ଜମ୍ମୁ: ଜମ୍ମୁ ସ୍ଥିତ ମାତା ବୈଷ୍ଣୋଦେବୀ ଭବନକୁ ଯିବା ମାର୍ଗରେ ଏକ ମର୍ମନ୍ତୁଦ ଦୁର୍ଘଟଣା ଘଟି ୩ଜଣଙ୍କ ମୃତ୍ୟୁ ହୋଇଛି । ରିପୋର୍ଟ ଅନୁସାରେ ପଞ୍ଚି ହେଲିପ୍ୟାଡ ନିକଟରେ ଭୂସ୍ଖଳନ ଯୋଗୁଁ ୩ଜଣ ପ୍ରାଣ ହରାଇଛନ୍ତି । ଦୁର୍ଘଟଣା ପରେ ବହୁସଂଖ୍ୟକ ଶ୍ରଦ୍ଧାଳୁ ଫସି ରହିଥିବା ଆଶଙ୍କା କରାଯାଉଛି । ମାତା ବୈଷ୍ଣୋ ଦେବୀ ସ୍ରାଇନ୍ ବୋର୍ଡ ତରଫରୁ ରିଲିଫ୍ ଓ ଉଦ୍ଧାର କାର୍ଯ୍ୟ ଜାରି ରହିଛି । ଘଟଣା ସମ୍ପର୍କରେ ସୂଚନା ଦେଇ ସ୍ରାଇନ ବୋର୍ଡର ସିଇଓ କହିଛନ୍ତି ଯେ ମାତା ବୈଷ୍ଣୋ ଦେବୀ ସ୍ରାଇନ ଟ୍ରାକରେ ପଥର ଖସିବା ଓ ଭୂସ୍ଖଳନ ହୋଇଛି । ବୋର୍ଡର ବିପର୍ଯ୍ୟୟ ପରିଚାଳନା ଟିମ୍ ଘଟଣାସ୍ଥଳରେ ପହଞ୍ଚିଛନ୍ତି । ଅଧିକ ବିବରଣୀକୁ ଅପେକ୍ଷା କରାଯାଇଛି ।
ଗତ ମେ ୨୦୨୪ରେ ଜମ୍ମୁ-କଶ୍ମୀରର ଅଖନୁରରେ ଏକ ବଡ଼ ଦୁର୍ଘଟଣା ଘଟିଥିଲା । ଏହି ଦୁର୍ଘଟଣାରେ ୨୨ ଜଣଙ୍କ ମୃତ୍ୟୁ ହୋଇଥିବା ବେଳେ ୫୪ ଜଣ ଆହତ ହୋଇଥିଲେ । ମୃତକଙ୍କ ମଧ୍ୟରେ ୧୧ ଜଣ ପୁରୁଷ, ୯ ଜଣ ମହିଳା ଓ ୨ ଜଣ ଶିଶୁ ଥିଲେ । ସେତେବେଳେ ଏହାକୁ ନେଇ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗଭୀର ଶୋକ ପ୍ରକାଶ କରିଥିଲେ । ଜିଲ୍ଲାର ଚୌକି ଚୋରା ଅଞ୍ଚଳର ଟୁଙ୍ଗି-ମୋର୍ଠାରେ ଏହି ଦୁର୍ଘଟଣା ଘଟିଥିଲା । ବସ୍ଟି ପ୍ରାୟ ୧୫୦ ଫୁଟ ଗଭୀର ଖାଲକୁ ଖସି ପଡ଼ିଥିଲା ।
