ଭୋପାଳ: ୧୪ ଲକ୍ଷର ପୁରସ୍କାର ଥିବା ମହିଳା ମାଓବାଦୀ ଆତ୍ମସମର୍ପଣ କରିଥିବା ନେଇ ସୂଚନା ମିଳିଛି। ଆତ୍ମସମର୍ପଣ କରିଥିବା ମାଓବାଦୀ ଜଣକ ହେଲେ ବିଜାପୁର ଜିଲ୍ଲାର ସୁନିତା। ମଧ୍ୟପ୍ରଦେଶ ବାଲାଘାଟ ଜିଲ୍ଲା ଲାଞ୍ଜି ପୋଲିସ ଷ୍ଟେସନ କ୍ୟାମ୍ପରେ ଆତ୍ମସମର୍ପଣ କରିଛନ୍ତି। ଇନ୍ସାସ୍ ରାଇଫଲ୍, ୩ ମାଗଜିନ୍, ୩୦ ରାଉଣ୍ଡ ଗୁଳି, ୟୁବିଜିଏଲ୍ ସହ ଆତ୍ମସମର୍ପଣ କରିଛନ୍ତି ମହିଳା ମାଓବାଦୀ। ସୁନୀତା ମଧ୍ୟପ୍ରଦେଶରେ, ମହାରାଷ୍ଟ୍ରର ଗୋଣ୍ଡିଆ ଏବଂ ଛତିଶଗଡର ରାଜନନ୍ଦଗାଓଁରେ ସକ୍ରିୟ ଥିଲେ। ସେ ୨୦୨୨ ମସିହାରୁ ବେଆଇନ ଆନ୍ଦୋଳନ ସହିତ ଜଡିତ ଥିଲେ ଏବଂ ପଡ଼ୋଶୀ ଛତିଶଗଡ଼ର ମାଧ ଅଞ୍ଚଳରେ ତାଲିମ ନେଇଥିଲେ।
ଏକ ବିବୃତ୍ତିରେ, ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ମୋହନ ଯାଦବ ତାଙ୍କ ଆତ୍ମସମର୍ପଣକୁ କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କ ଦ୍ୱାରା ଆତ୍ମସମର୍ପଣ ନଚେତ୍ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ମାଓବାଦୀମାନଙ୍କୁ ଦିଆଯାଇଥିବା କଠୋର ଚେତାବନୀର ସକାରାତ୍ମକ ପରିଣାମ ବୋଲି କହିଛନ୍ତି। “ମଧ୍ୟପ୍ରଦେଶ ଆତ୍ମସମର୍ପଣ, ପୁନର୍ବାସ ଏବଂ ରିଲିଫ୍ ନୀତି ୨୦୨୩ ଅନ୍ତର୍ଗତ ଏହା ମାଓବାଦୀଙ୍କ ପ୍ରଥମ ଆତ୍ମସମର୍ପଣ। ୧୯୯୨ ପରେ ଏହା ପ୍ରଥମ ଥର ଯେ ଅନ୍ୟ ରାଜ୍ୟର ମାଓବାଦୀ ମଧ୍ୟପ୍ରଦେଶ ସରକାରଙ୍କ ସମ୍ମୁଖରେ ଆତ୍ମସମର୍ପଣ କରିଛନ୍ତି,” ଯାଦବ ଦର୍ଶାଇଛନ୍ତି। ମୁଖ୍ୟମନ୍ତ୍ରୀ କହିଛନ୍ତି ଯେ ଗତ ୧୦ ମାସ ମଧ୍ୟରେ ମଧ୍ୟପ୍ରଦେଶରେ ୧.୪୬ କୋଟି ଟଙ୍କାର ପୁରସ୍କାର ରାଶି ଥିବା ମାଓବାଦୀମାନଙ୍କୁ ନିପାତ କରାଯାଇଛି।
