ମଧ୍ୟପ୍ରଦେଶ: ମଧ୍ୟପ୍ରଦେଶର ଆଗର-ମାଲୱାରରେ ଜଣେ ୧୩ ବର୍ଷୀୟ ବାଳକର ରହସ୍ୟମୟ ପରିସ୍ଥିତିରେ ମୃତ୍ୟୁହୋଇଥିବା ନେଇ ଖବର ସାମ୍ନାକୁ ଆସିଛି। ମୃତ ନାବାଳକଙ୍କୁ ରବି ସୂର୍ଯ୍ୟବଂଶୀ ବୋଲି ଚିହ୍ନଟ କରାଯାଇଛି। ରବି ପଶୁମାନଙ୍କୁ ଖାଇବାକୁ ଦେଇ ଫେରୁଥିଲେ। ସେହି ସମୟରେ ହଠାତ୍ ସେ ଚେତାଶୂନ୍ୟ ହୋଇଯାଇଥିଲେ ଏବଂ ତାଙ୍କର ମୃତ୍ୟୁ ଘଟିଥିଲା। ସୋମବାର ଦିନ ତାଙ୍କ ପରିବାର ସଦସ୍ୟମାନେ ସନ୍ଦେହ କରିଥୟଲେ ଯେ ଜଙ୍ଗଲରେ ଶିକାରୀମାନେ ଗୁଳି କରିବା ପରେ ତାଙ୍କର ମୃତ୍ୟୁ ହୋଇଛି। ଅଧିକାରୀମାନେ କହିଛନ୍ତି ଯେ ଜିଲ୍ଲା ମୁଖ୍ୟାଳୟରୁ ପ୍ରାୟ ୧୨ କିଲୋମିଟର ଦୂର ଘୁରାସିଆ ଗାଁରେ ଶନିବାର ସନ୍ଧ୍ୟାରେ ରବି ସୂର୍ଯ୍ୟବଂଶୀ (୧୩) ହଠାତ୍ ତଳେ ପଡ଼ିଗଲେ ଏବଂ ତାଙ୍କ ମୁଣ୍ଡରୁ ରକ୍ତସ୍ରାବ ଆରମ୍ଭ ହୋଇଗଲା।
ସେମାନେ କହିଛନ୍ତି ଯେ ପ୍ରଥମେ ରବିଙ୍କ ପରିବାର ସଦସ୍ୟମାନେ ଭାବିଥିଲେ ଯେ ସେ ଝୁଣ୍ଟି ପଡ଼ି ତଳେ ପଡ଼ିଯାଇଛନ୍ତି ଏବଂ ତାଙ୍କ ମୁଣ୍ଡରେ ସାମାନ୍ୟ ଆଘାତ ଲାଗିଛି। ଘଟଣାଟି ଘଟିବା ସମୟରେ ରବି ଗାଈମାନଙ୍କୁ ଖାଇବାକୁ ଦେଇ ଘରକୁ ଫେରୁଥିବା ବେଳେ ହଠାତ୍ ତଳେ ପଡ଼ିଯାଇଥିଲେ। ରବିଙ୍କ ମାମୁଁ ରାହୁଲ ସୂର୍ଯ୍ୟବଂଶୀ କହିଛନ୍ତି, “ରବିଙ୍କ ମୁଣ୍ଡରେ ଗୁଳି ବାଜିଥିଲା। ଘଟଣା ସମୟରେ ତାଙ୍କ ପରିବାର ଲୋକେ ଗୁଳି ଫୁଟିବା ପରି ଶବ୍ଦ ଶୁଣିଥିଲେ।” ସେ କହିଛନ୍ତି ଯେ ଗୁରୁତର ଆହତ ରବିଙ୍କୁ ପ୍ରଥମେ ଆଗରର ଏକ ହସ୍ପିଟାଲକୁ ନିଆଯାଇଥିଲା, ତା’ପରେ ଉଜ୍ଜୟିନୀକୁ, ସେଠାରୁ ତାଙ୍କୁ ଇନ୍ଦୋରର ଏକ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା। ରବିବାର ଇନ୍ଦୋରର ଏକ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ରବିର ମୃତ୍ୟୁ ହୋଇଛି ଏବଂ ସୋମବାର ତାଙ୍କର ପୋଷ୍ଟମର୍ଟମ କରାଯାଇଥିଲା।
ପରିବାର ସଦସ୍ୟ କହିଛନ୍ତି ଯେ ରବି ଆଗରର ଏକ ଘରୋଇ ସ୍କୁଲରେ ୮ ଶ୍ରେଣୀର ଛାତ୍ର ଥିଲା ଏବଂ ଦୀପାବଳି ପାଇଁ ତାଙ୍କ ଗାଁକୁ ଆସିଥିଲା। ତାଙ୍କ ମୃତ୍ୟୁ ଦୀପାବଳି ପାଳନର ଆନନ୍ଦକୁ ଶୋକରେ ପରିଣତ କରିଛି। ମୃତକଙ୍କ ଭାଇ କନହୈୟା ଏବଂ ଅନ୍ୟ ଗ୍ରାମବାସୀମାନେ ଅସନ୍ତୋଷ ପ୍ରକାଶ କରି କହିଛନ୍ତି ଯେ ଘୁରାସିଆ ଗାଁ ଚାରିପାଖରେ ଏକ ଘନ ଜଙ୍ଗଲ ଅଛି, ଯେଉଁଠାରେ ବାହାର ଲୋକମାନେ ପ୍ରାୟତଃ ବେଆଇନ ଭାବରେ ଜଙ୍ଗଲୀ ଜୀବମାନଙ୍କୁ ଶିକାର କରିବାକୁ ଆସନ୍ତି ଏବଂ ସେମାନେ ଏ ବିଷୟରେ ପୋଲିସ ପ୍ରଶାସନକୁ ଅନେକ ଥର ଅଭିଯୋଗ କରିଛନ୍ତି। ସେମାନେ ସନ୍ଦେହ କରୁଛନ୍ତି ଯେ ଶିକାରୀ ଦ୍ୱାରା ଗୁଳି ଚଳାଇବାରୁ ରବିର ମୃତ୍ୟୁ ହୋଇଛି।
ସହର ପୋଲିସ ଅଧୀକ୍ଷକ (ସିଏସପି) ମୋତିଲାଲ କୁଶୱାହା କହିଛନ୍ତି, “ଡାକ୍ତରଙ୍କ ସହ ଆଲୋଚନା ପରେ, ପ୍ରଥମ ନଜରରେ ମନେ ହେଉଛି ଯେ ରବିଙ୍କ ମୃତ୍ୟୁ ଗୁଳି ଯୋଗୁଁ ହୋଇଥିଲା। ତଥାପି, ଆମେ ଏକ ବିସ୍ତୃତ ପୋଷ୍ଟମର୍ଟମ ରିପୋର୍ଟକୁ ଅପେକ୍ଷା କରିଛୁ।” ପରିବାରର ସନ୍ଦେହ କରୁଛନ୍ତି ଯେ ନାବାଳକ ପୁଅଟି ଗୁଳି ଯୋଗୁଁ ମୃତ୍ୟୁବରଣ କରିଛି, ପୋଲିସ ସମସ୍ତ ଦୃଷ୍ଟିକୋଣରୁ ଘଟଣାର ତଦନ୍ତ କରୁଛି।
