କାନାଡ଼ାରେ ଭାରତୀୟଙ୍କୁ ହତ୍ୟା

ଓଟାୱା: କାନାଡାର ଓଟାୱା ସହର ନିକଟରେ ଜଣେ ଭାରତୀୟ ନାଗରିକଙ୍କୁ ଛୁରି ଭୁସି ହତ୍ୟା କରାଯାଇଛି। ଏହି ଘଟଣାରେ କାନାଡା ପୋଲିସ ଜଣେ ସନ୍ଦିଗ୍ଧ ବ୍ୟକ୍ତିଙ୍କୁ ଅଟକ ରଖିଛି। କାନାଡାର ରାଜଧାନୀ ଓଟାୱାରେ ଥିବା ଭାରତୀୟ ହାଇ କମିଶନ ଏସମ୍ପର୍କରେ ଟ୍ୱିଟ୍ କରି ସୂଚନା ଦେଇ କହିଛନ୍ତି ଯେ, ଓଟାୱା ନିକଟସ୍ଥ ରକଲ୍ୟାଣ୍ଡ୍‌ରେ ଘଟିଥିବା ଛୁରାମାଡ ଘଟଣାରେ ଆହତ ଜଣେ ଭାରତୀୟ ନାଗରିକଙ୍କ ଦୁଃଖଦ ମୃତ୍ୟୁ ହୋଇଛି। ହାଇ କମିଶନ କିନ୍ତୁ ମୃତକଙ୍କ ପରିଚୟ ପ୍ରକାଶ କରିନାହାନ୍ତି। ଭାରତୀୟ କମିଶନଙ୍କ ପକ୍ଷରୁ ଟ୍ୱିଟ୍ କରାଯାଇଥିବା ପୋଷ୍ଟରେ କୁହାଯାଇଛି ଯେ, ‘ସମସ୍ତ ସମ୍ଭାବ୍ୟ ସହାୟତା ଯୋଗାଇବା ପାଇଁ ଆମେ ସ୍ଥାନୀୟ ସମ୍ପ୍ରଦାୟ ସଂଘ ମାଧ୍ୟମରେ ଶୋକସନ୍ତପ୍ତ ପରିବାର ସହିତ ଯୋଗାଯୋଗରେ ଅଛୁ’। ସିଟିଭି ନ୍ୟୁଜ ଅନୁସାରେ, ଅଣ୍ଟାରିଓ ପ୍ରୋଭିନ୍ସିଆଲ ପୋଲିସ (ଓପିପି) କହିଛି ଯେ, ଗୁଳିକାଣ୍ଡଟି ରାତି ପ୍ରାୟ ୩ଟା ସମୟରେ ରକଲ୍ୟାଣ୍ଡର ଲାଲୋଣ୍ଡେ ଷ୍ଟ୍ରିଟ ନିକଟରେ ଘଟିଛି। ଏହି ସ୍ଥାନଟି ଓଟାୱା ସହରରୁ ପ୍ରାୟ ୪୦କିଲୋମିଟର ପୂର୍ବରେ ଅବସ୍ଥିତ। ତେବେ ଅଟକ ବ୍ୟକ୍ତିଙ୍କ ବିରୁଦ୍ଧରେ କ’ଣ ଅଭିଯୋଗ ଆସିଛି ତାହା ପୋଲିସ ଏପର୍ଯ୍ୟନ୍ତ ପ୍ରକାଶ କରିନାହିଁ। ଓପିପି କହିଛି ଯେ ଜନସାଧାରଣଙ୍କ ସୁରକ୍ଷା ପାଇଁ କୌଣସି ଚିନ୍ତା ନାହିଁ। ‘ଯେହେତୁ ଆମେ ତଦନ୍ତର ପ୍ରାରମ୍ଭିକ ପର୍ଯ୍ୟାୟରେ ଅଛୁ, ତେଣୁ ଆଉ କୌଣସି ସୂଚନା ପ୍ରକାଶ କରାଯାଇପାରିବ ନାହିଁ।