ନୂଆଦିଲ୍ଲୀ: ଭାରତରେ ଏବେ ୮୫,୬୯୮ ଜଣ କୋଟିପତି (ଏଚ୍ଏନ୍ଡବ୍ଲ୍ୟୁଆଇ ବା ହାଇ-ନେଟ୍-ୱର୍ଥ ଇଣ୍ଡିଭିଜୁଆଲ୍) ରହିଛନ୍ତି । ନାଇଟ୍ ଫ୍ରାଙ୍କ୍ ଗ୍ଲୋବାଲ୍ ୱେଲଥ୍ ରିପୋର୍ଟ-୨୦୨୫ରେ ଏଭଳି କିଛି ତଥ୍ୟ ଉଜାଗର ହୋଇଛି । ନାଇଟ୍ ଫ୍ରାଙ୍କ ରିପୋର୍ଟ ଅନୁଯାୟୀ ଏହି ୮୫,୬୯୮ ଜଣ ଭାରତୀୟଙ୍କ ପାଖରେ ମୋଟ ୧୦ ମିଲିୟନ ଡଲାରରୁ ଅଧିକ ପରିମାଣର ସମ୍ପତ୍ତି ରହିଛି । ଧନୀ ବ୍ୟକ୍ତିଙ୍କ ସଂଖ୍ୟା ଦୃଷ୍ଟିରୁ ଭାରତ ବର୍ତ୍ତମାନ କେବଳ ଯୁକ୍ତରାଷ୍ଟ୍ର ଆମେରିକା, ଚୀନ୍ ଏବଂ ଜାପାନ ପଛରେ ରହିଛି । ଭାରତର ଶକ୍ତିଶାଳୀ ଅର୍ଥନୈତିକ ବୃଦ୍ଧି, ଉଦ୍ୟୋଗୀ କାର୍ଯ୍ୟକଳାପର ବୃଦ୍ଧି ଏବଂ ପୁଞ୍ଜିର ବର୍ଦ୍ଧିତ ପ୍ରବେଶକୁ ବ୍ୟକ୍ତିଗତ ସମ୍ପତ୍ତିର ବୃଦ୍ଧିର ମୁଖ୍ୟ କାରଣ ଭାବେ ଉଲ୍ଲେଖ କରାଯାଇଛି ।
ନାଇଟ୍ ଫ୍ରାଙ୍କ ନିଜ ରିପୋର୍ଟରେ ଦର୍ଶାଇଛି ଯେ, ଭାରତର ଡିଜିଟାଲ୍ ଭିତ୍ତିଭୂମି, ବିଶେଷତଃ ସ୍ମାର୍ଟଫୋନ୍ ଏବଂ ଡିଜିଟାଲ୍ ବ୍ୟାଙ୍କିଙ୍ଗର ବ୍ୟାପକତା, ପୂର୍ବ ଦଶନ୍ଧିଗୁଡ଼ିକ ତୁଳନାରେ ସମ୍ପତ୍ତି ସୃଷ୍ଟିକୁ ଅଧିକ ସୁଲଭ କରିଛି । ଗତବର୍ଷ ତୁଳନାରେ ଭାରତୀୟ ଆରବପତିଙ୍କ ସଂଖ୍ୟାରେ ପ୍ରାୟ ୧୨% ବୃଦ୍ଧି ହୋଇଛି । ଭାରତରେ ବର୍ତ୍ତମାନ ୧୯୧ ଜଣ ଆରବପତି ଅଛନ୍ତି, ଯାହା ୨୦୨୩ରେ ୧୬୫ ଥିଲା । ଏହା ମଧ୍ୟରେ ଗୋଟିଏ ବର୍ଷରେ ୨୬ଜଣ ନୂଆ ଆରବପତି ସୃଷ୍ଟି ହୋଇଛନ୍ତି, ଯାହା ୨୦୧୯ରେ ନୂଆକରି ଆରବପତି ସାଜିଥିବା ୭ଜଣଙ୍କ ତୁଳନାରେ ଯଥେଷ୍ଟ ଅଧିକ । ଭାରତୀୟ ଆରବପତିମାନେ ବର୍ତ୍ତମାନ ପ୍ରାୟ ୦.୯୫ ଟ୍ରିଲିୟନ ଡଲାର ମୂଲ୍ୟର ସମ୍ପତ୍ତି ଅଧିକାରୀ ଅଟନ୍ତି । ଭାରତର ଧନୀ ବ୍ୟକ୍ତିମାନେ, ବିଶ୍ୱର ଅନ୍ୟ ଧନୀମାନଙ୍କ ପରି, ରିଅଲ୍ ଇଷ୍ଟେଟକୁ ଅଧିକ ଗୁରୁତ୍ୱ ଦିଅନ୍ତି । ବିଶ୍ୱରେ ଆରବପତିଙ୍କ ସମ୍ପତ୍ତିର ପ୍ରାୟ ୩୦% ରିଅଲ୍ ଇଷ୍ଟେଟରେ ରହିଛି, ଏବଂ ଏହି ପ୍ରବୃତ୍ତି ଭାରତରେ ବିଶେଷ ଭାବେ ଶକ୍ତିଶାଳୀ, ଯେଉଁଠାରେ ସମ୍ପତ୍ତିକୁ ସାମାଜିକ ମର୍ଯ୍ୟାଦା ଏବଂ ସ୍ଥିରତାର ପ୍ରତୀକ ଭାବେ ଦେଖାଯାଏ । ଭାରତୀୟ କୋଟିପତିମାନେ ଦୁବାଇ, ଲଣ୍ଡନ ଏବଂ ସିଙ୍ଗାପୁର ଭଳି ବିଦେଶୀ ବଜାରରେ ମଧ୍ୟ ବିନିଯୋଗ କରିବାକୁ ଆଗ୍ରହୀ । ତେବେ ଭାରତର ଧନୀ ବ୍ୟକ୍ତିଙ୍କ ଜନସଂଖ୍ୟା ୨୦୨୮ ସୁଦ୍ଧା ୪୩% ବୃଦ୍ଧି ପାଇ ଆନୁମାନିକ ୧୨୨,୧୧୯ ବ୍ୟକ୍ତିଙ୍କୁ ଛୁଇଁବ ବୋଲି ନାଇଟ୍ ଫ୍ରାଙ୍କ ଆକଳନ କରିଛି ।
