ କାର୍ଯ୍ୟକ୍ରମ ପ୍ରସାରଣ କରାଯିବ।
ଏହି ଅବସରରେ କେନ୍ଦ୍ର ସୂଚନା ଓ ପ୍ରସାରଣ ମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଗତ 11 ବର୍ଷ ମଧ୍ୟରେ ବିଭିନ୍ନ କ୍ଷେତ୍ରରେ ସଂସ୍କାର ଅଣାଯାଇଛି। ପ୍ରସାର ଭାରତୀରେ ମଧ୍ୟ ଅନୁରୂପ ସଂସ୍କାର ଦେଖିବାକୁ ମିଳିଛି।
ସୂଚନା ଏବଂ ପ୍ରସାରଣ ମନ୍ତ୍ରଣାଳୟର ସମ୍ପୂର୍ଣ୍ଣ ପୁନର୍ଗଠନ ଜାରି ରହିଥିବା ବେଳେ 2026 ବର୍ଷ ପ୍ରସାର ଭାରତୀ ପାଇଁ ବଡ଼ ସଂସ୍କାରର ବର୍ଷ ହେବ ବୋଲି ସେ କହିଥିଲେ। କେନ୍ଦ୍ର ମନ୍ତ୍ରୀ କହିଥିଲେ, ଏସବୁ ସଂସ୍କାର ଦୂରଦର୍ଶନ ଏବଂ ଆକାଶବାଣୀ ଭଳି ପ୍ରତିଷ୍ଠାନକୁ ଶିଳ୍ପ ଭାଗିଦାରୀ, ନୂଆ ପିଢ଼ିର ନିର୍ମାତା ଏବଂ ପ୍ରଯୁକ୍ତି ଆଧାରିତ ପ୍ରକ୍ରିୟା ଦିଗରେ ନେଇଯିବ। କ୍ରିଏଟର କର୍ଣ୍ଣରର ଶୁଭାରମ୍ଭ ଏହି ସଂସ୍କାର ଯାତ୍ରାର ପ୍ରଥମ ପଦକ୍ଷେପ। ଗତ ବର୍ଷ ଆରମ୍ଭ ହୋଇଥିବା ୱେଭ୍ସ ପ୍ଲାଟଫର୍ମ ବିଷୟରେ ସେ ଉଲ୍ଲେଖ କରି କ୍ରିଏଟର ଅର୍ଥବ୍ୟବସ୍ଥାକୁ ବୃଦ୍ଧି କରିବାରେ ଏହାର ଭୂମିକା ବିଷୟରେ ଉଲ୍ଲେଖ କରିଥିଲେ। ସେ କହିଥିଲେ, ଏହି କାର୍ଯ୍ୟକ୍ରମ ଏକ କୋଟି ଯୁବବର୍ଗଙ୍କୁ ସାମିଲ କରିଛି। ନୂତନ ନିଯୁକ୍ତି ସୁଯୋଗ ସୃଷ୍ଟି କରିବା ସହିତ ଏହି ଇକୋସିଷ୍ଟମରେ ପ୍ରାୟ 5,000 କୋଟି ଟଙ୍କାର ଯୋଗଦାନ କରିପାରିଛି ।
ଏହି କାର୍ଯ୍ୟକ୍ରମରେ କେନ୍ଦ୍ର ସୂଚନା ଓ ପ୍ରସାରଣ ରାଷ୍ଟ୍ର ମନ୍ତ୍ରୀ ଡକ୍ଟର ଏଲ୍. ମୁରୁଗନ କହିଥିଲେ, ଦୂରଦର୍ଶନର କ୍ରିଏଟର କର୍ଣ୍ଣରର ଶୁଭାରମ୍ଭ ଭାରତର ବର୍ଦ୍ଧିତ କଣ୍ଟେଣ୍ଟ ନିର୍ମାତାମାନଙ୍କୁ ସଶକ୍ତ କରିବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ। ଏହା ମଧ୍ୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ କମଳା ଅର୍ଥବ୍ୟବସ୍ଥା ଦୃଷ୍ଟିକୋଣ ଅନୁରୂପ। ଦେଶର ଛୋଟ ସହର ଏବଂ ଅଞ୍ଚଳର ନିର୍ମାତାମାନେ କିପରି ସ୍ୱାଧୀନ ଭାବରେ କଣ୍ଟେଣ୍ଟ ପ୍ରସ୍ତୁତି, ସମ୍ପାଦନା ଓ ଶେୟାର କରୁଛନ୍ତି, ବଡ଼ ଷ୍ଟୁଡିଓ ବିନା କିଭଳି ଜୀବିକା ନିର୍ବାହ କରୁଛନ୍ତି ତାହା ଉପରେ କେନ୍ଦ୍ର ମନ୍ତ୍ରୀ ଆଲୋକପାତ କରିଥିଲେ। ଦୂରଦର୍ଶନ ଏବେ ଏହି ନିର୍ମାତାମାନଙ୍କୁ ଏକ ଦୃଢ଼ ଜାତୀୟ ଏବଂ ବିଶ୍ୱସ୍ତରୀୟ ପ୍ଲାଟଫର୍ମ ପ୍ରଦାନ କରିବ ବୋଲି କହିବା ସହିତ ଡକ୍ଟର ମୁରୁଗନ ଏହି ପଦକ୍ଷେପ ପାଇଁ ଡିଡି ଦଳକୁ ଅଭିନନ୍ଦନ ଜଣାଇଥିଲେ।
ସୂଚନା ଓ ପ୍ରସାରଣ ମନ୍ତ୍ରଣାଳୟ ସଚିବ ସଞ୍ଜୟ ଜାଜୁ କହିଥିଲେ, ଏହି ପଦକ୍ଷେପ ଏକ ଜୀବନ୍ତ, ଦାୟିତ୍ୱପୂର୍ଣ୍ଣ ଏବଂ ସମାବେଶୀ କ୍ରିଏଟର ଇକୋସିଷ୍ଟମ ଗଠନ କରିବାରେ ସାହାଯ୍ୟ କରିବ। ଏହା କ୍ରିଏଟରମାନଙ୍କୁ କେବଳ ଅଭିନେତା ଭାବରେ ନୁହେଁ ବରଂ ସମ୍ପୂର୍ଣ୍ଣ କଣ୍ଟେଣ୍ଟ ନିର୍ମାତା ଭାବରେ ପରିଚୟ ଦେବ। ଡିଡି ନ୍ୟୁଜରେ ଆରମ୍ଭ ହୋଇଥିବା କ୍ରିଏଟର କର୍ଣ୍ଣର ଧୀରେ ଧୀରେ ଅନ୍ୟ ସବୁ ଦୂରଦର୍ଶନ ଚ୍ୟାନେଲରେ ପ୍ରସାରିତ ହେବ। ଏହା ବିଭିନ୍ନ ଭାଷା, ଅଞ୍ଚଳ ଏବଂ ଧାରାରୁ କ୍ରିଏଟରମାନଙ୍କୁ ଏକ ଜାତୀୟ ମଞ୍ଚ ପ୍ରଦାନ କରିବ। ଏହି ସମର୍ପିତ ପ୍ରାଇମ୍-ଟାଇମ୍ ସ୍ଲଟ୍ କ୍ରିଏଟରମାନଙ୍କୁ ବିବିଧ ଦୃଷ୍ଟିକୋଣ ସହିତ ସାର୍ବଜନୀନ ପ୍ରସାରଣକୁ ସମୃଦ୍ଧ କରିବା ସହିତ ବ୍ୟାପକ ଦର୍ଶକଙ୍କ ପାଖରେ ପହଞ୍ଚିବାରେ ସାହାଯ୍ୟ କରିବ ବୋଲି ସେ କହିଥିଲେ।
କ୍ରିଏଟର୍ସ କର୍ଣ୍ଣର ସମ୍ପର୍କରେ
ଏହି କାର୍ଯ୍ୟକ୍ରମଟି ସୋମବାରରୁ ଶୁକ୍ରବାର ସନ୍ଧ୍ୟା 7ଟାରେ ଡିଡି ନ୍ୟୁଜରେ ପ୍ରସାରିତ ହେବ ଏବଂ ପ୍ରଥମ ପ୍ରସାରଣ ପରଦିନ ସକାଳ ୯:୩୦ ଟାରେ ଏହାର ପୁନର୍ବାର ପ୍ରସାରଣ ହେବ। ପ୍ରତ୍ୟେକ ଅଧ୍ୟାୟରେ ବିଭିନ୍ନ ବିଷୟବସ୍ତୁକୁ ସାମିଲ କରି ଚାରିରୁ ଛଅଟି ରିଲ୍ କିମ୍ବା ଭିଡିଓ ପ୍ରଦର୍ଶିତ ହେବ। ଏହି କାର୍ଯ୍ୟକ୍ରମର ଉଦ୍ଦେଶ୍ୟ ହେଉଛି ଉନ୍ନତ ମାନର କାର୍ଯ୍ୟକ୍ରମ ପ୍ରସ୍ତୁତି ଏବଂ ଏହାର ପ୍ରସାରକୁ ବୃଦ୍ଧି କରି ଡିଜିଟାଲ ଅର୍ଥବ୍ୟବସ୍ଥାକୁ ପ୍ରୋତ୍ସାହିତ କରିବା। ଏହା ମଧ୍ୟ କଣ୍ଟେଣ୍ଟ୍ ନିର୍ମାତାମାନଙ୍କୁ ପ୍ରସାର ଭାରତୀ ସହ ଭାଗିଦାରୀ ପ୍ରତିଷ୍ଠା କରିବାରେ ସହାୟକ ହେବ। ଏଥିରେ ସମାଚାର ଓ ସାମ୍ପ୍ରତିକ ଘଟଣାବଳୀ, ସଂସ୍କୃତି, ଯାତ୍ରା, ବ୍ୟଞ୍ଜନ, କଳା ଓ ସାହିତ୍ୟ, ସଂଗୀତ ଓ ନୃତ୍ୟ, ସ୍ୱାସ୍ଥ୍ୟ ଓ କଲ୍ୟାଣ, ଶିକ୍ଷା, ବିଜ୍ଞାନ ଓ ପ୍ରଯୁକ୍ତି, ପ୍ରେରଣାଦାୟୀ କାହାଣୀ, ପରିବେଶ ଓ ଦୀର୍ଘସ୍ଥାୟୀ ବିକାଶ ଏବଂ ମନୋରଞ୍ଜନ ସମ୍ପର୍କରେ କାର୍ଯ୍ୟକ୍ରମ ପ୍ରସାରଣ କରାଯିବ। ଏହି କାର୍ଯ୍ୟକ୍ରମ ପ୍ରସାର ଭାରତୀ ଓ ଡିଡି ନ୍ୟୁଜର ପହଞ୍ଚକୁ ମଧ୍ୟ ବ୍ୟାପକ କରିବ। ଆଗ୍ରହୀ ବିଷୟବସ୍ତୁ ନିର୍ମାତାମାନେ ddnews.creatorscorner[at]gmail[dot]com ରେ ନିଜର କଣ୍ଟେଣ୍ଟ ଦାଖଲ କରିପାରିବେ କିମ୍ବା ଏହି କାର୍ଯ୍ୟକ୍ରମରେ ଭାଗ ନେବା ପାଇଁ +91-8130555806ରେ ଯୋଗାଯୋଗ କରିପାରିବେ।
ଦେଶବ୍ୟାପୀ ଡିଜିଟାଲ୍ କ୍ରିଏଟରମାନଙ୍କୁ ସଶକ୍ତ କରିବା ଲାଗି ଡିଡି ନ୍ୟୁଜରେ ‘କ୍ରିଏଟର୍ସ କର୍ଣ୍ଣର୍’ର ଶୁଭାରମ୍ଭ କଲା ପ୍ରସାର ଭାରତୀ
