ନାବାଳିକା ସାବତ ଝିଅକୁ ଦୁଷ୍କର୍ମ; ବାପାକୁ ୧୪୧ ବର୍ଷ ଜେଲ୍ ଦଣ୍ଡାଦେଶ

ମାଲାପୁରମ: ନିଜ ନାବାଳିକା ସାବତ ଝିଅକୁ ଦୁଷ୍କର୍ମ କରିଥିବା ଅଭିଯୋଗରେ ଦୋଷୀ ସାବ୍ୟସ୍ତ ହୋଇଥିବା ଜଣେ ବ୍ୟକ୍ତିଙ୍କୁ କେରଳର ଏକ ଫାଷ୍ଟ୍ ଟ୍ରାକ୍ ସ୍ପେଶାଲ କୋର୍ଟ ୧୪୧ ବର୍ଷର ଜେଲ୍ ଦଣ୍ଡାଦେଶ ଦେଇଛନ୍ତି। ନଭେମ୍ବର ୨୯ ଅର୍ଥାତ୍ ଶନିବାର କୋର୍ଟ ଏହି ମାମଲାରେ ରାୟ ଶୁଣାଇଛନ୍ତି। ତେବେ ଆଜିର କୋର୍ଟ ରାୟ ଅନୁଯାୟୀ, ଦୋଷୀଙ୍କୁ ମୋଟ ୪୦ ବର୍ଷ କାରାଦଣ୍ଡ ଭୋଗିବାକୁ ପଡିବ। କାରଣ ଏହା ତାଙ୍କୁ ପ୍ରଦାନ କରାଯାଇଥିବା ସର୍ବୋଚ୍ଚ ସମୟ ଅଟେ। ଏଥିରେ କୁହାଯାଇଛି ଯେ ବିଭିନ୍ନ ବ୍ୟବସ୍ଥା ଅନୁଯାୟୀ ଦିଆଯାଇଥିବା ବିଭିନ୍ନ ଦଣ୍ଡ ଏକାଠି ଚାଲିବ। ଏତଦ୍‌ବ୍ୟତୀତ କୋର୍ଟ ଦୋଷୀକୁ ୭.୮୫ ଲକ୍ଷ ଟଙ୍କା ଜରିମାନା ମଧ୍ୟ ଦେଇଛନ୍ତି ଏବଂ ପୀଡିତାଙ୍କୁ କ୍ଷତିପୂରଣ ଦେବାକୁ ନିର୍ଦ୍ଦେଶ ଦେଇଛନ୍ତି।ରିପୋର୍ଟ ଅନୁସାରେ ଏହି ମାମଲା ସହ ଜଡିତ ଜଣେ ପୁଲିସ ଅଧିକାରୀ କହିଛନ୍ତି ଯେ ଅଭିଯୁକ୍ତ ଏବଂ ପୀଡିତା ତାମିଲନାଡୁର ମୂଳ ବାସିନ୍ଦା। ସେ କହିଛନ୍ତି ଯେ ଦୋଷୀ ସାବ୍ୟସ୍ତ ହୋଇଥିବା ବ୍ୟକ୍ତିଜଣକ ପୀଡ଼ିତାଙ୍କ ସାବତ ବାପା ଅଟନ୍ତି। ଅଭିଯୁକ୍ତ ସାବତ ବାପାଜଣକ ୨୦୧୭ରୁ ପୀଡିତାଙ୍କ ସହିତ ଦୁଷ୍କର୍ମ କରି ଆସୁଥିଲେ। ଶେଷରେ ପୀଡିତା ଜଣକ ତାଙ୍କ ବନ୍ଧୁଙ୍କ ପରାମର୍ଶରେ ଏହି ଘଟଣା ବିଷୟରେ ତାଙ୍କ ମା’ଙ୍କୁ କହିଥିଲେ। ପରେ ପୀଡ଼ିତା ଏବଂ ତାଙ୍କ ମା’ ମିଳିତ ଭାବେ ଏନେଇ ପୁଲିସ ନିକଟରେ ଅଭିଯୋଗ କରିଥିଲେ। ଏବେ ଏହି ମାମଲା ଉପରେ କୋର୍ଟଙ୍କ ଏପ୍ରକାର ରାୟ ସାମ୍ନାକୁ ଆସିଛି। ସୂଚନାଯୋଗ୍ୟ, ଠିକ୍ ସେହିପରି ଏକ ମାମଲାରେ ନଭେମ୍ବର ୨୭ରେ ଉତ୍ତରପ୍ରଦେଶର ସୋନଭଦ୍ରର ଶାହଗଞ୍ଜ ଅଞ୍ଚଳରେ କୋର୍ଟ ଜଣେ ପିତାଙ୍କୁ ତାଙ୍କ ନାବାଳିକା ଝିଅଙ୍କ ସହିତ ଦୁଷ୍କର୍ମ କରିଥିବା ଏବଂ ତାଙ୍କର ଗର୍ଭପାତ କରାଇଥିବା ମାମଲାରେ ଦୋଷୀ ସାବ୍ୟସ୍ତ କରି ଆଜୀବନ କାରାଦଣ୍ଡରେ ଦଣ୍ଡିତ କରିଥିଲେ। ଏହି ଘଟଣା ୨ବର୍ଷ ତଳର ବୋଲି କୁହାଯାଉଛି। ମାମଲାର ବିଚାର କରି ପୋକ୍ସୋ ଆକ୍ଟ ସ୍ପେଶାଲ୍ ଜଜ୍‌, ଅତିରିକ୍ତ ସେସନ୍ ଜଜ୍ ଅମିତବୀର ସିଂହ ଏହି ରାୟ ଦେଇଥିଲେ। ଏଥିସହ ୩ ଲକ୍ଷ ୧୫ ହଜାର ଟଙ୍କା ଜରିମାନା ସହ ପୀଡିତାଙ୍କୁ ୨.୫ ଲକ୍ଷ ଟଙ୍କା କ୍ଷତିପୂରଣ ଦେବାକୁ କୋର୍ଟ ନିର୍ଦ୍ଦେଶ ଦେଇଥିଲେ।