ଭାରତ ଏଥର ଛାଡ଼ିବ ନାହିଁ: ଚେତାବନୀ ଦେଲେ ରାଜନାଥ

ନୂଆଦିଲ୍ଲୀ: ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଗୁରୁବାର କେରଳ ଗସ୍ତରେ ପହଞ୍ଚିଛନ୍ତି। କେରଳ ବିଧାନସଭା ନିର୍ବାଚନ ପୂର୍ବରୁ ଏଠାରେ ଏକ ସମାବେଶକୁ ସମ୍ବୋଧିତ କରି ସେ କହିଛନ୍ତି ଯେ, ଇରାନରେ ଚାଲିଥିବା ଯୁଦ୍ଧ ମଧ୍ୟରେ ଭାରତର ପଡ଼ୋଶୀ ଦେଶ ଯେକୌଣସି ଦୁଃସାହସ କରିପାରେ। ପ୍ରତିରକ୍ଷା ମନ୍ତ୍ରୀ ସ୍ପଷ୍ଟ ଭାବରେ ଚେତାବନୀ ଦେଇଛନ୍ତି ଯେ, ଯଦି ଏପରି ଘଟଣା ଘଟେ, ତେବେ ଭାରତର ପ୍ରତିକ୍ରିୟା ଅତ୍ୟନ୍ତ ଦୃଢ଼ ଏବଂ ନିର୍ଣ୍ଣାୟକ ହେବ। ଭାରତ ଆଉ ଛାଡ଼ିବ ନାହିଁ। ସେ କହିଛନ୍ତି, ଅପରେସନ୍ ସିନ୍ଦୂର ଜାରି ରହିଛି।ମୋଦି ସରକାରଙ୍କୁ ପ୍ରଶଂସା କରି ରାଜନାଥ କହିଛନ୍ତି ଯେ ଗତ କିଛି ବର୍ଷ ମଧ୍ୟରେ ଭାରତର ଜାତୀୟ ସୁରକ୍ଷା ଆହୁରି ମଜବୁତ ହୋଇଛି, ଦେଶ “ସୀମାର ଉଭୟ ପାର୍ଶ୍ୱରେ” ଆତଙ୍କବାଦ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରିଛି।”କେନ୍ଦ୍ରରେ ଏନଡିଏ ସରକାର କ୍ଷମତାକୁ ଆସିବା ପରଠାରୁ, ଆମେ ଆତଙ୍କବାଦ ବିରୁଦ୍ଧରେ ନିର୍ଣ୍ଣାୟକ କାର୍ଯ୍ୟାନୁଷ୍ଠାନ ଗ୍ରହଣ କରିଛୁ,” ସେ କହିଛନ୍ତି। “‘ଉରି ଆକ୍ରମଣ’ ପରେ ସର୍ଜିକାଲ ଷ୍ଟ୍ରାଇକ୍ ହେଉ, ‘ପୁଲୱାମା’ ପରେ ହୋଇଥିବା ବିମାନ ଆକ୍ରମଣ ହେଉ, କିମ୍ବା ସମ୍ପ୍ରତି ‘ପହଲଗାମ’ ଘଟଣା ପରେ କରାଯାଇଥିବା ‘ଅପରେସନ୍ ସିନ୍ଦୁର’ ହେଉ, ଆମେ ଆତଙ୍କବାଦ ବିରୁଦ୍ଧରେ ଏକ ଶକ୍ତିଶାଳୀ ଆଘାତ ଦେଇଛୁ।” ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଭୂମିକାକୁ ଉଲ୍ଲେଖ କରି ସେ କହିଛନ୍ତି, ସରକାର ଉଚ୍ଚସ୍ତରୀୟ ବୈଠକ ମାଧ୍ୟମରେ ପରିସ୍ଥିତିର ନିରନ୍ତର ସମୀକ୍ଷା କରୁଛନ୍ତି। ଯେକୌଣସି ଜରୁରୀକାଳୀନ ପରିସ୍ଥିତିର ଶୀଘ୍ର ପ୍ରତିକ୍ରିୟା ଦେବା ଏବଂ ଦେଶକୁ ସୁରକ୍ଷିତ ରଖିବା ପାଇଁ ଆବଶ୍ୟକୀୟ ଯୋଜନା ପ୍ରସ୍ତୁତ କରାଯାଉଛି। ବତ୍ତର୍ମାନର ସମୟରେ ସମସ୍ତେ ଏକଜୁଟ ହେବା ଜରୁରୀ। ସଙ୍କଟ ସମୟରେ, ଆମକୁ ରାଜନୀତିରୁ ଊର୍ଦ୍ଧ୍ୱକୁ ଉଠି ଦେଶର ସ୍ୱାର୍ଥ ଉପରେ ଧ୍ୟାନ ଦେବାକୁ ପଡିବ।