ଭୁବନେଶ୍ୱର : ଦୁଇ ଦିନର ବିରତି ପରେ ବିଧାନସଭା ବିଜେଟ ଅଧିବେଶନର ଦ୍ୱିତୀୟ ପର୍ଯ୍ୟାୟ ପୁଣି ଆରମ୍ଭରୁ ପ୍ରବଳ ହଟ୍ଟଗୋଳ ଫଳରେ ବାଚସ୍ପତି ଗୃହକୁ ସାଢେ ୧୧ଟା ଯାଏଁ ମୁଲତବି ଘୋଷଣା କରିଥିଲେ। ସାଢେ ୧୧ଟା ପରେ ଏବେ ସୁରୁଖୁରରେ ଚାଲିଛି ଗୃହ ।ଆଜି ଗୃହରେ ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂ ଦେଓ କହିଛନ୍ତି ଯେ ବିଜୁଳି ମିଟର ହଟାଇବା ବେଆଇନ। ସେ କହିଛନ୍ତି ବରଗଡ ଜିଲ୍ଲାର କିଛି ଅଞ୍ଚଳରେ ମନଇଚ୍ଛା ଭୁଲ ତଥ୍ୟ ପ୍ରଚାର କରାଯାଉଛି ଏବଂ ବିଦ୍ୟୁତ୍ ଉପଭୋକ୍ତାଙ୍କ ମିଟର ହଟାଯାଉଥିବା ଦେଖାଯାଇଛି । ଏହା କେବଳ ବେଆଇନ ନୁହେଁ ବରଂ ଜନସାଧାରଣଙ୍କ ପାଇଁ ଅତ୍ୟନ୍ତ ଅସୁରକ୍ଷିତ ମଧ୍ୟ ଅଟେ। କେବଳ ତାଲିମପ୍ରାପ୍ତ ଏବଂ ଯୋଗ୍ୟ ବୈଷୟିକ ବ୍ୟକ୍ତି ବିଦ୍ୟୁତ୍ ମିଟର ଲଗାଇବା କିମ୍ବା ଅପସାରଣ କରିବାକୁ ଅନୁମତିପ୍ରାପ୍ତ । ମିଟରକୁ ଅନଧିକୃତ କାଢିନେବା ହେତୁ ଯଦି ଏପରି ଅଞ୍ଚଳରେ କୌଣସି ଅଘଟଣ ଘଟେ, ତେବେ ବିତରଣ କମ୍ପାନୀ କୌଣସି ପ୍ରକାରେ ଦାୟୀ ରହିବ ନାହିଁ।
ସେ ଆହୁରି ମଧ୍ୟ କହିଛନ୍ତି ଯେ ୩୦୦ ୟୁନିଟ୍ ପର୍ଯ୍ୟନ୍ତ ମାଗଣା ବିଦ୍ୟୁତ୍ ଦେବାର କୌଣସି ଘୋଷଣା ହୋଇନାହିଁ। ସଠିକ୍ ସ୍ଥିତି ହେଉଛି ପିଏମ “ସୂର୍ଯ୍ୟଘର ମୁକ୍ତି ବିଜୁଳି ଯୋଜନା” ଅଧୀନରେ ରୁଫଟପ ସୋଲାର ସ୍ଥାପନ କରି ୩୦୦ ୟୁନିଟ୍ ପର୍ଯ୍ୟନ୍ତ ବିଦ୍ୟୁତ୍ ଉପଯୋଗ କରିବା ଭାରତ ସରକାରଙ୍କ ଏକ ନୂତନ ଯୋଜନାର ଏକ ଅଂଶ ଅଟେ। ଛାତ ଉପରେ ୩ କିଲୋୱାଟ ସୋଲାର ପ୍ଲାଣ୍ଟ ସ୍ଥାପନ ପାଇଁ କେନ୍ଦ୍ର ସରକାର ୭୮୦୦୦ ସବସିଡି ପ୍ରଦାନ କରୁଛନ୍ତି। ଏହା ମାସକୁ ୩୦୦ ରୁ ଅଧିକ ୟୁନିଟ୍ ଉତ୍ପାଦନ କରିବାରେ ସକ୍ଷମ ଅଟେ ଯାହା ବିଦ୍ୟୁତ୍ ଉପଭୋକ୍ତାମାନଙ୍କ ପାଇଁ ଅତ୍ୟନ୍ତ ଲାଭଦାୟକ ଅଟେ କାରଣ ସେମାନେ ସୌର ଶକ୍ତି ଉତ୍ପାଦନ ଦ୍ୱାରା ବିଦ୍ୟୁତ୍ ବିଲ୍କୁ ଯଥେଷ୍ଟ ହ୍ରାସ କରିପାରିବେ।
ତେଣୁ ମୁଁ ଲୋକମାନଙ୍କୁ ଅନୁରୋଧ କରୁଛି ଯେ ଏହିପରି ଭୁଲ ତଥ୍ୟକୁ ବିଶ୍ୱାସ କରନ୍ତୁ ନାହିଁ ଏବଂ ମିଟରଗୁଡିକର ଅନଧିକୃତ ଏବଂ ଅସୁରକ୍ଷିତ ଅପସାରଣରେ ନିବୃତ୍ତ ହୁଅନ୍ତୁ। ମୁଁ ବିଦ୍ୟୁତ୍ ଉପଭୋକ୍ତାଙ୍କୁ ମଧ୍ୟ ଅନୁରୋଧ କରୁଛି ଯେ ପ୍ରଧାନମନ୍ତ୍ରୀ ସୂର୍ଯ୍ୟଘର ମୁକ୍ତି ବିଜୁଳି ଯୋଜନାରେ ଅଂଶଗ୍ରହଣ କରନ୍ତୁ ଏବଂ ଏଥିରୁ ଉପକୃତ ହୁଅନ୍ତୁ।
ବିଜୁଳି ମିଟର ହଟାଇବା ବେଆଇନ : ଉପ-ମୁଖ୍ୟମନ୍ତ୍ରୀ
