ମୁମ୍ବାଇ ହିଟ୍ ଆଣ୍ଡ ରନ୍ ମାମଲା; ମିହିର ଶାହଙ୍କୁ ୭ ଦିନ ହେପାଜତକୁ ନେଲା ପୁଲିସ

ନୂଆଦିଲ୍ଲୀ: ମୁମ୍ବାଇ ହିଟ୍ ଆଣ୍ଡ ରନ୍ ମାମଲାର ମୁଖ୍ୟ ଅଭିଯୁକ୍ତ ିହିର ଶାହଙ୍କୁ ପୁଲିସ ଆଜିଠାରୁ ସାତ ଦିନ ପର୍ଯ୍ୟନ୍ତ ହେପାଜତକୁ ନେଇଛି । ଆଜି ପୁଲିସ ତାଙ୍କୁ କୋର୍ଟରେ ହାଜର କରିଥିଲା । କୋର୍ଟରେ ପୁଲିସ କହିଛି ଯେ ମିହିର ପ୍ରମାଣ ନଷ୍ଟ କରିବାକୁ ଅନେକ ଚେଷ୍ଟା କରିଛନ୍ତି । ଏପରିକି ସେ ଫେରାର୍ ହୋଇଯିବା ପରେ ଦାଢି-ନିଶ କାଟି ଦେଇଥିଲେ, ଯେମିତି ତାଙ୍କୁ କେହି ଚିହ୍ନି ନ ପାରିବେ । ଦୁର୍ଘଟଣା ଘଟାଇବା ପରେ ତାଙ୍କ ବାପା ରାଜେଶ ଶାହ ଏବଂ ଗର୍ଲଫ୍ରେଣ୍ଡକୁ ଏକାଧିକ ଥର କଲ୍ କରିଥିଲେ ।ତେବେ ପୁଲିସ ମିହିରଙ୍କ ଗର୍ଲଫ୍ରେଣ୍ଡଙ୍କୁ ପଚରା ଉଚରା କରିବାର ସମ୍ଭାବନା ରହିଛି । ସେପଟେ ତାଙ୍କ ବାପା ରାଜେଶ ଶାହଙ୍କୁ ଦଳର ଉପନେତା ପଦରୁ ହଟାଇଛି ଏକନାଥ ସିନ୍ଦେଙ୍କ ଶିବସେନା ଗୋଷ୍ଠୀ । ପ୍ରକାଶ ଥାଉକି, ଶିବସେନା ନେତା ରାଜେଶ ଶାହଙ୍କ ପୁଅ ହେଉଛନ୍ତି ମିହିରି । ସେ ଗତ ରବିବାର ବିଏମଡବ୍ଲ୍ୟୁ କାରରେ ଯିବା ସମୟରେ ଓର୍ଲି ନିକଟରେ ଭୟଙ୍କର ଦୁର୍ଘଟଣା ଘଟାଇଥିଲେ । ଏକ ସ୍କୁଟିକୁ ଧକ୍କା ଦେଇ କିଛି ବାଟ ଘୋଷାଡ଼ି ନେବା ଫଳରେ ଜଣେ ମହିଳାଙ୍କର ମୃତ୍ୟୁ ଘଟିବା ସହ ତାଙ୍କ ସ୍ୱାମୀ ଗୁରୁତର ହୋଇଥିଲେ । ଦୁର୍ଘଟଣା ପରେ ମିହିର ଫେରାର୍ ହୋଇ ଯାଇଥିଲେ । ତଦନ୍ତ ସମୟରେ ସହଯୋଗ ନ କରିବାରୁ ତାଙ୍କ ବାପାଙ୍କୁ ଗିରଫ କରିଥିଲା ପୁଲିସ । ପରେ ତାଙ୍କୁ ଅନ୍ତରୀଣ ଜାମିନ ମିଳିଛି । ଘଟଣାର ତିନି ଦିନ ପରେ ଗତକାଲି ମିହିରଙ୍କୁ ଗିରଫ କରାଯାଇଛି ।