ଆଫଗାନିସ୍ତାନ: ରବିବାର ବିଳମ୍ବିତ ରାତିରେ ଆଫଗାନିସ୍ତାନର ଦକ୍ଷିଣ-ପୂର୍ବ ଅଞ୍ଚଳରେ ଏକ ବଡ଼ ଭୟଙ୍କର ଭୂମିକମ୍ପ ଅନୁଭୂତ ହୋଇଛି। ଯୁକ୍ତରାଷ୍ଟ୍ର ଭୂତତ୍ତ୍ୱ ସର୍ଭେ ଅନୁଯାୟୀ, ରିକ୍ଟର ସ୍କେଲରେ ଭୂମିକମ୍ପର ତୀବ୍ରତା ୬.୩ ରେକର୍ଡ କରାଯାଇଛି। ରିପୋର୍ଟ ଅନୁଯାୟୀ, ଭୂମିକମ୍ପ ଯୋଗୁଁ ୨୫୦ ଜଣଙ୍କର ମୃତ୍ୟୁ ହୋଇଥିବା ବେଳେ ଅନେକ ଲୋକ ଆହତ ହୋଇଛନ୍ତି। ଆଫଗାନିସ୍ତାନ ଏବଂ ପାକିସ୍ତାନରେ ମଧ୍ୟ ଭୂମିକମ୍ପର ଝଟକା ଅନୁଭୂତ ହୋଇଛି। ଭୂମିକମ୍ପ ପରେ ଲୋକମାନେ ଏବେ ବି ଆତଙ୍କିତ ଅଛନ୍ତି। ରବିବାର ରାତି ୧୨.୪୭ ରେ ଭୂମିକମ୍ପ ହୋଇଥିଲା, ପ୍ରଥମେ ଏହାର ତୀବ୍ରତା ୬.୦ ଥିଲା ଏବଂ ଏହା ପରେ ୬.୩ ତୀବ୍ରତାର ଭୂମିକମ୍ପ ଅନୁଭୂତ ହୋଇଥିଲା। ଆଫଗାନିସ୍ତାନର ନାଙ୍ଗରହାର ଜନସ୍ୱାସ୍ଥ୍ୟ ବିଭାଗର ମୁଖପାତ୍ର ନକିବୁଲ୍ଲା ରହିମି କହିଛନ୍ତି ଯେ ଭୂମିକମ୍ପ ଯୋଗୁଁ ୯ ଜଣଙ୍କର ମୃତ୍ୟୁ ହୋଇଛି। ଆହତମାନଙ୍କୁ ଚିକିତ୍ସା ପାଇଁ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଛି। କିନ୍ତୁ, ଏହା ପରେ ପ୍ରାଣ ହରାଇଥିବା ଲୋକଙ୍କ ସଂଖ୍ୟା ବହୁତ ବୃଦ୍ଧି ପାଇଛି। ଏବେ ମୋଟ ୨୫୦ ଜଣଙ୍କର ମୃତ୍ୟୁ ହୋଇଛି।
ସାରା ରାତି ଆଫଗାନିସ୍ତାନରେ ଅନେକ ଥର ଭୂମିକମ୍ପ କମ୍ପନ ଅନୁଭୂତ ହୋଇଥିଲା। ରାତି ୧୨:୪୭ରେ ୬.୩ ତୀବ୍ରତା, ରାତି ୧:୦୮ରେ ୪.୭ ତୀବ୍ରତ, ରାତି ୧:୫୯ରେ ୪.୩ ତୀବ୍ରତା, ଭୋର ୩:୦୩ରେ ୫ ତୀବ୍ରତା ଏବଂ ସକାଳ ୫:୧୬ରେ ୫ ତୀବ୍ରତାର ଭୂମିକମ୍ପ ଅନୁଭୂତ ହୋଇଥିଲା। ଏହି ବିଷୟରେ ପ୍ରତିକ୍ରିୟା ଦେଇ ତାଲିବାନ ମୁଖପାତ୍ର ଜାବିଉଲ୍ଲାହ ମୁଜାହିଦ ଦୁଃଖ ପ୍ରକାଶ କରିଛନ୍ତି। ସେ ଏକ୍ସରେ କହିଛନ୍ତି, ” ଦୁର୍ଭାଗ୍ୟବଶତଃ, ଆଜି ରାତିରେ ହୋଇଥିବା ଭୂମିକମ୍ପ ଯୋଗୁଁ ଆମର କିଛି ପୂର୍ବ ପ୍ରଦେଶରେ ବହୁତ ଜୀବନ ଏବଂ ସମ୍ପତ୍ତିର କ୍ଷତି ହୋଇଛି। ସ୍ଥାନୀୟ ଅଧିକାରୀମାନେ ପ୍ରଭାବିତ ଲୋକଙ୍କ ଉଦ୍ଧାର କାର୍ଯ୍ୟରେ ନିୟୋଜିତ ଅଛନ୍ତି। କେନ୍ଦ୍ର ଏବଂ ନିକଟବର୍ତ୍ତୀ ପ୍ରଦେଶଗୁଡ଼ିକରୁ ମଧ୍ୟ ସହାୟତା ଦଳ ପହଞ୍ଚିଛନ୍ତି।” ଏହା ପୂର୍ବରୁ ଆଫଗାନିସ୍ତାନରେ ଅନେକ ଥର ଭୂମିକମ୍ପ ଅନୁଭୂତ ହୋଇଛି। ୨୮ ମଇରେ ୪.୭ ତୀବ୍ରତାର ଭୂମିକମ୍ପ ହୋଇଥିଲା। ତଥାପି, କୌଣସି କ୍ଷତି ହୋଇନଥିଲା। ୧୬ ଏପ୍ରିଲରେ ୫.୯ ତୀବ୍ରତାର ଭୂମିକମ୍ପ ହୋଇଥିଲା। ଏହା ସହିତ, ଗତ ମାସଗୁଡ଼ିକରେ ଭାରତ, ନେପାଳ ଏବଂ ଚୀନରେ ମଧ୍ୟ ଭୂମିକମ୍ପ ହୋଇଛି।
